壹科林

Gran Turismo Sport 合法飛車又嚟啦

贊助商連結

以「慢工出細貨」去形容 PlayStation王牌賽車遊戲《 Gran Turismo》,絕對無講錯,等了一年又一年,全新作品「 Gran Turismo Sport」(簡稱: GT Sport)終於正式登場,不但繼續延續高度真實感及操作,更支援 4K、 HDR等最新影像規格,玩得過癮,睇得細緻。

 


GTSport的認真,不但在於其出色的畫面及操作,由於有各大汽車品牌支援,於是可以「攞正牌」將真車搬入遊戲中,外形跟到足,細緻到連車身曲線、指揮燈,甚至連車身膠邊都一模一樣。內籠同樣睇到嘩嘩聲,每個細節位例如冷氣出風口、燈掣,再睇埋軚盤上的縫線,的確上中下路都毫無破綻。

為慶祝 GT Sport在港推出,香港 PlayStation日前於 apm商場(上左圖)舉行「 PS4 Gran Turismo Sport無限活動地帶」活動,現場設有多個試玩位置,全部配備價值$6,499的 Thrustmaster T-GT軚盤(上右圖)。

高規視覺
新作收錄四十條賽道及超過一百五十款車型,並可自選不同天氣狀況,而車身反光及陰影位置,亦會隨天氣變化而出現分別,加上支援 4K、 HDR、 60fps及廣域色彩多種影像規格,強烈建議搵部大尺寸電視玩,先可以盡情享受各種好玩模式,例如與國際賽車聯盟合作的競技模式,利用配對系統,結合不同玩家一齊落場,又或者去開放式對戰大廳,自由搵對手較量。當然,「傳統」的街機模式,依然保留,想齊齊飛車定孤獨飛,自己話事。

自拍模式可隨意到不同國家的地標,並有多種自選設定。

配合 HDR影像技術,就算高反差的光暗位,同樣可以睇得清楚。

設有多個不同視點,畫面下方顯示多種行車狀態及數據。

在不同的天氣變化下,車身反光位同樣有分別。

不但外形似真實車款,內籠亦都一絲不苟。
愛上自拍
鍾意飛車,自然會愛上「 GT Sport」,但對於只享受駕駛樂趣,又或者只愛駕駛愛車四圍去影相打卡的玩家,今集設有「景觀」模式,玩家可以帶住愛車到不同的城市自拍,由於「背景」是利用相片加上 True HDR及物理基底渲染技術製作而成,所以完全保留光影資訊,再加上愛車,真實程度同實地拍攝無疑。要影靚相,當然要先裝身,遊戲內設有塗裝編輯器,可自由為車身配襯不同的塗裝,設計獨一無二的外觀。
多個版本
今集「 GT Sport」設有多個版本,想一過手癮定隆而重之地收藏,總有一款適合。
基本版
GT Sport、初回特典 DLC(搶先 3款車套件包)
售價•$398

限定版
GT Sport、初回特典 DLC(搶先 3款車套件包)、特別版超值 DLC(搶先 8輛車套件包、 1百萬遊戲點數、 PS4個人造型、塗裝貼紙包、頭盔)、畫集、鐵盒
售價•$468

典藏版
GT Sport、初回特典 DLC(搶先 3款車套件包)、特別版超值 DLC(搶先 8輛車套件包、 1百萬遊戲點數、 PS4個人造型、塗裝貼紙包、頭盔)、畫集、鐵盒、車輛模型
售價•$858

下載版(一般版)
GT Sport、初回特典 DLC(搶先 3款車套件包)、預約特典 DLC( 500,000遊戲點數、動態主題)
售價•$398

下載版(限量版)
GT Sport、初回特典 DLC(搶先 3款車套件包)、預約特典 DLC( 500,000遊戲點數、動態主題)、限定版特典 DLC(下載版)(搶先 8輛車套件包、 1百萬遊戲點數、 PS4個人造型、塗裝貼紙包、頭盔)
售價•$468
撰文:劉耀祥
攝影:關永浩、 PlayStation
features@nextdigital.com.hk

    全站熱搜

    tvb4life 發表在 痞客邦 留言(0) 人氣()