釋心慧同釋健釗早前被踢爆二人蜜遊夏威夷,釋心慧仲著住比堅尼露股。

中環人語

釋健釗釋心慧財來自有方

贊助商連結

冇錯,又係佢哋,釋心慧同釋健釗,佢哋俾人影到喺夏威夷歎世界,釋心慧仲著住比堅尼露屁股曬太陽,佢哋嘅料愈爆愈多,愈揭愈臭。
今次話你知,釋心慧財來自有方,佢同釋健釗係南天竺寺嘅董事,由於南天竺寺屬慈善團體獲稅局豁免交稅,董事係唔可以收取酬金,之但係根據我哋收到嘅絕密文件,釋心慧同寶蓮寺高僧釋智德喺一間叫「梵唄和音有限公司」嘅私人公司擔任董事,一月至三月份收取七萬五千元董事袍金,平均每個月兩萬五千蚊,好過唔少打工仔收入,相當和味。

 

 

雖然醜聞滿天飛,但兩人一於懶理,照孖住飛去上海出席活動。

呢間公司實際業務係咩就唔太清楚,但就肯定同南天竺寺有關,因為公司嘅註冊地址正正就係釋心慧揸 fit嘅南天竺寺。除咗釋心慧,亦有五人收取顧問費,包括寶蓮寺前任住持釋智慧同現任住持淨因。查實成日周圍飛嘅釋心慧生活不知幾咁多姿多采,成日喺 Facebook打卡,去過北京米芝蓮餐廳食嘢,又去過北海道旅行,而家仲揸 Jaguar新車,好多網友都呻入錯行,原來出家可以咁歎。
寶蓮寺資產達十三億元,有名你叫「寺院界富豪」,寶蓮寺喺夏威夷嘅分會都唔差,持有夏威夷銀行等股票,長期投資逾三百多萬元,一五年用八十三萬元買蘋果公司嘅股票,鍾意影相打卡嘅釋心慧,會唔會都係果迷呢?雖然醜聞多籮籮,近日釋心慧同釋健釗仍「拍拖更」出席上海佛教活動,釋心慧刻意站在釋健釗背後,你有你鬧,佢哋照樣笑面迎人。

寶蓮寺嘅夏威夷分會揸住幾隻股票,其中一五年就用咗八十三萬買蘋果公司嘅股票。

釋心慧一月至三月喺呢間「梵唄和音有限公司」收咗七萬五千蚊董事袍金,平均每個月都有兩皮半,認真和味。
縱橫遊老闆無覺好瞓
縱橫遊上星期俾黑客 hack咗,二十萬客戶資料被鎖,門市拉閘,用人手白紙黑字接單,與顧客溝通都要逐個打電話,成件事好似返咗去七十年代。
CEO袁振寧嘅身邊人話,呢單嘢搞到老細心情好差,幾日都瞓唔着,諗極都唔明點解會出事。佢哋估計,應該係好熟悉公司運作嘅人做,因為客戶資料已分開放喺超過十個 server,「無理由全部 hack晒。」而且佢哋覺得黑客不可信,好可能俾咗錢都攞唔番啲資料。
縱橫遊老闆袁士強七○年在東洋留學,七九年返港創立公司,專攻日韓。當年佢好搏,個仔袁振寧一歲時已帶埋佢出埠去日本,生意上軌道後移民加拿大。幾年前袁振寧已經接棒,做咗集團 CEO,比老豆仲搏。今次被勒索,袁振寧話絕對唔會俾贖金,寧願重新建立系統。佢都唔係第一次咁勇,一一年日本東北大地震,未夠一個月,佢已親自去仙台送善款。今次輪到公司出事,亦由佢諗辦法收拾殘局。

