位於巴域街嘅唐樓,一半單位已被拆窗。

八卦陣

舊區收樓奇招──拆窗

贊助商連結

市建局最近喺土瓜灣嘅重建項目,終於向業主發出收購建議,《壹》仔聽聞「收樓專家」田生地產同時都有向呢班業主埋手。睇番田生網頁,佢哋收購緊或成功收購嘅項目,加加埋埋有五十五個,當中唔少項目仲係一次過收幾幢樓。

 

 

永隆街十一號全幢已經被收購,大部分單位天花都有石屎剝落嘅情況出現。

《壹》仔去睇過田生收返嚟嘅樓,發現部分未成功收購或者等緊重建嘅唐樓,被人拆晒窗。例如超過六十年樓齡嘅長沙灣永隆街十一號,附近街坊話有人偷走晒啲窗,令「騎樓」位日曬雨淋,仲不時有陌生人上樓過夜。單位入面嘅情況真係幾差㗎,抬頭就見到生銹鋼筋、布滿青苔或者石屎剝落嘅天花,地下就有積水。
香港測量師學會前會長何鉅業話,雖然建築物唔會有即時倒塌危險,但雨水同潮濕天氣令到鋼筋生銹,對結構造成風險,「如果佢長時間潮濕同有水滲入去地板、橫樑等,令到入面嘅鋼筋持續生銹,導致石屎剝落,就會影響結構嘅穩固性。」唐樓嘅「騎樓」部分就更危險,因為「露台下面無柱嘅支撐,只係靠橫樑。」如果長時間缺乏維修,就有可能導致倒塌。
田生回應話需時查核,暫時未能提供資料。
官籲袁國強守護竹林禪院
《壹》仔早前報導,懷疑有人圖謀荃灣芙蓉山竹林禪院內,價值十幾億嘅骨灰龕位,搞到寺廟烏煙瘴氣。其實較早前,已經有其他廟宇僧人入稟法庭,要求律政司同民政事務局局長介入管理禪院。
上星期法庭頒布入稟狀判詞,認為律政司身為慈善基金嘅守護者,應該跟進禪院幾項問題。例如慈善組織歡喜心慈善會有限公司同竹林禪院無關,但就以竹林禪院做會址;曾經有十幾名黑衣大漢喺禪院出現,阻止僧侶同信眾入內,又阻止管理成員召開管理會議,怕有人想謀奪一筆九千萬嘅基金;以及有內地僧侶騷擾老和尚屋企人等。
竹林禪院創辦人融秋和尚孫女龐孟婷同《壹》仔講,對於法庭嘅呼籲覺得好開心,希望當局能夠徹查法官所提到嘅種種問題,重組負責管理竹林禪院嘅曼華堂,令禪院可以盡快重回正軌,繼續幫助老弱貧窮,「而做壞事嘅惡人,應該受到應有懲罰。」另外,亦有其他寺廟嘅僧人,覺得今次法庭判詞好正面,認為律政司介入,可以解決竹林禪院嘅紛爭。

十幾名黑衣大漢之前喺禪院出現,阻止管理成員開會,又唔俾僧侶同信眾入內。

龐孟婷希望當局徹查法官提到嘅種種問題,令禪院重回正軌,繼續幫助老弱貧窮。
李梓敬加入「港獨」標語大戰
大專民主牆「港獨」同「反港獨」標語大戰,由中大燒到其他院校。九月起喺城大讀法律博士( JD)課程嘅自由黨李梓敬都參戰,上星期五喺城大獻出第一次,貼「香港是中國的一部份」標語。佢跟足規矩喺標語度寫上姓名、張貼日期同學生編號,仲貼到民主牆最底部,話唔遮住人哋嘅嘢喎。
李梓敬喺 Fb live話民主牆應該容納唔同聲音,「唔係話你學生會就大晒。」《壹》仔問佢覺得學生會點大晒法,佢講番有大陸學生撕走中大民主牆嘅港獨標語,俾學生會成員阻止,第二日再有人貼標語上去,又有人話唔可以貼喺其標語上面,質疑準則喺邊。講到咁複雜,其實《壹》仔覺得,準則都係標語唔會被隨便撕走或者遮住啫。
佢又投訴自己嘅標語第二日已被撕走,部分新貼上去嘅標語冇寫學生編號、張貼日期等,話如果貼標語嘅人公民抗命、唔怕違憲,應該提供番呢啲資料,有人捉佢哋就捉咁話。不過憲制文件係用嚟約束政府,一般市民講嘅嘢牴觸《基本法》,又會有咩法律後果?唔知佢老師梁美芬有冇「答案」呢?

九月起喺城大讀法律博士課程嘅李梓敬,上星期五喺民主牆張貼反港獨標語。(李梓敬 Facebook短片截圖)

李梓敬將標語貼到民主牆最底部,話唔遮住人哋嘅嘢。(李梓敬 Facebook短片截圖)

憲制文件係用嚟約束政府,一般市民講嘅嘢牴觸《基本法》,會有咩法律後果,唔知老師梁美芬答唔答到李梓敬呢?(《蘋果日報》圖片)
民主牆風波教大學生有話兒
教育大學呢排成為全城焦點,皆因佢個民主牆不停俾人貼完又貼,先出現奚落教育局副局長蔡若蓮喪子嘅字句,再出現冒犯已故諾貝爾和平獎得主劉曉波同遺孀劉霞嘅標語。再貼標語嘅人認真高招,考驗校長有冇大細超。
誰不知,正中下懷。坊間批評教大校長張仁良,對兩件事抱唔同態度,係雙重標準。教大同學 Joshua就話:「我認為做嘅人行為(道德上)當然唔恰當,但校長嘅反應亦未免太大,喺兩件事上,校長嘅回應好唔同,處事不公。」對於民主牆應該點用, Joshua認為:「大學係有言論自由嘅地方,每個人都有自己意見,人哋點睇係另一件事。」
同學 Zac就話民主牆係學生發表意見嘅地方,但同學都要自我監控。佢認為校長喺兩件事處理上不一,「係雙重標準,一定同政治有關,而且我都唔贊成學校查閉路電視。」
內地生劉同學就覺得肇事者行為不當,「太過分,太偏激,講嘢都要有規矩,唔係咩都可以講。」佢仲話呢啲人唔符合正常嘅道德,好傷人心喎。雖然至今仲未查出到底邊個係真兇,但教大嘅同學仔當然唔願意相信「兇手」係自己人啦。

教大民主牆上「恭喜」蔡若蓮喪子同劉曉波離世嘅字句早被拆走,但風波就仲未平息。

同學 Joshua認為校長就事件嘅反應太大,而且處事不公。
撰文:巫不言
news@nextdigital.com.hk

    tvb4life 發表在 痞客邦 留言(0) 人氣()