謝霆鋒賀完老竇生日即開工

贊助商連結

近排忙拍《鋒味》海選嘅謝霆鋒,今個月可謂喜事重重,大仔Lucas、女友王菲剛喺月初生日,上周就輪到老竇謝賢(四哥),而佢自己就喺月尾廿九日踏入三十七歲。

上周五(十八日),四哥農曆生日,雖然霆鋒事前已送咗間八千五百萬淺水灣豪宅畀老竇做大禮,但都專程回港同佢賀八十一歲壽辰。由於霆鋒係大忙人,當日中午時間,拉姑(狄波拉)也趕來霆鋒屋企會合,跟四哥簡單慶祝。據知,煮得兩手嘅霆鋒都有炮製幾味餸菜,食得大家舔舔脷。

至下午四時點幾,霆鋒由助手陪同下,乘坐保母車到觀塘一商廈。戴上黑超嘅佢,下車時cool爆。東姑問佢係咪同四哥慶祝生日,佢就無答,反而身邊嘅助手代答:「唔係,上去做嘢。」留咗兩粒鐘,佢又轉咗去佐敦錄音室繼續開工,認真忙個不停。

上周五(十八日),四哥農曆生日,霆鋒連走兩檔工作,晚上到佐敦錄音時,惹得大批傳媒追訪。

 

下午兩點,拉姑手拎一袋兼捧住部手提電腦到霆鋒家,跟四哥慶生。

 

八月底生日嘅霆鋒,雖然自言係個唔會慶祝嘅人,但收到上海粉絲送嘅蛋糕,一樣歡喜。

 

霆鋒上載多張錄音照上社交網,並留言「美食和音樂本來就是一對」,呢兩樣確實係佢最愛。

 

相反張栢芝有仔萬事足,之前陪兩個仔四圍去玩放暑假,近日又陪佢哋開學,享受親子樂。

tvb4life 發表在 痞客邦 留言(0) 人氣()