葉劉淑儀面面俱圓

贊助商連結

快將六十七歲嘅葉劉淑儀(葉劉),現為新民黨主席,亦都係香港首位女保安局長。出身政界嘅佢,其實同娛圈都有密切關係,佢媽媽華彩鳳原來係電影明星,同吳楚帆拍過戰後首套粵語片《郎歸晚》。遺傳咗母親嘅表演因子,葉劉三年班已經攞過校際戲劇比賽「最佳女童角獎」。喺一四年,佢仲跳出埋政界,應舊同學俞琤邀請,為卓韻芝執導嘅電影《失戀急讓》,飾演區議員「葉劉淑之」。

近日,葉劉接受電視台訪問時,就大呻平時喺屋企係鵪鶉,成日被囡囡葉榮欣「蝦」,查實佢o氹小朋友都有一手。日前,東姑去咗ifc睇部戰爭片,巧遇葉劉兩母女。當日一身行政人員look嘅葉劉,未入場前猛咁同個男童吹水,二人有講有笑,毫無隔膜。吹到咁上下,葉劉仲答應同小朋友影番張合照留念,非常親民。之後,葉劉就跟埋阿女入場睇戲,望落都幾溫馨o架。

而出過唔少書,又寫過唔少專欄嘅葉劉,最新著作《葉劉的地球儀》,早排仲入圍咗「香港金閱獎2017」。上周,佢出席該獎嘅記者會,就撞到近排人氣鼎盛嘅李家鼎(鼎爺),事緣對方嘅處男食譜《鼎爺廚房》都有份入圍吖。而聲稱爭人兩百幾本書債嘅鼎爺,就即場送咗本簽名食譜畀葉劉做見面禮,葉劉梗係即刻喺社交網攞威兼「呃like」啦!

日前,葉劉一身smart casual打扮現身中環ifc戲院,加埋副黑超,望落成個女版謝賢咁chok吖。

 

畀完錢買飛,葉劉即被一個男仔捉住吹水,雖然兩人相差幾十歲,但都傾到眉飛色舞。

 

差唔多夠鐘入場,個男仔要求阿媽幫手同葉劉影番張合照,葉劉當然冇托手踭,夠晒親民。

 

今年佢憑新書《葉劉的地球儀》,入圍有「出版界奧斯卡」之稱嘅「金閱獎」;而上星期記者會當日,佢仲同有份入圍嘅李家鼎,並肩合照,老友鬼鬼。

 

鼎爺仲即場送咗本自己都冇嘅食譜《鼎爺廚房》,畀葉劉返屋企細味一番,未知葉劉有冇book枱,去試鼎爺下月主理嘅私房菜呢?

全站熱搜

tvb4life 發表在 痞客邦 留言(0) 人氣()