476匹的 GT Roadster已經是一部從任何角度望,都靚到暈的開篷超跑,而輸出更強( 557匹)的 GT C更是變本加厲,事關尾沙板採用了與 GT R相同的「大 pat pat」設計,兩側鋁合金 side wall分別擴闊 57mm,方便裝置特闊( 305/30R20)尾胎以提升抓地穩定性,通風口亦同時產生導流效應,既有型,亦有「紛唇」。

壹號幹線

十特辣 無上裝  Mercedes-AMG GT C Roadster

贊助商連結

假如做《壹週刊》寫車佬可以發到大達(事實係天方夜譚,前景仲……),可以隨便拎兩、三球出嚟買部開篷車而又眼都唔使眨,更加唔使理佢實唔實用。
在外形同性能都同時有要求的大前提下,喺我嘅 wish list上面,這部由 AMG操刀嘅 557匹 GT C,將會係我無悔的瞓身推介。

香港只得一個版本

售價:$2,788,000
引擎: 3982c.c., V8;前置,後輪驅動;雙渦輪增壓
馬力: 557匹/5750-6750rpm
扭力: 69.4kgm/1900-5750rpm
波箱: 7前速自動雙離合器(附+/-模式)
長/闊/高: 4544mm/1939mm/1259mm
重量: 1735kg
耗油量: 11.4L/100km(公路及市區綜合計算模式)
0-100km/h: 3.7秒
極速: 316km/h
查詢:仁孚行
網址: http://www.zungfu.com 

讚一讚:平治陣營最靚最有型開篷車;引擎反應癲快,動力輸出段段有;刺激度滿瀉,快感從腳尖直衝頭頂。

彈一彈:車頭極長、前窗細、側鏡覆蓋範圍窄,不利於市區塞車及進出「地獄停車場」,典型超跑通病,請妥協。



這台四公升雙 turbo引擎是平治( AMG)近年傑作,更加是近年最不可多得的高性能引擎,反應快到得人驚,既有 NA設計的亢奮式高轉,亦帶 turbo設計的瞬間爆發威力,馬力調校彈性靈活,擺落任何型號上,結果都只係一個「掂」字。再留意引擎擺位盡量移後並貼近前軸,營造出理想的前中置 FR布局,毋須四驅,一樣咁平衡。



削走車頂,但對 GT C的操控近乎零影響,它有極之濃厚的 FR駕駛味道,指向癲快,後軸龐大輸出亦有助提升出彎身手;懸掛並非一味死硬,相反是精準的吸震及緩衝效果,車架 setting十分敏感,任何細微動作或是路面回饋,都能一一反映到駕駛者身上,尤其在 S+或 RACE模式下,後軸走姿時刻都充滿「就甩就甩」的刺激性,要盡情發揮性能確實需要一定技術,而這種挑戰性,正正就是開跑車所追求的真諦。



車廂鋪排大概就是割走了車頂的硬頂 GT,在大量 Alcantara、真碳纖及鮮紅繡線點綴下,熱血情緒時刻高漲,不過受 king size波箱槽影響,兩座間距離頗遠,拖手有難度,摸大髀或是更進一步舉動,基本上諗都唔使諗……



AMG performance seats是額外選配,肯定唔慌平得去邊,但實在太有型,冇佢總係會若有所失咁,還首次加入 AIRSCARF電暖頸巾,注定走唔甩,只好乖乖俾錢。



駕駛模式( GT C獨有 RACE mode)、波箱程式、懸掛軟硬、尾喉聲響、 ESP程式均可獨立調校,設定極之仔細,乘客咪亂擰!



制動碟直徑前 390mm及後 360mm,示範車還改用陶瓷碟,煞車效能強大、漸進兼具充足溝通,極品減速裝置是也。



軟篷收納後雖不佔用尾箱空間,但容量仍僅得 165公升,勉強可應付二人世界短 trip加兩件 hand carry,莫講話血拼,買手信都未必得。



動力毋須多講,總之係又快又癲狂, engine運轉同喉聲更是非同小可,基本上已刺激到血壓急升,再加埋開篷駕駛,官能感受可再倍大多 50%。就以我於無限制公路上開到 250km/h為例, GT C仍相當穩定,但當夾雜了特強的聲、畫、風時,愈快就愈「淆青」,未有膽量挑戰 316km/h極速,只好慨嘆,真係老了……



要快,自然要輕;要輕,自然唔可以用硬摺頂;用軟篷,自然最合理。 GT C軟篷由三層帆布構成,機械骨架及結構部分包括鋼、鋁及鎂,總重量約 30kg,約 11秒完成整個電動開合, 50km/h下仍可操作。秋天將至,一於篷長開吧。



「大 pat pat」車尾外, GT C獨有後輪轉向系統, 100km/h下會反方向轉以提升靈活性, 100km/h以上則呈同方向,有助增強高速穩定性;另外,後軸差速鎖亦改為電子式,設定極為 high-end。

撰文、攝影:廖宏俊(德國斯圖加特)
mailto:features@nextdigital.com.hk

 

    文章標籤

    Mercedes-AMG GT C Roadster

    全站熱搜

    tvb4life 發表在 痞客邦 留言(0) 人氣()