丁子高兩仔爺行山執到型

贊助商連結

近年,內地電視台嘅親子真人騷深受歡迎,好似《爸爸去哪兒》拍到第五季,仍然引起唔少話題。喺香港嘅娛圈中,楊千嬅同丁子高都有個五歲大嘅仔丁進諾(Torres),生得精靈活潑;而且,要爹哋丁子高做湊仔公,仲絕對唔成問題,皆因天后級老婆千嬅平時忙到死,湊仔責任自然落喺丁生身上。

早前,東姑就喺大潭撞見丁氏父子,丁子高一身熒光綠嘅運動裝好鬼sharp,而Torres雖然黑白衫褲,但副反光太陽眼鏡,離遠已經搶晒鏡,成個小明星咁款。見佢哋喺屋企陽明山莊出發,然後行咗去對面嘅郊野公園行山徑,原來兩仔爺一齊行山親子樂。

媽咪千嬅呢排忙住綵排演唱會,陪個仔嘅重任,丁子高當仁不讓。當日,同行仲有個工人姐姐,幫手孭下背囊,算係幫輕下;之但係Torres成隻甩繩馬騮,精力充沛過人,呢位爹哋陪仔行山都幾索氣。東姑見丁子高事後喺社交網po咗啲行山相,只係見到Torres嘅背影,仲hashtag:「一支箭標上山頂」、「來回3公里」、「唔識攰」,可想而知,湊住精力旺盛過人嘅Torres,真係少啲精神同體力都唔掂,丁生都算相當勁揪喇!

丁子高湊住紮紮跳嘅Torres,父子一身運動裝,由陽明山莊嘅寓所出發去行山。

 

兩父子入咗大潭郊野公園嘅行山徑,尾隨仲有工人姐姐,孭住背囊幫手拎嘢。

 

丁子高拖實Torres行上一級級嘅樓梯,山路咁斜,睇見都覺攰。

 

楊千樺同丁子高錫仔錫到燶,早排齊齊扮哈利波特,同個仔慶祝五歲生日。

    全站熱搜

    tvb4life 發表在 痞客邦 留言(0) 人氣()