現任任太葉小慧(右)在金管局任職時已為有夫之婦,後來雙方離婚,不時見二人在中環超市買餸,或到哥爾夫球場歎茶,非常恩愛。

中環人語

經典中環人語

贊助商連結

短短一則《中環人語》,有時候爆炸力勝過一個封面故事,臨別之際,特選以下幾篇「啃」料讓大家回味。

 

 

九七年十二月,這則任總疑似「金屋藏嬌」人語刊登後,翌年任總與前妻分居。

九七年十二月,宗菁華收到闊太報寸,在太古城商場巧遇坐地鐵上來的任總,大聲嗌住佢幫襯買曲奇做慈善,誰不知任總如「偷食」般心虛急步離開,唔通任總在太古城金……後來揭盅,現任妻子葉小慧原居於太古城,任總九八年與前妻方少珍分居,並於二千年與當時為任總助理的葉小慧續緣。宗菁華當時依書直說,並無虛言,只是提出疑問,任總為何晚上在太古城出入而已。當時二人各有家室,甚為避忌,此人語一出,任總身邊友好隨即發功,以為宗菁華仲有未爆之黑材料也!
踢爆德國藍妹
九一年,廠佬羅富昌與德國佬到長洲食海鮮,叫了幾樽當時標榜「德國藍妹」之啤酒饗客,呢位老外𢱑晒頭,事關德國絕無產「德國藍妹」,招紙上亦找不到「 Made in Germany」字眼,原來此乃香港貿易行塑造出來之「德國」牌子;人語一出,此後「德國藍妹」標籤省減兩粒字,只稱為「藍妹啤酒」。都咪話唔勞師動眾㗎!

一九九一年十月廿五日刊登的《中環人語》。

藍妹啤酒由捷成集團監管,並於韓國東洋麥酒株式會社釀製,即是韓國產品。

羅富昌是永富容器創辦人,曾獲青年工業家獎,現已六十八歲,九一年與德國廠佬到長洲食海鮮,無意踢爆「藍妹」的真身。
中環寸嘴  Hong Kong is a Joke

楊國佳: Ric Choi小丑上身,我以 Donald Trump手勢糾正佢。

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。
中聯辦阿小明調返港澳辦,臨別時引用王菲歌詞、徐志摩新詩及蘇東坡詞,蘇東坡詞我就一竅不通,計我話小明不如實際啲告知,邊度東坡肉最好食,好似黃梅調《游龍戲鳳》曲詞咁:「官人,借問東坡肉何處有?」
乃念大家姓楊,臨別贈言予教育局局長楊潤雄,政府增五十億教育撥款,表面扶助啲失意教育家,因為數學博士唔應用數學,所以國教先至有前途,先有希望取得維穩基金撥款,但啱嘴型只有呢幾句:「不要爸爸,不要媽媽,只要國家。」
前個禮拜去「廚魔」歎分子料理,其實識呢位工程師出身嘅大廚於微時,以前佢管家族生意兼做「廚魔」,專搵啲朋友仔來做白老鼠,我哋啲 cheap友又唔介意俾 set lunch價錢,又有新菜試食。今次個 Sommelier Ric Choi真係搞笑,見佢著三件頭西裝以為係老總或者係鋪頭十個拍乸之一,解釋個 menu及 wine pairing時竟然好調皮咁話:「我知自己係小丑,娛樂吓大家啫。」我即刻使出 Donald Trump嘅手勢糾正佢:「你啲酒經都得得哋嘅,假以時日,充吓砲艇扮到 expert咪拋到人囉,話晒識得神化啲細酒莊出產變成 up& coming嘅酒。」雖然呢首歌暴露咗我實際年紀,送首 Bee Gees《 I started a Joke》你聽,歌詞加咗料( I started a joke which started the whole world crying, but I didn't see that joke was on my home town HKG too)。

呢道菜叫「 ode to the dragon」,創意來自李小龍。

只可以睇唔可以用嘅碟,有成六十幾年咁耐,寫明 Decorated in Hong Kong。

呢道菜叫「 child's play」,用飛行棋做托盤,令人有兒時回憶。

被老總黃麗裳邀請寫食經,其實我出發點是以國際視野批評所謂飲食天堂之弱點;好似香港旅遊景點成日話唔夠;市建局嘅波鞋街及觀塘鵝蛋又走數,之前咩雀仔街、囍帖街,通通閹晒冇特色,市建局揸弗人又龜縮唔出來交代,好似啲公公咁,俾人閹咗,自己就以閹人為樂,香港不是一個 Joke,是什麼呢?
黃浩博士都識貨想我繼續寫,不過稿費都唔夠我打賞俾啲氹得我開心嘅飲食從業員啦!本少爺封筆唔封口,唉,此乃滅聲之悲哀!
最受歡迎人語


昔日還舉行 Focus Group的年代,最受讀者歡迎的一則人語,是李國寶在半島酒店給予泊車仔廿蚊貼士,讀者認為「學到嘢」,原來闊佬都只是廿蚊貼士咁話。
誰是宗菁華
宗菁華本在將軍澳上班,抽空游走中環,掹衫尾跟老友出入高級私人會所,多得基金佬、銀行佬、富豪身邊八卦公以及高級食肆之 captain及 bartender過料,始可耳聽八方,《壹週刊》賣盤了,宗菁華在此告別,江湖有緣再見。吊癮的話,睇 Central Gossip Facebook頂住癮先。
(宗菁華)
centralman@nextdigital.com.hk

    文章標籤

    中環人語 經典中環人語

    全站熱搜

    tvb4life 發表在 痞客邦 留言(0) 人氣()