採訪當日,葉漢瑛與師傅在 11樓工作,當問及他有沒有畏高時,他笑稱又不是跳落街,所以沒有問題,「我試過最高上五十幾樓搭棚,其實同 20樓望落去差唔多。」說罷他繼續步履輕盈地在棚架中走動。

青雲路

唔想俾師傅鬧  80後發奮做搭棚師傅兼開公司

贊助商連結

香港每天都有不少建築及維修工程進行,大廈外牆總有吊臂或棚架出現。 80後葉漢瑛自中三畢業後便加入搭棚業,因常被師傅鬧,故他發奮考牌做師傅,更於 6年前開設了樂森棚業。葉漢瑛覺得搭棚是在建立和創造,更是一門香港獨有的工藝,即使工作過程艱辛,但每一次完成工程都讓他很有成功感。為了令搭棚手藝得以傳承,他引入新式的安全措施及搭棚物料,希望改革令行業進步,吸引新一代入行。

採訪當日,葉漢瑛正與兩位搭棚師傅在屯門一座工廠大廈進行清拆工程。開始前,他們先穿上安全帶,葉說:「我引入咗呢款安全帶,前面有多個扣,喺棚上工作時,會有多一個方位扣住個棚,做嘢會更加安全。」
3人合作將竹遞出窗外,然後不消幾秒便將竹與竹之間繫上緊緊的結,動作十分熟練,葉漢瑛表示:「香港用嚟搭棚嘅竹,多數嚟自西安;竹嘅切口都係斜面,但落地嗰邊一定要平頭,接觸面大啲會穩陣啲。」
葉漢瑛與一班師傅相處和洽,整天都笑笑口十分親切,雖現為樂森棚業的老闆,但仍不時親身上陣,出心出力。他表示搭棚只是其中一個工序,公司現接維修工程為主,包括換窗、換冷氣機、檢查外牆及防水層等,「所有喺外牆嘅工程我哋都會接,工作流程通常係準備物料,然後入屋搭棚,再開始換窗或換冷氣機嘅程序。」
葉近幾年更不斷引入新的工具及安全設備,希望令搭棚業隨時代進步,「除咗安全帶外,我仲成日試其他新推出嘅安全用品及工具,好似搭棚維修時會用到嘅鐵架,呢款新設計比舊款輕 4分 1,但負重多 1倍,師傅都話好用。」

俾人讚感覺好

今年 33歲的葉漢瑛,積極地改善行業設施,希望吸引更多年輕人入行,但他當初卻誤打誤撞,才踏上了搭棚之路。「中三畢業時,同學幫我填表格報讀建造業議會嘅課程,就算收咗我,頭三個月我都好少返學,直至有次課堂實習,得到師傅嘅讚賞,我先發覺原來俾人讚嘅感覺咁好,慢慢對搭棚呢門手藝有興趣。」
完成 1年的課程後,即使再有熱誠,在學校上堂與踏足社會工作總有差別,葉漢瑛坦言上班 3日已經想辭職,「戶外工作熱兼辛苦,試過熱到流鼻血,休息嘅時間又比返學時少。加上師傅叫我做乜就要做乜,做嘢好受氣,做乜都俾人鬧。初初頭兩個月工作只係搬搬抬抬,我仲要做買茶嘅工作,一次過買四十幾人嘅分量,都未有機會紮竹棚。」




葉漢瑛(右)與師傅合作搭棚,然後進行拆窗工作。他與師傅相處融洽,「有時佢哋仲會同我鬥快行樓梯或搭𨋢,比賽會增加工作效率,大家又開心。」


葉漢瑛指維修工作主要分為入單位維修及在地盤工作,「入單位就咁拎竹枝上去就得;如果喺地盤,就要用天秤吊上去。」


葉漢瑛表示搭棚所用的竹及尼龍帶基本上不會有大改動,但他希望日後能設計更多工具來加強棚架的穩固程度。


葉漢瑛樂意嘗試新的工作用品,他說:「呢款安全帶喺心口會比一般安全帶多一個扣,就算喺棚度要轉身做嘢,都可以多個位置扣住,增加安全性。我哋開工前,每個人都會配戴。」


除了工作用的工具外,在安全配件上,葉漢瑛都花了不少心思,師傅阿碩表示很喜歡這款安全鞋,「好似波鞋,好方便及着得舒適,同埋冇鞋帶,唔怕甩或拌到。」 學識與師傅溝通

奈何當時工作難求,葉漢瑛只好留低繼續工作,「俾師傅蝦得多,自己好想快啲做到師傅,唔好再俾佢哋鬧!」下定決心後,他亦慢慢從壓力及吵鬧中成長,學習到與師傅相處的方式,「同師傅溝通時,態度要好,但遇到唔合理嘅事,好似去執啲污糟嘢,我都會反抗,鬧番佢哋。我有時都會玩嘢,好似買茶時會買冇咁好食嘅嘢,佢哋之後反而會對我好啲。」
在與師傅的博奕相處找到了樂趣之餘,工作亦擴闊了葉漢瑛的眼界,令他開始喜歡自己的工作,「去維修嘅地點,好多都係平時自己好少機會去,好似垃圾槽、殮房、停屍間及墳場等,多數係朝早去,所以都唔係好驚。最難忘都係做垃圾槽維修,我要喺垃圾通道放條繩梯落去,除咗好臭外,仲要預防啲人照掉垃圾落嚟,好彩冇玻璃樽咋!真一個好好嘅體驗。」

