本身係深水埗區議員嘅民主黨袁海文(左)強調,「 DQ4」有權優先出選。

八卦陣

民主黨袁海文強調 DQ4優先出戰

贊助商連結

立法會宣誓風波令六名非建制派議員被 DQ,其中四席嘅補選,仲有大約半年就舉行。九西補選方面,青年新政游蕙禎早前喺 facebook透露「仍在商討考慮中」,又話有理念相近嘅人希望參選,會持續觀望,「不久的將來便知分曉」咁話。

 

 

劉小麗早前話如果青政派人出戰,佢傾向唔出選,令九西補選嘅候選人陣容再有變化。

至於劉小麗上星期話,如果青政派人出戰,佢傾向唔選,希望民主派以最佳陣容、每區統一出戰,奪回議席,又呼籲青政盡快披露人選,等民主陣營嘅支持者同政團早日商議,凝聚共識。
曾經表示積極考慮參選嘅民主黨袁海文話,最重要係民主派守住被 DQ嘅席位,強調「 DQ4」有權優先出選,如果小麗唔選,會尊重同支持協調機制,似乎唔包梁游在內。佢又話民主黨未開始討論補選事宜,會繼續爭取黨內支持同做好目前工作。
有傳保皇黨喺部分選區已經協調好人選,例如九西好大機會由民建聯鄭泳舜出戰。不過非建制陣營想協調都唔容易,袁海文目前知名度一般,而冇對手下通過黨內初選嘅民協馮檢基都磨拳擦掌,加上如果青政真係有人選嘅話,三方人馬隨時各不相讓。
錢志健報名選山頂議席

錢志健(黃圈)星期一報名參加山頂區補選,《壹》仔上期訪問過嘅「民主老人」周漢華(左一)同細黃伯夫婦(下排左二、三),都有到場支持。

區議會中西區補選星期一截止提名,原本葉劉選舉癮起,想出戰山頂區,不過上星期都係彈弓手唔選,令呢區嘅保皇黨候選人,只有做過教育局政治助理嘅自由黨楊哲安。
至於民主派,本身係資深對沖基金經理嘅「 2047香港監察」召集人錢志健,決定親自落場,星期一正式報名參加山頂區補選,話反對自由黨連續十八年嘅霸權,希望俾山頂居民多一個選擇,又話會解決區內交通、野豬出沒等問題,亦會捍衞香港核心價值。據了解,除咗大班、馬丁等人支持佢參選之外,上期《壹》仔訪問過嘅「民主老人」、退休鐘錶行老闆周漢華,都係錢志健嘅競選團隊成員。
查實錢志健早喺前年已經積極考慮出戰山頂區,不過最後都係由同屬「 2047香港監察」嘅陳樹滿參選。山頂區大部分時間都係自由黨地盤,雖然○七年公民黨陳淑莊成功當選,但一一年陳浩濂代表自由黨奪回議席,四年後仲大勝陳樹滿千五票連任。今次區議會補選錢志健披甲上陣,可唔可以爭取番陳淑莊嘅基本盤,甚至當選?
師徒裝上陣 葉劉容海恩心有靈犀

望真啲,原來葉劉同容海恩對鞋都好似同款,只係唔同色。

上個禮拜林鄭月娥推出任內第一份施政報告,新民黨主席葉劉淑儀雖然喺特首選舉中,做咗林鄭嘅手下敗將,但係輸人唔輸陣,當日佢精神奕奕咁去聽林鄭讀施政報告,仲著咗紫色套裝,配珍珠胸針。見到佢一身紫色,《壹》仔即刻諗起當年嘅大熱歌曲《葡萄乘淑儀》!
不過葉劉就話係因為好鍾意紫色,所以揀咗呢套衫,而咁啱得咁蹺,佢嘅好徒弟新民黨副主席容海恩,就同佢襯到絕,著咗紫藍色嘅西裝褸。《壹》仔以為佢哋夾過 dress code,師徒裝上陣,但係葉劉就話:「冇襯過㗎!可能我哋心有靈犀!」影相嗰陣仲攬實容海恩條腰。
葉劉就話,歡迎林鄭搞好基層醫療,同起街市等等,但林鄭明顯迴避政治議題,「或者佢希望咁樣可以營造較好嘅氣氛啦!」
鄺俊宇多謝屈穎妍團結港人
藥房貓店長「波子」,之前涉嫌整傷內地男童,一度被漁護署「預約拘捕」。事後有成七萬名市民聯署支持波子,佢上星期六終於平安歸家「復職」。波子得人支持,不過專欄作家屈穎妍,對事件似乎有其他獨特嘅睇法喇。
話說幫港出聲嘅 facebook page,引述屈氏嘅言論,話聲援波子嘅民主黨立法會議員兼元朗區區議員鄺俊宇,係「跨區鬧事」,又質疑:「如果投訴人唔係內地人而係香港人,事情仲會否咁發展?」
屈小姐抽水抽着火水,鄺神就話:「其實我都覺得公義係唔分區(域),多謝佢篇文團結咗香港人……如果投訴貓貓唔係內地人嘅話,其實唔關事㗎,無論佢係咩地方嘅人,如果佢咁樣去欺負一隻貓,都係唔啱嘅。」
鄺神仲叫大家寬恕屈穎妍,因為多得佢,大家先會罕有地唔分藍黃,團結一致撐波子。順帶一提,近日又有一隻貓店長「遲鈍貓」被「預約拘捕」,話說長駐沙田沙角邨藥房嘅佢,被指抓傷老婦。鄺神話貓貓係俾人踩親條尾,才出爪傷人。

鄺俊宇仲開 post俾網民留言支持波子。

鄺俊宇(右)聲援波子,被屈穎妍(小圖)話佢跨區鬧事。
撰文:巫不言
news@nextdigital.com.hk

    tvb4life 發表在 痞客邦 留言(0) 人氣()