何君堯(左一)同曾樹和(右二)嘅「殺無赦」言論或涉刑事,陸大狀話最好交由警方調查。

八卦陣

何君堯殺人論 涉違四宗罪

贊助商連結

建制派立法會議員何君堯,星期日一手一腳搞咗個文革式吶喊大會,要求港大革走戴耀廷,但就騎呢演變成佢同屏山鄉委會主席曾樹和話要對港獨人士「殺無赦」,第二日仲死撐只係「真情表達」。

 

 

身兼行政會議成員嘅資深大律師湯家驊認為,何君堯身為律師應自重。

根據法例,任何人串謀謀殺他人,以及喺香港境內勸說或建議別人謀殺他人,隨時觸犯「串謀或唆使謀殺」罪,可判處終身監禁;資深大律師湯家驊都話,何嘅言行或觸犯《公安條例》第 17b同第 26條,經公訴程序定罪,最高可判處監禁五年。
陸偉雄大律師同《壹》仔講,何曾二人亦有可能涉及刑事恐嚇罪,但要視乎佢哋講嘅目的同意圖,因為中國人講「殺」,未必真係要殺人。例如有人話要殺一儆百,都唔係真係要殺人,所以最好都係由警方調查。
戴耀廷當晚已經喺 facebook回應,指何講嘅嘢超出言論自由底線,「警方、律政司、特首會否有所行動?」本身係律師嘅何君堯可能知驚,第二日澄清講「殺」係嫉惡如仇、真情表達,唔係要殺人。記者打過俾曾樹和,佢一聽到係《壹》仔就收線。
攝影師被箍頸 警察冇影
吶喊大會當日成班人喺添馬公園上台「文革式批鬥」戴耀廷,台下就發生一段小插曲。報稱自由攝影師嘅王先生拍攝期間,被集會人士粗口辱罵兼箍頸,仲一路被大約十個人追住趕走,不過警察就一直唔見人,王先生事後大嘆無奈。
佢同《壹》仔講番事件起因,話見到一位紅衫人士幾得意,就影咗一張相,「佢就過嚟問我邊個單位,之後就用力箍住我條頸,箍咗大約三四十秒。」混亂間佢仲被集會人士圍住鬧係漢奸、港獨、黃絲、臭罌出臭草。
王先生當時表明只係普通市民,冇立場,但仍被不停指罵,中間仲夾雜唔少粗口添。好彩佢最後都冇受傷,但就話之後有集會人士一直監視佢嘅一舉一動。可憐嘅王先生慘被箍實走唔甩,佢話警察全程冇影,直至有記者被阻礙拍攝先出現調停。

王先生被紅衫男大力箍實走唔甩,但當時沒有警察現身阻止。

何君堯吹雞,吸引一班好有「質素」嘅支持者,當日圍罵攝影師,粗口橫飛,仲出手阻止拍攝。
鄺俊宇去信袁國強 促覆核植物人案
上星期《壹》仔報導咗一宗法庭案件,六十四歲男子關德華,上年十月喺旺角弼街泊車嗰陣,被前方貨車司機指責泊得太貼阻礙搬貨,雙方爭執。之後貨車司機出拳襲擊關,到佢昏迷地上仲繼續被打,最後被打到變成植物人,至今仍喺廣華醫院留醫。
毆打關德華嘅貨車司機,最終只被判傷人罪成,而唔係較嚴重嘅蓄意傷人罪。因為法官認為被告只係一時氣憤,唔係有意圖令事主嚴重受傷,判監二十二個月。但受害人女兒阿桐覺得判刑太輕,對父親唔公平,「係無可能,二十二個月,令人哋下半生就咁瞓喺床上,好唔公平。當時我爸爸已暈咗,被告仲要打佢要害,咁都叫做無意圖傷人?直頭係想殺人啦。」
事件引起極大回響,有市民覺得判刑唔能夠反映案件嚴重性,於是喺網上收集市民簽名,要求司法覆核,至今已有八千幾人簽署。民主黨立法會議員鄺俊宇,亦認為判決有問題,除咗聯絡受害人家屬,仲已經去信律政司司長袁國強,要求覆核呢宗嚴重傷人案嘅刑期。

鄺俊宇聯絡過受害人家屬,並已去信袁國強要求覆核刑期。

受害人一家覺得判刑太輕,女兒阿桐(中)認為對父親唔公平,形容對方:「直頭係想殺人啦。」
協會五日收四十流浪貓 政府懶理
動物受虐待嘅事件幾乎每日發生,政府一直都係愛理不理。有網民仲話試過報警,警察居然答:「一隻貓咋嘛!」上個月五日內兩個颱風吹襲香港,一般人留喺屋企聽到風聲都驚會吹爆玻璃,無家可歸嘅動物就更加悽慘。
好彩香港地仲有班有愛心嘅義工,有八十個空姐空少,就輪流喺香港拯救貓狗協會當值,五日內接收咗三十隻貓 BB同十隻貓媽媽。義工 Connie話:「佢哋全身濕晒,有啲小朋友係已經見到佢哋個眼簾走咗出嚟,要即刻治療感冒。如果佢哋身體咁弱,我哋都希望唔好即刻放番佢哋出街。」好彩依家四十隻貓,大部分已經搵到頭好住家。
不過,就算有瓦遮頭嘅動物,打風落雨都好慘㗎!好似位於流浮山嘅拯救遺棄寵物中心,入面四百幾隻狗仔因為水浸,游水游咗成個幾鐘。雖然全部大步𨂾過,但部分狗仔陸續患上皮膚病,中心急需人幫狗仔沖涼。網上呼籲後,最後唔單只有八十人嚟幫手,仲有市民自掏腰包租水車,四百幾隻狗仔終於乾淨晒!

香港拯救貓狗協會嘅義工,大部分都係空姐空少。

颱風「天鴿」釀成水災,流浮山一群可憐狗仔被困。
( RCAP拯救遺棄寵物中心 facebook圖片。)

部分協會接收嘅貓 BB,只係得幾日至一兩個星期大。
撰文:巫不言
news@nextdigital.com.hk

tvb4life 發表在 痞客邦 留言(0) 人氣()