大批港人星期天於烈日當空下上街,希望俾強權知道,牢獄囚不住良心。

八卦陣

吳文遠:無人願因政治打壓入獄

贊助商連結

本週日多個團體及政黨發起遊行,大批市民逼爆灣仔,聲援被判囚嘅雙學三子,以及反新界東北發展案十三名社運人士。社民連主席吳文遠覺得相當鼓舞,「對香港人重拾信心,一定要上街先有希望!」

 

 

吳文遠話無人想坐監,至於愈來愈多人被監禁,只係顯示政權愈無賴。

由議員 DQ、新界東北到雙學判囚,吳文遠話:「好明顯律政司利用司法制度嚟做政治打壓。」佢話上訴係必然要做嘅事,亦都係對終審庭嘅考驗。如果想證明香港仲係司法獨立,終審庭應盡快處理獄中人嘅上訴申請,唔好再拖。而終審庭嘅判決會好影響未來香港的社會運動發展。仲信唔信法治?佢都老實講:「信唔信要建基於事實,但呢一刻信心愈嚟愈小。」
面對一連串嘅政治打壓,吳文遠話近日好感動,「更多人願意幫社民連同埋加入做義工。」有人話坐監會令反對派更加強大,吳指:「我哋唔需要更強大,愈多人被監禁只係顯示政權愈無賴。」吳補充,唔會有政黨因為想攞政治本錢或者光環而想坐監,「無人想坐監。」佢批評林鄭挑起更多社會嘅矛盾,「愈嚟愈多人企出嚟但係被監禁,你應該點做?」
防示威裝備又升級 警用實淨尼龍帶封路
大批香港人星期日再上街頭,用行動支持十六名被判監嘅社運人士,當中亦都有人呼籲香港人要關心埋其他受打壓嘅抗爭者。本土、自決、泛民團體紛紛響應,同香港市民促成呢場雨傘革命後最多人參與嘅遊行。
參加遊行嘅香港人冇將行動升級,但警方防範和平示威嘅行動,似乎又再升級。《壹》仔發現,警方喺今次遊行並唔係用一般膠帶封路,而係用疑似尼龍織帶嘅淺綠色封鎖帶,望落同摸上手,用料相當實淨。
警察公共關係科回覆話,原來之前已經用過呢類封鎖帶,因為環保啲,可以循環再用。但問到幾時採購呢啲封鎖帶、買咗幾多、用咗幾多錢等,就冇特別補充。
重視環保當然好,不過警方近年應付示威遊行,布防大陣仗之餘出動大量水馬,用咗唔少水。
一四年七一遊行期間,警方就以水馬同大型膠板,喺德輔道中一帶築起封鎖線,以防「預演佔中」擴散。應付領導人訪港嘅「水馬陣」就更誇張,舊年全國人大委員長張德江訪港,同今年七一期間習總訪港三日,警方都喺灣仔布置幾百個大小水馬,以防激烈示威。

警方今次改用淺綠色封鎖帶管制人群。

呢款封鎖帶望落同摸上手,用料都相當實淨。
白鴿黨新女神 子琼 BB網民 Like爆
呢幾年,好多政黨都推行年輕化,有活力嘛。好似白鴿黨,都推動第二梯隊接棒,例如林卓廷同男神鄺俊宇,都能夠成功殺入立法會。年輕人做事有衝勁,都係一件好事。
唔單只立法會議員後生,白鴿黨林卓廷議員辦事處一名叫林子琼嘅社區主任,都非常後生,加上一頭長髮同樣貌標致,仲備受高登仔追捧,好多網民都封咗佢做女神,稱呼佢做「子琼 BB」。
《壹》仔收到風,子琼 BB除咗處理街坊求助個案,仲不時現身上水東鐵站派傳單,仲落手落腳掛宣傳橫額,好勤力㗎。佢每次出現,都有唔少粉絲拍照。《壹》仔聯絡子琼 BB想同佢做訪問,但被佢婉拒話始終剛開始地區工作,現階段接受傳媒訪問實在太早,希望喺地區工作進入穩定階段,先同傳媒見面。不過,子琼 BB都好有禮貌,不停猛講唔好意思。

白鴿黨新來了一位子琼 BB,係林卓廷議員辦事處社區主任,樣貌標致,被網民封做女神。

子琼 BB十分勤力,仲不時落手落腳掛宣傳橫額。
四十年後再開金口 薯片叔叔登台唱飲歌

曾俊華透過 facebook預告會喺九展開金口演唱,仲落埋 hashtag「我是歌手」,似乎對自己歌喉好有信心。

薯片叔叔曾俊華參選特首落敗之後,唔少人都好關心佢嘅「前途」問題。最近佢就喺 facebook出 post,話離開工作三十年嘅政府之後,係時間思考人生下半場,做啲有意思又好玩嘅嘢。
曾俊華喺個 post度出咗段自己開金口唱歌嘅黑白片段,見到佢戴住耳機,唱緊歌曲《 Wandering Chinaman》,成個歌手咁款,十分之有 feel。原來佢會喺嚟緊星期四至星期日,參與一個由視障人士組織舉辦、名為「暗中作樂」嘅聲演會,會做特別嘉賓,一連四晚表演唱歌。
其實,曾俊華已經唔係首次「登台」,佢年輕時喺美國生活,同朋友夾 band,係隊中嘅結他手,仲會去華人餐館唱歌。所以佢都話,今次係「重操故業」上台演唱。薯片叔叔對上一次喺公開場合唱歌,已經係七十年代嘅事,今次呢首仲係佢當年飲歌,唔少網民睇咗段片,都大讚佢唱得好聽。
撰文:巫不言
news@nextdigital.com.hk

    tvb4life 發表在 痞客邦 留言(0) 人氣()