有關第五代 CR-V的話題多到滿瀉,首先是日本市場已停售,輸港的七座 1.5公升 turbo亦暫時只得新加坡有相同版本發售,其次產地為泰國,放心質素依然靠得住。另外,示範車身顏色為少見的 dark Olive Metallic,驟眼似黑色,但在光線照射下會泛出橄欖綠,效果獨特。

壹號幹線

或許,已超越……  Honda CR-V Turbo

贊助商連結

睇完新款 CR-V水蛇春咁長嘅宣傳小冊子,即時覺得好莫名其妙。
193匹馬力以現今標準其實「濕濕碎」,但「來源」竟是一台僅得 1.5公升的小引擎;再睇埋座位數目:「 5+2=7」;望埋設備,仲驚,齊全到好似睇錯另一部行政房車目錄咁。
所以我諗,一部可以挑戰 MPV市場,又唔怕同豪華房車抗衡嘅 CR-V……
到底,仲係咪 SUV?

 


發奮圖強千五偈
售價:$349,880
引擎: 1498c.c.,直 4;前置,渦輪增壓,四輪驅動
馬力: 193匹/5,600rpm
扭力: 24.8kgm/2000-5000rpm
波箱:無段變速(附+/-模式)
長/闊/高: 4590mm/1855mm/1690mm
重量: 1667kg
耗油量: 7.5L/100km( NEDC test cycle)
查詢:合群汽車有限公司
網址: http://www.honda.com.hk

讚一讚:坐多兩個, package吸引,同級設備王;中排空間闊落;千五機器表現喜出望外;懸掛濾震效能出色。

彈一彈:胎噪明顯;欠缺摺枱及側遮光簾;最後排只屬臨時性質,切勿期望過高。


多得 turbo裝置,讓僅得 1.5公升引擎竟可迸發出好誇張的 193匹馬力。動力表現頗驚喜,雖然頭段起步感未算飛快,但逾 2500rpm開始後勁凌厲,踩落比自然吸氣兩公升引擎生猛好多,最緊要牌費及油耗特低,咪話唔吸引。


系統大部分時間維持前驅,需要時最多可將 40%扭力輸向後軸(全自動)。行車感以舒適為大前提,強調無壓力輕鬆駕駛,操控上當然欠缺激情,快跑山路亦難逃高重心擺幅,但純粹作代步載人用則非常稱職,只差在行車路噪幾「真實」,相信是車胎質素問題,容忍到的話,行多一年半載先換都未遲。


全電子儀錶玩重科幻味,揸車都有控制高達 feel,可切換至四驅系統監察甚至倦意偵測,但坦白說:冇乜作用。


個人十分喜愛的 LaneWatch系統,左側鏡底設有鏡頭,打左燈時會自動(亦可手動)於屏幕上顯示廣角畫面,有助監察盲點,窩心安全設備是也。


估唔到有的原裝導航,介面簡單易用,但中文不設手寫,只限倉頡或拼音輸入,嗯……都係用自己個 Google Map好過。


本田車廂處理素來有法,中控台雖只得黑色,但設計好有層次感,望落唔 cheap亦唔覺好膠,設備更多到寫唔晒,其中多功能軚盤上的音響控制竟然是輕觸式,雙區冷氣兼有花粉過濾,全車喇叭亦有 8隻,高級到 unbelievable。


天窗分成前後兩段,面積頗大,可順利歸納入天幕頂級別。


從來,要天幕就要犧牲天花冷氣出風口,但工程師巧妙將裝置移後,同時照顧中、後排乘客,不過位置好貼頭頂,加上本田冷氣出名「凍死冇命賠」,小心吹到頭痛。


前座剪裁遠比預期 sporty,除有原裝真皮外,繡線 pattern也頗講究,果然有 heart!


最後排唔坐人,便可以將中排移至最後,有眼你睇空間闊落到有啲過分,更欣賞是地台沒有拱起傳動軸位,坐中間位都特別舒服,可惜不設摺枱及側簾,美中不足。


講到明「 5+2」,後排空間要有心理準備,若要坐兩個成年人,中排必須移前,不過仍然會頂頭頂腳,真係好「臨時」。


後門開啟角度達 90度,不過進出後排仍有一定難度,中排需要兩個動作才可翻摺,騰出通道又不算闊,上落有點尷尬,女士們更隨時上下失手。


裡面高級,外面亦唔講得笑,全車燈組(前、後、日行燈、霧燈)全屬 LED貨色。真係幾懷疑,有冇錢賺㗎?


中排冷氣口只可控制風量及角度,設定係基本,一於送番兩個 USB插座補數。


無段變速波箱只得軚盤可作+/-模式,但就送你電子手掣及 BRAKE HOLD( D波停定後會自動踩 brake,直至再踩油門),高級喎!


中後排翻低後可變全平,行李箱滿載後仍保留合理儲物量,可拆式層板可分為上下層,地台底放後備胎位置亦裝到不少雜物,最正是竟設電動尾門,佩服!


日本 SUV通常都係手動座椅,但 CR-V駕駛座就有八向電動及四向氣壓調校,仲附設兩組記憶功能,而乘客座則較正常,「係咁意」得四向電動啫……


三十幾萬車可以有咁勁設備,用料上總不可能太奄尖,例如中控台上所見的皮及木材均是塑膠品,但係就認真到連繡線及木紋都模仿得似層層,呢啲咪誠意囉!


好多跑車都忽略了這個位於波箱槽旁的小咕𠱸(作用是揸快車時穩定下盤),但居然出現於與性能無關的 CR-V上,實在莫名其妙!
撰文:廖宏俊
攝影:方保山
features@nextdigital.com.hk

    文章標籤

    Honda CR-V Turbo

    全站熱搜

    tvb4life 發表在 痞客邦 留言(0) 人氣()