坦白講

明哥二號工廈十蚊飯惠基層

贊助商連結

在金錢掛帥的香港,為了幫人你可以付出幾多?四十四歲的 Nicholas,是一位普通打工仔,在信仰驅使下,希望回饋社會,於是由原本經營班戟生意的食品加工場,改為服務基層的合作社。他售賣的不只是十元平價飯盒,還盛載着一份人情味。

 


我正職係一間寵物用品公司管理層,年幾前租咗觀塘工廈做班戟食品加工場,後來生意不景就唔接單,心諗有咩嘢可以做去回饋社會,當時好大原因係信仰令我想服務社會。大約一年前我就改變經營模式,開始賣平價飯盒,變成依家嘅合作社。

我哋賣飯分兩個時段,一個時段係早鳥,即係十一點半到十二點半,一飯一餸賣十蚊。十二點半後賣番正常價,都係十八蚊一餸一飯,套餐就係兩餸一飯加一個湯,都係廿五蚊,呢個價都比外面平。

好多人叫我賣貴啲,但我堅持要賣得平,希望幫到有需要嘅基層可以溫飽之餘,亦可以有尊嚴咁買飯,因為我哋唔係免費送俾佢哋。我哋嘅優惠不限年齡同階層,就算你好有錢都可以嚟買,但我相信有能力食貴啲嘅朋友,唔會經常嚟。

由開始經營到依家,我投資咗接近二十萬元,我哋都會包伙食同接商業訂單,但因為人手唔夠,所以唔做得多,賺極都係有限錢。呢度月租萬五蚊,每日有三至四個同事幫手,一個月開支都要五萬蚊,平均計每個月蝕緊接近兩萬蚊。

我曾經考慮同其他機構合作,或者申請政府撥款,但我做呢個社企,如果同其他人合作或者接受資助,可能會加入商業元素,未必同我理念相同,所以最後都冇考慮。之前教會有人資助一萬蚊俾我添置設備,有個朋友做咗十幾年 XO醬都支持我哋,雖然唔算好穩定同好大嘅贊助,但就係好有愛心嘅贊助。

我同深水埗明哥有相似亦有唔同,相似嘅係佢做好自己生意後,再用多餘部分去幫人;唔同嘅係佢出名之後,有好多私人或非私人贊助,所以佢可以從小規模發展,往前踏步開分店。呢個可能係我未來嘅發展方向,我希望可以喺唔同地區開分店,服務更多人。
撰文:何紫
攝影:海江田
news@nextdigital.com.hk 

tvb4life 發表在 痞客邦 留言(0) 人氣()