三十二歲嘅屈國姣皮膚睇落唔錯,
唔知係咪關身後支雪花秀事呢?

中環人語

郭文貴情婦用雪花秀?

贊助商連結

上期封面講郭文貴臥底情婦屈國姣,八月喺香港被警方拘捕,警誡下話佢串謀郭文貴詐騙一百一十億元海通證券股票,從此阿姣就失去聯絡,再見佢已經係喺九月網上一段短片,阿姣態度一百八十度轉變,雖然佢怒轟郭文貴,不過表情生硬,好有背稿 feel。

 


不如大家睇吓片中睡房嘅布置,有熊貓公仔,睇落好有少女味,白白淨淨嘅阿姣其實好貪靚兼幾潮,右後方梳妝枱放咗三支護膚品,橙黃色蓋同韓國品牌雪花秀有九成相似,乳液香港大概賣三百幾蚊一支,右邊藍色瓶身似係日本資生堂洗面乳,網上賣三十幾蚊一支啫,好抵,不過如果係國產 A貨就仲平。至於放喺張床嘅啡色背包同旁邊嘅銀色包包,分別係韓國 MCM同埋三宅一生嘅「 Bao Bao」系列,不過包包圖案同原裝有啲唔同,好懷疑係 A貨。間睡房仲無啦啦多咗兩棵樹!有幾多人會放兩棵樹喺房吸氧氣呢?似大台啲布景板多啲囉!

 

從商一樣運滯
青年新政嘅梁頌恆同游蕙禎,因宣誓案失去議員資格,仲被立法會入稟追討薪津合共一百八十六萬元,兩位坦言離開立法會後,都好難搵到正職,只能食老本,認真無運行。而青年新政創黨成員及前發言人周世傑( Donald),於上屆區選落敗後淡出政壇,更加喺一六年初退黨,創立餐廳電視 Life TV(拉闊電視),以播自家製節目抵抗電視霸權為目標。
原先以為佢由政轉商,能夠重新出發,但原來同樣運滯,公司最近廣發通知指:「本公司行政總裁周世傑( Donald Chow)先生因個人理由,已於 2017年 9月 30日正式離職及全數售出股份,往後其對外之言行及從事之業務行為均與本公司無關,亦不代表本公司,尚祈鑒察。」有啲不歡而散咁喎。
於今年初佢接受《壹》仔訪問時曾指:「我夥拍到一個好好嘅合夥人,可以做到一個新嘅播放系統。」今次 Donald只回覆:「真係一言難盡,只能講要帶眼識人。」青年新政成員條路行得咁崎嶇,究竟係氣數問題定人嘅問題呢又?


周世傑當初做 startup行政總裁諗住轉吓運,仲雄心壯志地搵嚟 YouTuber熊仔頭幫拖拍片,可惜喺 Life TV開台不足一年,就被「離職」。


而青年新政嘅梁頌恆(左)同游蕙禎(右)條路就更難行,分分鐘要申請破產先搞得掂,梁頌恆接受訪問時直指破產對佢嚟講好大件事,會影響佢從商。
公司秘書「爆騷」瀨嘢
交所通告一向都係由上市公司秘書負責,不過近年就經常出現「蝦碌」情況。例如瑞聲科技( 2018)曾被沽空機構追擊,公司「嗱嗱聲」發出澄清公告,但可能急得滯,結果「市場情況」變「市場情侶」,「股東」變「股來」,貽笑大方。另一間中材股份( 1893),曾出過「六個膠業績預告」,而國美電器( 493)話派末期息每股$1.8,但其實股價都係得$1.46。
要數吓做最多上市公司秘書嘅人,就真係要講吓莫明慧( Mandy Mok)。翻查資料,佢現時擔任秘書嘅公司多達三十二間,包括融創中國( 1918)、四環醫藥( 460)、匯源果汁( 1886)等等,真係爆晒騷。每間公司每月搵佢開一次會,佢已經好唔得閒。有公司簡介就寫,佢喺秘書方面累積逾 20年專業及內部經驗,擁有應用會計與金融理學碩士學位,本身係秘書公司凱譽董事。
早前有指香港特許秘書公會,有意定出會員每人最多只可任職 6間上市公司的公司秘書,如果成為行規嘅話,睇怕好多人會搵少好多! A

中材的「六個膠業績」至今仍未修改,睇嚟主席劉志江(左二)開會時要諗諗計。

 

 

數月前瑞聲的公告錯漏百出,引起熱烈討論。
本週圖片踢拖上陣
新加坡總理李顯龍妻子何晶,過往去見奧巴馬,或是依家去見特朗普,都被人發現佢「踢拖」。而呢對拖鞋仲要平底露趾,甚具街坊 look。何晶出身小康之家,呢位史丹福碩士,代表淡馬錫傾投資亦一向「踢拖」上陣。不過佢有錢有權,對方一樣對她恭敬!

撰文:宗菁華

    tvb4life 發表在 痞客邦 留言(0) 人氣()