彭力克係英國著名御用大狀,特別專長於公法、公民自由同人權法,今次幫梁頌恆打官司,相信「收少個零」。(《蘋果日報》圖片)

八卦陣

梁游終極敗訴 英御用大狀: This is Hong Kong

贊助商連結

上星期五,前立法會議員梁頌恆同游蕙禎被 DQ嘅終極上訴申請失敗,梁頌恆喺法院出嚟後更加眼紅紅。原來佢哋本身對上訴申請幾有信心,梁搵到英國御用大狀彭力克( David Pannick)代表。彭大狀擅長公法訴訟,亦係人權法專家,律政司都曾經多次搵佢幫手打官司。

 


壹號專題
健活逆齡 50人

據聞,今次彭大狀肯幫手,係因為覺得政府 DQ民選議員,係一件十分之「 nonsense(荒謬)」嘅事,所以主動接觸梁游嘅律師團隊,問有冇需要幫忙。對於最後敗訴,佢都覺得十分無奈,仲講咗句:「 This is Hong Kong.」
曾經有媒體話,彭力克每日律師費高達二百萬,肯定梁游背後有外國勢力支持先俾得起巨額律師費。梁頌恆解釋,之前眾籌嘅一百萬已經足夠俾佢哋兩個嘅律師費同之前嘅訟費,相信彭大狀「收少咗一個零」。不過終極上訴失敗後,佢哋要俾埋政府律師費同終審法院訟費,就估計有成一千二百萬要找數。
林鄭宮心計 波叔慘慘豬

林鄭移師「老家」政務司司長官邸,舉行第二次集思會,被網民鬧爆。細心睇吓,得波叔一個掛住食。(林鄭 facebook截圖)
林鄭月娥上任特首後首個週末,就同主要官員開咗次集思會,最近佢又開第二次,但就揀喺超過十萬人上街聲援良心犯當日舉行,唔少網民鬧爆佢仲掛住同司局長食燒味腦震盪。《壹》仔發現原來集思會背後,仲隱藏住林鄭嘅「陰謀」。
大家只要細心睇吓林鄭 facebook上載嘅相,會發現其中一張,明明每個人都一邊食嘢一邊腦震盪緊,係得財政司司長陳茂波一個掛住食。咁多張相唔 upload,偏偏揀呢張,分明針對波叔喎。
幫大家回一回帶,其實第一次集思會,林鄭揀喺波叔外訪時舉行,就係唔肯等埋波叔,於是乎大合照就獨欠佢一個。林鄭咁宮心計,連玩波叔兩鑊,事關係人都知波叔並唔係佢嘅心水財爺,阿爺話到要,佢冇得 say no。
女人真係唔可以得罪,之前工總舉行換屆晚宴,波叔已經有出席,但就早走。林鄭發言時就講笑話對方可能驚佢要點名,所以特登嚟「打卡」就走人,寸爆波叔。出唔出席或者早走都係死,波叔都咪話唔慘慘豬咯。
盧 sir威到澳門法庭 做專家證人
「港版神探伽利略」盧覺強,前年喺理工大學機械工程學系退休,唔做副講師,生活反而更多姿多采喎,點解?事關佢忙緊做法庭證人,最近仲衝出香港,成為澳門法庭交通意外案件,第一個海外專家證人。
盧 sir請《壹》仔記者去佢位於元朗嘅獨立屋採訪,展示喺法庭講解用嘅模型,話造模型大家易明。話說一個澳門女士駕駛私家車嗰陣,喺松山隧道口同電單車相撞,電單車司機死口話係女士駕駛私家車撞倒佢,但係盧 sir憑私家車同埋電單車嘅花痕,再評估兩車車速,計一計數,就判斷電單車想爬頭,一個唔覺意撞到私家車尾部,然後倒地受傷。法庭最終接納盧 sir專業意見,佢幫個客打甩「過失傷害身體完整罪」。
話時話,盧 sir個期真係好爆,佢打開 email,無論的士大佬、學生、普通師奶仔遇到交通意外,都會寫:「盧 sir!求助!」不過盧 sir講明:「有勝算擺明係寃案我會幫手,但若果係事主唔啱,我會叫佢認罪。」

盧 sir唔係個個都幫㗎,如果係事主唔啱,佢會叫事主認罪。

呢個係盧 sir為咗澳門單交通意外造嘅模型,當地法庭最終都接納佢嘅專業意見。
工黨大地震 何姨姨辭執委仲有角色
上星期香港四日內連打兩次風,工黨都因為兩名女將,打咗場十號風球,事關胡穗珊宣布辭去主席一職兼退黨,有指係因為同執委何秀蘭不和,星期五就輪到何姨姨宣布辭去執委同副秘書長職務,自稱係胡穗珊退黨事件「涉事一方」,須按政治倫理負政治責任咁話。
過去一星期,內情滿天飛,《壹》仔都問過工黨副主席(政策)郭永健,想再了解發生咩事,不過佢只話起因係何姨姨同胡穗珊開會期間,因為表達方式導致有矛盾,到後來工黨喺處理投訴機制上有失當,導致胡穗珊退出,強調處理投訴機制失當嘅因素較大。
何姨姨喺請辭工黨執委職務嘅個人聲明度話,自己推動成立工黨,目標係交棒俾新一代左翼,祝留守工黨嘅年輕黨友茁壯成長。咁講係咪即係話以後唔再過問黨務呢?郭永健就指何姨姨冇話辭埋黨內其他職務,亦冇話完全唔過問黨務,相信佢會喺選舉委員會、負責人才培訓等委員會繼續幫手。

工黨上星期三宣布胡穗珊(前排右)退黨,何秀蘭(前排中)兩日後辭去執委同副秘書長職務。(《蘋果日報》圖片)

對於工黨「女人大戰」,郭永健無透露太多,強調黨內處理投訴機制失當嘅因素較大。(《蘋果日報》圖片)
撰文:巫不言
news@nextdigital.com.hk

tvb4life 發表在 痞客邦 留言(0) 人氣()