兩個多月前,石永泰(紅箭嘴)大狀與一眾同事到「家全七福」食晏仔,他似乎是熟客。

中環人語

石大狀魚翅啷口

贊助商連結

今時今日,做邊行都要「彈」出嚟,所以 sound bite好緊要;前大律師公會主席石永泰接受訪問時批評雙學三子被判入獄,爆出一句:「出得嚟行,預咗要還。」真係夠晒草根通俗。

 


石永泰以前透露自己喜歡廟街歌王尹光,早兩個月,撞正佢同班手足喺「家全七福」食晏仔,一坐低,個 captain就問大狀:「今日食唔食翅呀?」石大狀耍手兼擰頭,咁又係,一圍五人食個晏仔點埋翅,好揦脷喎;不過 captain以對待熟客口吻去問,估計石大狀平日用膳都好似尹光首《潮神》歌詞咁——魚翅啷口,花膠 gel頭。

石永泰以前接受訪問時透露,喜歡廟街歌王尹光。

名牌幼稚園冇校巴
能夠經營一間名牌教育機構,不單只有錢,有錢佬仲會俾面,表表者有創辦寶山幼稚園的呂明才孫新抱——楊俊婷( Stella Lu),班闊太家長開學前聽聞 Stella可能退休,嚇到驚惶失措,擔心冇咗佢嘅人脈關係,仔女難以入到聖保羅男女、男拔及女拔等同屬聖公會之名校,其實呢盤咁有前景嘅教育事業又點會冇接班人, Stella個女——呂慶欣早已在鴨脷洲開設 ITT Playgroup,唔少搭通天地線家長同𡃁仔飛撲去報名,希望可直入寶山幼稚園;不過都冇咁易,首要誠意搭夠,寶山幼稚園申請表格必須透過寫信索取,唔係話從網站 download㗎,仲有學校不設校巴服務,因為學生個個有司機接送,仲有一班被 label為「孤兒班」,此類學生母親要返工,所以索取入學表格前,家長都要照照鏡先呀。

寶山幼稚園創辦人楊俊婷人脈廣多富豪朋友,其夫呂元祥是則師,是呂明才的孫兒。

郭炳江(左一)與呂元祥(右一)為姻親。

寶山幼稚園已由寶馬山搬到大坑。

大部分學生有家長或司機接送。
中環寸嘴 菠蘿雞食飯都有飛士

楊國佳

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。
「 Hey Big Spender」首歌,我淨係記得個 tune係「被迫做雞」,個老友喺 YouTube重溫 Hennessy廣告,原來葉麗儀唱歌詞係「人生需要享受,使錢要講派頭」,咁先係做人正確態度!有個老友請我去中華總商會貴賓房食飯,雖然我「菠蘿雞」食飯,但 face猶在,個 captain竟然認得我,令到我貴為會員嘅老友都深表驚訝。唏,呢個 captain以前喺利園酒店 Rainbow Room做 Boy王,另一個中餐部 captain又去咗銅鑼灣 World Trade Centre Club做老總, Rainbow Room以前喺利園酒店廿二樓,係利孝和夫人飯堂,嗰啲年代好威,係東華三院、保良局總理宴請高官食中國菜嘅指定飯堂,嗰時高官,來自 Oxbridge,即是牛津劍橋,並非而家啲官來自土炮大學,或者中途去外國讀雞精班,正式豉油撈飯,整色整水。
利園酒店要拆卸重建,公司俾多十個月糧啲員工做遣散費,以前出糧都係 pay cheque,未流行自動轉賬,即係張 cheque後面加多個「零」之嘛,仲划算過補足一年,員工就唱通街,又好聽。重建期間,利孝和夫人都出一份錢搞聘珍樓,同埋後來喺利舞臺廿二樓搞新「彩虹館」,等啲舊伙記有落腳地方,呢啲老闆,總算有心、有情、有義!

現時在利園一期商場,有個利園酒店懷舊展覽。

一九七二年暴雨,半山居民要疏散,我都係「富貴走難團」成員之一,不過就入住富麗華酒店。

利園酒店廿二樓的彩虹館啲水晶吊燈幾有氣勢㗎!

以前利園酒店入面食肆的火柴盒。
非洲獨裁者爭大埔豪宅
鍾愛名牌,被國際傳媒謔稱為 Gucci Mugebe嘅津巴布韋總統夫人,喺南非酒店撞破兒子房間,當眾用伸縮電棒襲擊房中模特兒 Engels,搞到周身傷痕的 Engels決定追究,但穆加貝夫人運用外交豁免權最後一分鐘逃離南非,以迴避司法起訴。其實呢位非洲獨裁者喺香港仲有單官司,話說七、八年前穆加貝個女 Bona來港大讀書,家人透過一名台灣中間人 Hsieh Ping Sung,以四千萬買入成龍同英皇在大埔發展的龍成堡一幢別墅,然而呢位台灣佬據為己有,哈,卒之以津巴布韋政府名義控告呢個台灣佬侵吞此豪宅。咁又係嘅,由津巴布韋政府入稟,律師費 charge政府,若成功攞番業權又再可轉到私人名下,非洲呢啲國家獨裁者及政府角色分唔開嘅!

現年九十三歲的穆加貝與五十三歲夫人所生的女兒 Bona,曾在港大就讀。

二○○八年, Cross Global Limited以四千萬元購入大埔龍成堡三號大屋,至一○年轉到台灣人 Hsieh Ping Sung名下。
 
(宗菁華)
centralman@nextdigital.com.hk

    tvb4life 發表在 痞客邦 留言(0) 人氣()