五十多歲的蕭太指:「我年紀都唔算太大,同埋我真係好鍾意講嘢㗎!」她因此享受創業,日日落鋪與客人吹水聊天,也希望以自己小小的力量,為這典型死場帶來生機。

壹盤生意

無懼死場 連租十四鋪 打造百貨街

贊助商連結

北角商場「城市金庫」最為人熟悉的,莫過於是由歌手麥浚龍父親麥紹棠旗下公司於一二年收購,劏成超過三百個鋪位出售的背景。今年四月有十一名小業主不滿發展商及地產代理作失實陳述,指說好的「麥浚龍宣傳」並無落實兌現,入稟高院要求解除買賣合約及索償;剛過去的八月,更有一名劏鋪業主持貨四年,忍痛以買入價三成沽出,成為該商場蝕讓最大的個案。
於此業主連聲說後悔、投資者聞風色變的經典死場內,卻有一名小女人默默幹起大事來;做了三十年零售、年過五十歲的楊秋霞(蕭太),心口掛着個勇字進駐「金庫」,由一五年只開一間鋪變成現時租下十四連鋪、一手一腳打造起百貨街,雖然利潤不高,卻賺盡人氣。「我算較早嚟呢個場,都希望成個商場可以做得起,呢啲唔知係咪叫使命感,總之想大家百花齊放。」

 


拗贏老公 勇闖死場做戰士
從商場大門進入,直落一條電梯就能看到「根本家族」的身影,也聽到楊秋霞(蕭太)聲線洪亮地跟客人聊天。年過五十歲的蕭太有兩名子女,其中一名已大學畢業,擔子總算輕了一半,卻於此時被公司勸退。「我係做前線嗰邊,但公司可能覺得我紅褲子出身,學歷又唔高,開始想慢慢淘汰我哋。」談起往事,蕭太依然聲線開朗。「機緣巧合下我朋友嘅哥哥喺呢度有個鋪位,肯以低價一千蚊租俾我。」心動的她,開始構思起第二門事業來。
「我老公話呢度真係太靜,做生意要有嘅五個 P其中一個就係 people(人流)。佢話呢度人又無,地方明顯唔啱,點解唔搵街鋪?」在百麗集團打滾過的蕭太,卻篤信自己的眼光。「佢又無諗過,街鋪租貴,如果熱天冷氣壞咗又煩,電費又勁,我話唔得!街鋪我輸唔起。」經過一番爭論後,最後老公也不敵蕭太的堅持,支持她在此建立王國。
過了身邊人首關,也得要戰勝人煙實是稀少的恐懼。「開鋪時個場嘅空置率應該有百分之八十至八十五,基本上連餐廳都無間。」連日訪問,也總見到數個熟客的身影經常出現,從小到大也住在附近的楊小姐便是其中一個。「呢個場轉手過好多次,以前有好多學習中心,又有好多人租鋪當貨倉用。」蕭太手舞足蹈地形容:「好多人開鋪發現無人流,就愈開愈晏,再由日日開變成只開幾日,慢慢就會放棄鋪頭只交租,出去打工,其實呢度唔係完全無客人,但個關係就如雞同雞蛋,啲人落過嚟無嘢行就唔會再落。」因此「根本家族」開業後全年無休,連農曆新年也照開鋪,就算生意做得少,也總可跟客人「打牙骹過日辰」,到後來才改成一週休息一天。