最年輕大工牌師傅

在工作中得到成功感及動力後,到 18歲時,葉漢瑛已考獲大工牌當師傅,當時他更是全港年紀最小考獲大工牌的師傅。縱使葉漢瑛的體格漸漸變得強壯,但他表示搭棚的工作絕不輕鬆,「天氣熱都話休息多啲就得,但落雨打風季就好麻煩,打風前要做前期工作加固竹棚,打風當日唔使返,但風後就要做維修,同埋要追進度,原本 5日嘅工作要喺 3日內完成。」
當累積一定的經驗後,葉漢瑛來到了一個新的階段。 11年,其中一位師傅介紹了第一位客人給他,「師傅叫我買架車,自己接生意,做唔掂先返去佢度做,造就我有機會去開公司。」他表示頭一年在儲客階段,要靠半打工半打理自己生意的形式經營,「除咗師傅介紹外,另一方面要靠客人介紹,偶爾識到啲大客,靠佢哋介紹就多咗工作,仲試過去藝人嘅屋企維修,有啲都幾好人。」




除了搭棚工序外,他們還需作清拆或維修的工作,「成日都要拎住好多工具及用品喺身,有啲真係幾重。最近我引入咗呢款鐵架搭棚時用(右圖),比以前嘅輕 4分 1,拎住行都唔會好辛苦。」


大年初一都開工

葉漢瑛表示打工與打理生意最大不同是,要 24小時隨時準備,除了到工地工作外,還要處理行政事務及與客溝通,少了很多時間陪家人,「有時生日及大年初一都要開工,但難得客人第一時間諗起我間公司,所以我唔會推,建立好嘅名聲,客人對我哋信心都大啲,自然會介紹多啲工作機會畀我哋。」
現時樂森棚業每月約接超過 100單工程,葉漢瑛表示搭棚工人的薪金比以前多了近倍有多,「以前日薪約$350,𠵱家學徒日薪$700兼包膳食;考咗大工牌嘅師傅,日薪則由$1,800起。」他希望日後引入更多不同的搭棚物料之餘,亦減少親身上陣的機會,抽多些時間陪小朋友。




工程開始前的前期工作,都由葉漢瑛一手包辦,「要睇 floor plan安排搭棚嘅位置,呢啲涉及安全問題嘅策劃工作,好難假手於人。準備好工作圖後,就會預備物料,之後先正式搭棚維修。」


親身落場工作的同時,葉漢瑛亦擔任工作分配的任務,以確保工程能按進度進行。


葉漢瑛的辦公室中擺放了不少獎座,他表示:「我哋參加好多職安健竹棚工嘅比賽,希望大家可以保持競爭力。」 

師傅 阿碩
我覺得搭棚好似創建緊一樣嘢出嚟,過程好好玩。雖然有時都會好熱,仲有夏天會曬到好黑,但同其他員工一齊工作都好開心。

點入行?

雖然葉漢瑛表示實戰比起學校學習時存在差異,但他建議想入行的話,可以先報讀建造業議會的課程,「起碼會知道成個維修流程及工具運用,到出嚟做嘢時,會比較快上手。」建造業議會更會提供工作轉介予各學員,不少學員在實習期後,都能找到工作。

晉升階梯

晉升階梯
大工(約 3至 4年經驗)
日薪$1,800起

學徒(無需經驗)
日薪$700起

後記:身分不同

葉漢瑛提到當年因常常被師傅鬧,才想快點當上師傅不再受氣,當問到他現不只是師傅,還是公司的老闆,他會否鬧員工?他開玩笑說:「雖然𠵱家角色唔同咗,但都係我俾佢哋鬧呀!我都明白,喺出面可能受咗氣,要搵人發洩吓嘅,咁我忍吓,好過大家谷住唔開心。」說罷又哈哈大笑。葉漢瑛的開朗樂觀性格,令大家工作的氣氛很好,可能是這個性格,令他當上一位成功的老闆。

撰文:霍芷晴
攝影:林文樂、部分圖片由被訪者提供

 

    全站熱搜

    tvb4life 發表在 痞客邦 留言(0) 人氣()