羅老太非常好生養,育有六子三女,部分更相隔只有一年。

中環人語

鷹君六子 身世大揭秘

贊助商連結

眾所周知,鷹君羅老太(羅杜莉君)好生養,有六子三女,不過係咪個個親生就有疑雲。《壹週刊》早前找到羅旭瑞的出世紙,發現母親一欄填上的,並非「杜莉君」,而是另一個名字「李意奇」( Lee Yee Kee)。其父親是羅鷹石,報稱裁縫師( tailor)。羅旭瑞當時解釋,因為出世時香港被日軍侵佔,仍然淪陷,所以要登記另一個名字去取飯票;佢仲話羅老太的確係佢阿媽,珍珠都無咁真呀!

 

 

除了羅旭瑞的「母親」是「李意奇」之外,其餘申報時,母親一欄都是「杜素吟」。

小宗近日再取得羅旭瑞以外、其他部分兄弟姊妹的出世紙,發現母親一欄都是寫「杜素吟」(羅老太另一名字),而「父親」通通是羅鷹石。
睇番出世紙,羅旭瑞( 1944年)喺黃泥涌道屋企出世,三弟嘉瑞( 1947年)同四弟康瑞(1948年)都一樣喺呢度出生。到慧琦( 1949年)同五弟鷹瑞( 1952年),就轉咗喺助產士林女士申報的修打蘭街 2號出世。羅老太密密生,快到呢頭生完,嗰頭又再懷孕嘅極速境界!而除咗仔女出世地點,爸爸羅鷹石的職位都跟住「升呢」,由 tailor(裁縫),變成 grocer(雜貨商),到後來的 merchant(商人),愈做愈風生水起!照咁睇,其他兄弟的「父母」都名正言順,只有身於戰亂的羅旭瑞,爆出身世之謎,只能講句:唔好彩囉!
十姑娘「鳳梨酥」
已故何東爵士的長孫何鴻章,於上月離世,享年九十一歲。有辦你睇,族長不在,後代隨時因遺產鬥個你死我活。早排佢啲仔女已各自出招,登定訃聞確立地位;近日,輪到何鴻章堂姊兼情人、人稱「十姑娘」的何婉琪,及其跟何鴻章所生的兒子何東舜銘,有所動作。臨近中秋佳節,兩人向本刊送上六盒鳳梨酥。上次「大規模」送禮,已追溯到十姑娘自己搵人包裝的「沉寃得雪」茶葉。當時佢同賭王何鴻燊,因澳娛利益反晒面,爆到鑊鑊高潮鑊鑊甘。今次各位又不妨擔定櫈仔、買定花生等睇好戲!

中秋將至,十姑娘跟兒子何東舜銘送上六盒鳳梨酥。

對上一次大規模送禮,已是十姑娘與賭王因澳娛反面時,她送出特別包裝的「沉寃得雪」茶葉。
香港快運 符咒鎮艙
國慶及中秋長假期開始,廉航香港快運( HK Express)卻取消十八班航班,爆出大鑊嘢。不只受影響的二千多個旅客怨聲載道,還驚動政府兩個局長譴責,影響香港國際聲譽,今次真係失禮!
HK Express胡亂調動航班早有「前科」。小宗都聽到唔少朋友投訴,有個話航班本來下午四點起飛,點知延遲到晚上九點多!跟 HK Express櫃枱職員投訴,職員話自己只是屬於代理公司。
另一單仲離譜, HK Express擅自把大機轉為細機,令幾十人未能上機。小宗老友話上機時,竟然見到駕駛艙頂貼着一道黃色的符!他不屑地說:「揸飛機要靠嗰道符就死啦!」哈,想靠道符就鎮住個艙,呢個世界有咁廉價嘅風水布局嘅咩?咪慳得就慳!

友人在駕駛艙頂部見到貼着一道黃色的符,難道香港快運靠此保平安?

今年八月,香港快運有多名培訓導師及經理離職,導致機組人員訓練過程受阻,處理手法失禮香港。
海航駁通水喉
講開香港快運,十九大前夕,一直有傳佢母公司海航,因王岐山去向未明而水緊,搞到無銀行幫佢做短期債項融資。不過,愈來愈近十九大,海航都好似駁番通條水喉喇!最近海航同農發行就簽署戰略合作框架,其海南省分行,將向海航提供五年期、總額三百億元人民幣的綜合授信額度支援,建設城鎮基礎及空港物流設施咁話。話晒海航發跡於海南,當然要幫番鄉里。之前又話旗下海航實業( 521),喺收購新加坡物流公司 CWT單刁有阻滯,但海航實業近日公布已控制 CWT,持股達八成。唔通呢啲都係王岐山坐番穩嘅好預兆?

海航的香港寫字樓,有巨型關公像鎮場,又有其他風水布局,是否有助駁通水喉?

有指海航上週已提前償還三間銀行的 20多億元貸款,向外界派定心丸。
(宗菁華)
centralman@nextdigital.com.hk

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()