坦白講

穿上黃衫 由深圳到廣場

贊助商連結

雨傘運動三周年。三年間,香港政局發生很大變化,有人對社會失望,有人被無力感侵襲,亦有人仍傻傻地做着自己相信的事。六十一歲的王婆婆住在深圳,兩年半來,每星期有兩、三天都會來到公民廣場外的馬路,用膠紙在地上貼上抗議字句。王婆婆,我們謝謝你的堅持!

 


我而家住喺深圳,每星期有兩、三日,我都會過嚟公民廣場出面,用膠紙拼貼成我嘅抗議字句。啲膠紙要剪成細細條,一條條咁黐,如果唔係會俾人一次過成條搣走,咁就白費功夫,雖然我喺度黐嘅嘢成日都會俾人清走。
我好鍾意寫打油詩,通常我寫嘅抗議字句都係我作嘅打油詩。我會寫嘅議題有好多,好似劉曉波逝世、反一地兩檢、開放公民廣場等都有。由屋企過到嚟金鐘,要搭兩個半鐘頭車,我要五點幾起身,夜晚返到屋企都十一二點,好攰,嚟一日我要喺屋企瞓番一日先得。日頭黐完膠紙,夜晚有時我會去圖書館上網,睇啲喺大陸睇唔到嘅香港新聞,或者有集會,我又會去撐場。
雨傘運動之後,我已經喺度黐咗兩年半。每次過咗關,我先可以換番呢件寫着標語嘅黃衫,驚過唔到關。我都驚好似李波佢哋咁「被失蹤」,所以都唔可以成日上鏡,我唔想落唔到嚟香港。我唔驚死,我可以為咗抗爭而死,總好過癌症復發死。我四年前患過癌,而家都未過復發高危期,而家心態係做得一日得一日。
我喺香港土生土長,年輕嘅時候喺奧地利同美國住咗十幾年,睇到人哋係好願意去抗爭。以前我唔係好理政治,但六四嘅時候,見到北京嘅學生咁樣出嚟爭取,點亮咗我嘅心。十三年前我喺外國返咗嚟,但香港嘅租實在太貴,我就喺深圳買咗個單位住。我係好愛國愛港,好希望可以貢獻俾香港同中國。我曾經都相信共產黨,但係我發現佢哋係講一套做一套,慢慢失望,直至人大八三一落閘,我就完全死心。
二○一二年反國教嘅時候,我被學生感動到,嗰時都有嚟佔領。雨傘運動嘅時候,我喺度總共瞓咗四十八晚。好多行動我都有衝,但警察都冇拉我。見到啲年輕人入獄,我好心痛。佢哋咁細個,就為咗個社會,犧牲咁大,點解我哋嘅政府要咁對佢哋?
我知好多人話我好傻㗎,而家都仲撐黃傘。但我只係想話俾人知,仍然有人係堅持緊。
撰文:鄭靖而
攝影:葉漢華
news@nextdigital.com.hk

tvb4life 發表在 痞客邦 留言(0) 人氣()