施永青回應指沒有收到該老闆電話,但聽到同事受辱,也有些激動,認為業主態度有點過分。

中環人語

動真火 施永青:後生啲搵佢隻揪!

贊助商連結

地產經紀打交、追車、爆粗,見就見得多,最近網上流傳一段客人反爆粗鬧經紀嘅錄音,地產朋友個個瘋傳食花生。段錄音開頭係一個地產公司老闆,友善咁確認電話中經紀身份。跟住花生位嚟啦,該位老闆忽然大爆發:「我×你老母!我公司以後啲嘢你唔好掂呀!下次見到施永青我就××(一個動詞加數字)佢,同佢投訴!」

 


經紀解釋只是有客睇中老闆件貨,誠意出 offer,老闆聽到更嬲,「嗰個人有誠意?咁我有無話要賣呀?無喎!有客大×晒呀?冚家×!星期一我就俾電話施永青。」小宗就梗係問吓施永青,佢話無收到爆粗老闆電話,但聽到伙記受辱,都有啲火氣:「唔好講一個經紀,作為一個人,又問候人長輩、數臭別人全家,有啲過分。」
「經紀『嘍』業主放盤,搵食啫,唔使咁勞氣……我依家年紀大,無咁衝動啫,我後生嘅時候,『嘍』佢出嚟隻揪啦!」至於美聯老闆黃建業,劈頭第一句就話:「代理為做生意,俾業主粗口問候亦無可厚非。」不過佢都補番句:「有時啲業主太過火,用粗口鬧代理,代理亦習慣晒,打工仔為份工,捱鬧都冇法囉!」

美聯老闆黃建業認為,代理為做生意,被業主粗口問候亦無可厚非。

 

759賺得 1蚊得 1蚊
759阿信屋條數愈來愈走樣,已經係既定事實,最近見位於馬鞍山的分店,仲驚!三個六層高的貨架及兩個冷凍櫃,吉晒。見有人拍照,店員連忙「補貨」,不過只是找來一包包貌似洗衣液的貨品擺上貨架,但都填補唔到嗰種空虛﹗
問番阿信屋老闆林偉駿,他解釋職員係清空貨架,等一家本地批發商提供二百多款歐洲貨。佢話大半年前開始跟呢間本地批發商慎昌合作,其中一個原因就係慳皮,「因為他同我派貨落去,慳番啲運費囉。」
節流完就要諗開源,艱難咯!林偉駿話之前推出買滿五十元就有折扣的優惠,因為佢睇見每張單平均是四十幾蚊,所以想「引誘」師奶仔買多幾蚊。無計啦,而家競爭激烈,超市、零食店成行成市,林偉駿思維都要貼近啲師奶仔,賺得一蚊得一蚊,啱數!

759阿信屋營運走下坡已是既定事實,林偉駿惟有開源節流,希望挽回頹勢。

 

759阿信屋馬鞍山分店,三個六層貨架及兩個冷凍櫃全吉,老闆林偉駿解釋職員清空貨架,等一家本地批發商提供二百多款歐洲貨。
大媽伸手插褲袋
依家強國人有財有勢,早已經唔係東亞病夫,但文明程度有待改進。小宗老友近排去高級餐廳食飯,再聽到一單奇事。
話說 ICC間天空龍吟,嗰度消費閒閒哋都過千,啱晒班強國富豪做飯堂。有次有強國大媽入到來,覺得日本師傅煮得好味,竟然成隻手拉開師傅褲袋,再伸入去!原來係想塞錢落佢褲袋以示支持。
師傅認為係侮辱,當堂眼濕濕,其實佢聽到聲多謝已經好滿足,此乃文化之差異也!

強國人雖有財有勢,但文明程度有待改進。

據知該師傅覺得被侮辱,頓時眼濕濕。

聽聞有次強國大媽為「讚賞」師傅廚藝,竟伸手往師傅褲袋給錢,名副其實「塞錢入你袋」。

ICC的天空龍吟,消費動輒過千,適合一眾強國富豪。
(宗菁華)
centralman@nextdigital.com.hk

    tvb4life 發表在 痞客邦 留言(0) 人氣()