坦白講

爸爸教我踩單車

贊助商連結

回想起童年,絕大部分人腦海總有踩單車的畫面,又會想起一些父母在背後推車,跌跌碰碰的回憶。
黃曉生 Nelson, 39歲,是一位全職爸爸,育有一仔一女,起居飲食、返學接送全由他打理。
他深信單車能帶給小朋友自由與歡樂,不單決心教懂仔女踩單車,更不收分文開班教其他小朋友踩單車,現在已教懂超過三百個小朋友。他希望小朋友多玩樂,留下珍貴又值得回憶的童年;他亦體諒作為爸爸既要賺錢又要顧家的辛酸,故想助他們一臂之力,成為大家的爸爸。

 


生活流流長好悶,我鍾意做一些事令自己和大家開心,教人踩單車就係其中之一。我好好動,玩好多運動,不過唔會盲舂舂咁死練爛練,鍾意研究當中的竅妙,令件事事半功倍,亦會好快上手。
單車,結構好簡單,兩個轆、一個軚,有合適的地方就可以踩。踩單車,感覺自由自在和歡樂,踩得叻仲可以環遊世界,或者小學畢業,同同學踩單車都會好開心,將來係佢哋回憶嘅一部分。我同好多爸爸一樣,開始時只係教自己嘅仔女。
每日我都會帶對仔女落屋苑球場玩。幾年前,有個小朋友街坊見到部單車,好主動話想學。我嘗試教吓佢。踩單車唔難,唔可以太心急,一開始要先學識平衡,再俾少少速度,架車自自然然就會去。第一次教人,佢好快就上手,仲喺球場踩到幾個圈。佢媽媽後來仲傳信息俾我,多謝我,仲話好感動。
望住小朋友喺單車上嗰份自信、嗰個開心樣,令到我自己都好滿足。我喺度諗,自己呢方面係唔係特別勁?好多人識踩,不過唔識教。既然我有咁嘅能力,又有時間,係唔係可以開班教吓?大概一年前,朝早仔女又返咗學,又少人打波,我喺屋苑球場開始免費教踩單車。我仲準備咗幾架單車,借俾佢哋練習。間唔中我鍾意一些好型嘅事,拍吓片同大家分享,一傳十下,呢個暑假都教識咗唔少小朋友。其實,教小朋友最緊要有步驟,等佢跟住慢慢撐撐吓。好多媽媽又驚小朋友會跌,喺背面扶住或托住。其實唔使,同教仔一樣,要學識適當時要放手,小朋友自然理解。
太太知舊單車就快爛,仲二話不說買新單車俾我教車。太太嘅認同係我的原動力。幾年前,我轉做全識爸爸,聽過唔少閒言閒語。不過,我倆知道,陪伴仔女成長先係最重要。太太係老師,收入足夠應付家庭開支,我決定全職照顧對仔女。我的童年唔係與父母同住好孤單,亦令我想做一個好爸爸。我仲決定唔請工人姐姐,以身作則教好他們,他們做功課時,我不會假手於人去洗廁所。香港壓力大,父母身不由己。但小朋友好快長大,需要你陪伴的時間唔多,更需要你用心了解。我希望送一段開心時光俾他們,記得以前有個叔叔教佢踩單車。當然,父母有空閒自己教,因為你個小朋友永遠會記得,係爸爸教佢踩單車,呢個回憶係用錢都買唔到嘅。
撰文:黎雅婷
攝影:葉漢華
news@nextdigital.com.hk

文章標籤

全站熱搜

tvb4life 發表在 痞客邦 留言(0) 人氣()