梁振英愈講愈興起,又話香港人絕大多數「愛國」,參加論壇嘅人至少有五十人個名包含「國」或「華」字,說明港人內心對國家發展嘅期盼。

八卦陣

CY話殺人唔犯法尖啤:狗屁不通!

贊助商連結

前特首梁振英榮登政協副主席,講嘢都愈來愈大膽。佢上星期出席愛國論壇,爆出驚人言論話:「有一種行為,古今中外,都係犯法,就係殺人,而且會處以極刑。但有一個例外,古今中外,都有呢個例外,就係以國家名義殺人,係唔犯法。」

 

 

出獄時講過話 CY「不值一提」嘅尖啤,都忍唔住要插佢咁講係威脅港人。

早就同 CY擘晒面嘅全國政協前委員劉夢熊,出獄後話 CY呢個人「不值一提」。但今次「以國家名義殺人不犯法」言論,就激起佢把火,痛斥 CY講嘅嘢「狗屁不通!」
佢向《壹》仔舉出古今中外例子,例如四人幫害死劉少奇、彭德懷同千千萬萬嘅中國人,最終四人幫倒台受審判;光州事件入面,總統全斗煥最後都要為事件負責。其實根據 CY嘅邏輯,係咪代表佢認為南京大屠殺都唔需要有人負責?
尖啤批評 CY係「完全違背香港七百萬名市民嘅民意」,仲覺得 CY嘅言論好似呼應緊何君堯「殺無赦」論, CY咁講,正正係威脅港人一旦發生動亂,「唔排除以國家名義殺人!」
佢仲透露準備參選第十三屆全國人大代表,「總要有人代表正義感,總要有人代表良知,總要有人代表香港嘅核心價值。」
山頂補選在即
各界撐錢志健

錢志健(右三)星期日喺山頂廣場造勢,立法會議員郭家麒(左一)去撐場。

中西區區議會山頂選區補選,今個月二十六日舉行。「 2047香港監察」召集人錢志健硬撼自由黨楊哲安,被睇低一線。佢最近不停搞造勢大會,民主派之前幾乎「晒冷」幫佢助選、導演張堅庭、「大班」鄭經翰等都紛紛表示支持佢,連尖啤劉夢熊都有去撐場。
尖啤話,雨傘運動期間認識錢志健,大家都係金融界人士,錢志健喺有線電視做節目,都搵過佢做訪問。佢話老實講喺政治見解方面,其實同錢志健有分歧,但覺得對方都係捍衞緊香港核心價值,包括香港人崇尚嘅自由、民主、人權同法治,呢啲佢都認同。
佢話人大常委會八三一決定係「橫蠻無理咁去勾銷咗(雙普選)」。錢志健係佔中十死士之一,尖啤就話自己喺程序上並唔支持佔中,「但係喺目標公義方面,我係支持真普選嘅,我覺得錢志健一直都致力支持真普選,喺呢個方向,我哋係一致。」
佢最近又喺報章撰文,指中共十九大報告提出「牢牢掌握中央對香港全面管治權」,有違一國兩制初衷。被問到佢依家算唔算成為「民主派」,佢就只係答:「是其是,非其非,堅持一國原則,尊重兩制差異。」
張俊勇出書解《基本法》
港區全國人大代表下個月十九號選舉,據了解,部分有意競逐人士,已經積極展開籌備工作。至於泛民方面,據聞暫時無意派人參選,因為參選人必須簽「衰仔紙」,即係喺登記表聲明擁護中國憲法、《基本法》同一國兩制,令佢哋卻步。
上屆曾經參選但最終落敗嘅經民聯青委會顧問張俊勇( Thomas),聽講今年會再出戰。本身係基本法推廣督導委員會委員嘅佢,上個月就同另一名委員李浩然,合著咗本書叫《正本清源基本法》,講解《基本法》第一章總則內嘅十一條條文。
Thomas同《壹》仔講,其實佢喺網台節目有講解《基本法》,總共會有一百六十集,講晒咁多條《基本法》,由年初已經開始拍攝。由於坊間有唔同類型有關《基本法》嘅材料,佢想喺影片以外再匯集成書,推廣《基本法》喎。
本書總共有二十八頁,附送光碟一隻,盛惠五十蚊,總共印咗二千本。 Thomas話想推廣至校園,但暫時得便利店有售。有人同佢講五十蚊太貴,佢話對定價冇乜概念,下次可以小心啲,遲吓仲會將餘下一百四十九條都出埋書。唔知出咗呢本書,會唔會令佢比其他參選人更勝一籌呢?

本書仔得廿八頁,薄薄哋,賣成五十蚊, Thomas話下次可以考慮賣平啲喎。

Thomas本身有網上節目講解《基本法》,佢話計劃將全部匯集成書。
何君堯辣火頭林卓廷隔空反擊
民主黨立法會議員林卓廷同建制派議員何君堯,呢個星期會代表香港立法會,到英國國會出席為期五日研討會。林卓廷上星期五先行一步飛咗去英國,仲去埋執法機構國家打擊犯罪調查局( NCA),舉報前特首梁振英涉嫌貪污同逃稅。
星期日先出發嘅何君堯,喺機場候機室開 Facebook Live批評林搞搞震,話唔係好明佢做乜要去英國投訴 CY,仲話不如去澳洲、美國華盛頓同德國法蘭克福投訴。「殺無赦」言論仲未甩身嘅佢,再辣着火頭話:「遲啲先慢慢炮製佢(林)」。
林卓廷就未驚過,喺 Facebook隔空反駁話何君堯身為執業律師,應該明白處理刑事案要睇司法管轄權, UGL案件涉及本港、英國同澳洲業務,所以佢去英國訪問順便舉報梁振英,反問何「炮製」係咩意思,叫佢唔好開口埋口就殺無赦同炮製人,反擊話:「梁振英我都唔驚,何君堯我會驚你?」
其實何君堯都驚青緊,皆因有關佢嘅譴責動議,預料星期四喺立法會展開討論。何透露因外訪,唔可以親自回應指控,內心忐忑不安,但已經逐一同建制派議員打招呼,希望大步𨂾過,「等我唔使被人哋插得咁應。」

何君堯拍片插林卓廷,但其實佢都好騰雞,擔心有關佢嘅譴責動議會有閃失。(何君堯 fb截圖)

林卓廷話同英國國家打擊犯罪調查局人員見面,對方態度積極,提問仲非常深入詳細。(林卓廷 fb截圖)
撰文:巫不言

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()