眼見只賣家品存有隱憂,蕭太因此兼賣零食、時令產品如雨傘及燈籠等,換貨速度快,以增添客人的新鮮感。

各款日本可愛造型的面膜售六十九元一塊,蕭太指:「人哋可能一入貨就入好多,變相有好多死貨,我則少少哋咁入,試水溫得嚟又可以好快賣清。」
業主支持 開十四鋪組百貨街
走進其自製的百貨街,雖非整齊無誤,但至少看到每間分鋪也標記着「日本放送」、「清潔用品」及「可愛精品」等不同專區;蕭太指是參考了日本 Daiso。十四間分鋪,由十二個業主持有,為了用盡空間、在地板貼上色紙以打造百貨街的一致性,蕭太分別向每個業主介紹自己的理念,以獲得他們的同意。「佢哋好支持我咁嘅形式,開頭我只簽一年約,第二年有啲業主都主動同我傾,話唔加租,話撐我。」大家有着同一目標,就是想「金庫」起死回生。「同業主關係真係好!佢哋仲會帶朋友落嚟買嘢。
「一開始我會一個月飛兩次日本,搜羅有趣實用嘅貨,最重要係呢區街坊有一定消費力同要求。」當中以日本製的家品、內衣褲最受歡迎。「但家品譬如係牙籤筒,你唔會隔兩日就買一次。」看到這個隱憂的她因此兼賣零食、日本青森王林蘋果及金奇異果等,前者廿九元一個、後者廿三元一粒;不少街坊食過翻尋味,會主動聯絡蕭太大量訂貨。時令產品如雨傘及當季水果因此意外撐起了「根本家族」,佔了整盤生意的七成。

對比一五年時,蕭太指現時出租率已大大提升,可惜仍見吉鋪處處。她認為:「下層鋪頭難以喺上層宣傳,無咩資訊可俾人知道下面開咗鋪,好多人開咗後可能坐一日都無生意,最後只好離場。」

蕭太觀察到街坊們有一定消費力及要求,因此引入日本及韓國水果出售並接受訂貨,結果反應很好,中秋節前夕更會提供果籃服務。
捱義氣食死貨 意外熱賣五千部
曾風靡一時的「 Shake n Take 3」水樽搾汁機,熱賣源於蕭太的好心。「我其中一個供應商話有批貨到香港,本來賣俾分銷商,但因為九龍迷你倉場大火,佢哋無錢找數。批貨返唔到上大陸,供應商想我幫手散貨。」更提出不收運費、賣出後才計數的條件,着蕭太幫忙,最後她以定價六十九元,開始在鋪面放售。「有個客買完俾雜誌發現,佢一報導就引起網民追捧,最後賣出五千部。」
日本貨幫鋪頭「省靚招牌」,但成本始終較高。蕭太指現時多賣了內地貨,但絕不淘寶,堅持直接向廠商入貨。「要有質量保證,我一定會搵供應商,呢個係我一直嘅宗旨。好多客話淘寶咩都有,但淘完收貨後有一半有問題。我做零售,更應該對客人負責。」眼見蕭太熱衷與客人打成一片,無論他們買與不買,也願意把產品包裝拆開細心講解。「我本身好鍾意買嘢,以前我會買一大堆之後送俾人或擺喺一角,依家有得賣出去又有人欣賞,幾好!」女人仔的喜好和心願,其實很簡單。

「有間醫院向我訂咗六十幾部,有個客人係澳門銀行嘅人,佢向我訂咗足足七百部。」媒體報導令原先是死貨的「 Shake n Take 3」水樽搾汁機熱賣,現時以正價八十九元放售,仍不時見有捧場客。

「本身都知道呢個場,但唔會嚟地庫,係因為買搾汁機先落嚟。」客人賴先生另有訂購過數箱日本當紅的金槍魚杯麵,現在也有叫蕭太幫忙搜羅綠茶杯麵讓他試試。
創業錦囊

日本家品算是店鋪的成名作,蕭太以往每月會飛兩次日本入貨,但由於成本實是太高所以只好減少次數,店內日本貨的比率也由三成減至一成。

以賣日本貨起家的蕭太指當地人很講求規矩,因此批發中心行會員制,不會亂讓閒雜人等進內,行外人要入會並非易事。「我有朋友喺當地做時裝,佢本身係會員有證件,可以帶一個人入去。」她指該批發市場鄰近心齋橋,不少本土的個體商戶也在那邊入貨。「入過一次貨後就要向佢哋提供我公司實體店嘅照片、卡片同商業登記,證明從事相關生意,再親自拎去日本辦會員證,成功做會員後就可以享有折扣優惠。」
開業資料
15年 12月(一間鋪)
16年 4月(十四間鋪)
租金上期:$15,600
按金:$15,600
入貨:$250,000
裝修:$60,000
總投資:$341,200
營業資料
17年 8月
營業額:$100,000
租金:$15,600
入貨:$50,000
雜費:$3,000
盈利:$31,400
撰文:黃綺敏
攝影/攝錄:關永浩
ed_bn@nextdigital.com.hk

tvb4life 發表在 痞客邦 留言(0) 人氣()