曾蔭權之前保釋外出,個 page就出咗佢同太太用膳嘅合照,管理員真係普通市民咁簡單?( Support Donald Tsang專頁圖片)

八卦陣

支持當奴專頁 管理員唔認係舊下屬

贊助商連結

前特首曾蔭權涉貪案上月底喺高院開審,選陪審團嗰陣,有候選陪審員表明「唔太鍾意曾蔭權」,要求豁免,最終佢唔使做陪審員。唔好以為冇乜人鍾意當奴,其實佢都有一班忠實支持者,喺背後默默為佢努力。

 

 

專頁開咗未到一年,依家有近七千人 like咗,成績都算唔錯嘅。
( Support Donald Tsang專頁截圖)

講緊嘅係今年初建立嘅 facebook專頁 Support Donald Tsang,不時上載有關當奴嘅新聞,或者支持佢嘅評論文章,再留言為佢打氣。管理員似乎唔係一般粉絲咁簡單,因為之前當奴獲准保釋,專頁就貼上佢同太太曾鮑笑薇去餐廳用膳嘅合照,留言話「曾生曾太衷心感謝各位的支持與鼓勵」;曾太又曾經透過專頁發公開信,向支持者表示感激。
據聞,管理員其實係當奴嘅舊部屬,包括政務官,但唔知離開咗政府未。《壹》仔向管理員求證,對方先多謝提問,話盡快覆,感覺似係公務員作風喎。但估唔到之後佢哋回覆話只係支持者同普通香港市民,唔係公務員,至於點解支持當奴,佢話睇吓個 page幾十個 posts同幾千個留言就知道。雖然佢咁答,但直覺話俾《壹》仔聽,佢哋好可能係退休公務員。
嶺大生留「執葉」空櫈俾何君堯
何君堯嘅「殺無赦」言論持續發酵,上星期更有嶺大同學成立組織「嶺事館」,一連四日喺校內天幕廣場紮營,星期五又搞論壇,邀請校方代表同何君堯一齊討論言論、學術自由、民主牆等議題,不過何君堯就聲稱因公事拒絕出席。
嶺大同學於是留咗張空櫈俾佢,上面黐咗幾塊枯葉同一塊名牌,叫何生做「執葉律師」。何生喺論壇翌日開 Fb live,個樣冇乜事咁,但唔知佢見到張「執葉」空櫈嗰陣,塊面係咪好似啲枯葉咁黃黃哋呢?
至於嶺大校方,雖然派副校長莫家豪出席,不過論壇全程都係做人肉錄音機,唔係重複講佢係去「聽同學意見」,就係話「冇補充」。「嶺事館」成員潘嘉傑就問莫家豪如果以「個人身份」發言,認唔認同何君堯「殺無赦」言論,佢只係話可以私下傾偈喎。佢會唔會好似何「執葉律師」咁邀請同學飲茶,希望喺冇傳媒在場嘅情況下「暢談時政」㗎?

上星期五,何君堯(右圖)拒絕出席「嶺事館」論壇,嶺大學生特登留張黐咗枯葉嘅空櫈俾佢。

杏花邨水浸車場仲有車未拖走
八月尾颱風「天鴿」襲港期間,杏花邨成為呢場十號風球嘅重災區,一個地庫停車場因為大量海水湧入,裡面唔少名車浸到沒頂,搞到要報銷。《壹》仔最近重返現場,見停車場已經重開,平治、保時捷等十幾架名車都已經泊番入去。不過事隔個半月,停車場近入口仲有一架豐田車,到上星期先被拖走。
架豐田車表面充滿泥漬,被拖車拖走嗰陣仲有污水喺引擎流出嚟,真係陰公豬。雖然停車場內大致清理好,不過就未見有進行防洪改善工程,例如改裝防水閘。之前有架林寶堅尼超跑浸到變泥鴨,車主買咗全保,依家車場就未見有林寶蹤影。
有車主之前接受訪問,投訴港鐵仲未交代水浸原因同善後安排,亦未披露車場第三者保險條款,係咪包埋水浸賠償。如果遲啲一個唔好彩,再有好似「天鴿」咁厲害嘅颱風吹襲,導致又有車水浸報銷,一班車主都唔知點算。

停車場近入口一架滿布泥漬嘅豐田車,上星期先被拖走。

事隔個幾月,唔少車已經泊番喺停車場內。

「天鴿」襲港當日,海水不停湧入杏花邨停車場。(網上截圖)

當日唔少車主趕到現場,但已經救唔番浸到沒頂嘅愛車。(網上截圖)
五星黑旗賀國慶嚇親 madam
上星期十一國慶,人民力量嘅快必同十幾人,就帶咗份禮去「㷫一㷫」中聯辦。根據快必形容,其實黑布上面有八粒星,「左上角有五粒星,墜落咗有三粒星。」
跟住有位 madam就發出驚人言論:「譚得志先生,警察喺西區警署門外,發現你以及你團隊嘅成員,持有一張印有五星形狀嘅黑布,其相似程度令人聯想到係中國國旗,根據國旗法……」
Madam用喇叭講,仲愈講愈大聲,見快必唔應機,最後直情大嗌:「我依家向你發出一個警告!你可能已經干犯咗侮辱國旗罪!」仲話警方可能會起訴佢,要佢立即收埋支「國旗」。
佢哋就一路行一路嗌「打倒共產黨」,去到中聯辦出面,又被 madam警告多次。之後快必就將塊黑布掉入中聯辦內,問警察佢使唔使執番,點知班阿 sir就兩頭望冇人應佢,快必就話:「你當佢係國旗嘅話,你搵袁國強告我!」
到底支旗算唔算國旗?其實根據《國旗及國徽條例》,國旗規格第一點已經話「旗面為紅色」。不過快必都估警察可能真係會告佢,因為佢哋冇成本,但就可能喺下年三月補選後先會起訴。

十一反威權遊行,人民力量嘅快必帶埋五星黑旗,「㷫一㷫」中聯辦。

快必(圖)認為,警方有機會告佢侮辱國旗罪。
撰文:巫不言
news@nextdigital.com.hk

tvb4life 發表在 痞客邦 留言(0) 人氣()