聽講接班人袁振寧好有責任心,做嘢上心,今次咁大鑊,搞到佢無覺好瞓。

縱橫遊要用人手登記,前線員工做到踢晒腳,顧客都要排隊慢慢等。
男人的 birkin
楷女郎梁洛施俾人影到喺餐廳同人激啜,又係時候重溫佢生完 B同小小超溫馨合照。重點喺小小超隻右手度,隱約見到佢戴嘅錶,係 Patek Philippe(百達翡麗)。
呢個牌子好多有錢佬都鍾意收藏,限量版更加係身份象徵。入門款都要幾十萬,由 5711到 Chrono都炒到飛起,其中 Calatrava 5522A定價十七萬元,早排喺大陸炒到五十萬元。好多限量款更加唔使講,上年拍賣全球限量四隻嘅不銹鋼萬年曆計時 Ref.1518,連埋佣金計番港紙要七千八百幾萬,比起預算價高三倍。小小超當日戴嗰隻 PP 3712無咁貴,不過網上見到都賣緊接近六十萬。
Patek Philippe嚟緊又會出新錶,成個中環都等緊,等於女人嘅 birkin咁重要。

小小超戴嘅 3712雖然唔算好貴,賣緊六十幾萬,不過其實以佢身份,好似誠哥咁,都唔需要戴名錶顯身價。

王穎妤幫手賣殼?

香港好多人話自己係執業大律師,不過真定假,上網一 check就知。


上星期五晚有間主板市值四億幾嘅冠亞商業( 104)出通告,大致內容係前一日某位公司董事,收到個獨立第三者嘅電話,約第二朝早傾吓收購佢公司,而呢位董事又真係應約喎。春江鴨於是狂炒冠亞,股價半日升咗兩成三,呢個時候冠亞才主動停牌,強調商討只是非常初步。
有江湖人士就話呢招非常好橋,就算今次賣盤不成,起碼曲線公諸於世,冠亞歡迎各位嚟傾買殼,費用全免,披露易變成了宣傳易。
查實呢間咁奀豬公司亦唔嘢小,請到純官紅顏知己王穎妤做獨立非執董,仲要一做就超過十年,唔知佢會唔會就係嗰位接到神秘電話嘅董事,負責出去傾生意呢又?
題外話,喺冠亞今年嘅年報簡介內,指藍血王小姐係香港執業大律師,但據法律界人士講,其實佢已 debar多時,小宗查過大律師公會名冊,亦唔見佢大名,按理唔可以稱自己為「執業」,情況同何君堯差不多。
沈大師牙骹戰連環輸

沈大師好鍾意賭,仲要專揀冷門嗰邊,真係要佢請食飯,不知要等到何年何月了。

近排網上有句好精警潮語:「問君能有幾多愁,沒買騰訊沒買樓。」由此可見冇買呢兩瓣升到嘭嘭聲資產,真係慘到冇朋友,眼淚在心裡流。而呢一刻小宗諗起財經演員沈振盈,事關佢長年睇淡樓市,自己亦身體力行做無殼一族,再加上佢又睇淡騰訊,更公開同公仔箱觀眾 side bet,喺騰訊股價三百三十蚊時輸賭,上落五十蚊定勝負,結果上星期股王衝破三百八十蚊大關,大師即刻俾人翻舊賬要求找數,請對方食飯。
查實沈大師賭性相當強(平時愛過大海及賭馬仔),周不時同人進行牙骹戰。線人報料原來佢幾年前亦同友人 side bet,喺獨立第三方見證下,押注實施咗超過三十四年嘅港元聯繫匯率制度,會喺兩年內取消,仲話到時香港便會大亂,樓市崩盤,銀紙貶值等等(下刪一千字)。友人覺得贏面太高勝之不武,講明就算係上調七點八呢個數,都當大師勝出。
結果兩年過去,聯繫匯率穩如泰山,沈大師輸得無話可說咯,但該名友人無意要佢找數。唔知係咪驚大師輸落好多牙骹戰,約佢食飯要輪到出年乎?
撰文:宗菁華
centralman@nextdigital.com.hk

    tvb4life 發表在 痞客邦 留言(0) 人氣()