超人李吼中靚股 Priceline,但猴急沽貨以致走寶,可惜!

中環人語

超人父子割禾青走寶

贊助商連結

早前我哋話小小超割禾青,為咗區區一億港紙就喺○一年拱手讓出兩成騰訊股權俾南非基金。若非咁猴急,佢呢兩成股權現值超過六千億港紙,身家勁過佢老豆多多聲。不過,走寶又唔止小小超一個,霍大班一樣錯失良機。




Priceline跑贏 Amazon、 Apple、 Facebook及 Google。

你估過去十年,表現最標青之科技股係邊隻呢?若果大家以為係亞馬遜、蘋果、面書或者谷歌,咁閣下就錯啦。早前《經濟學人》幫大家開估,上述公司冇一間及得上 Priceline:過去十年,呢間公司嘅稅前盈利平均每年增長四十二個巴仙,即係一年零八個月就翻一番,如是者持續十年!但咁同霍大班又有乜相干?
有!○一年,和黃同長實用五千萬美金買入 Priceline三成六股權,係冧巴溫股東。到咗今日, Priceline市值大約一千億美金,即係近八千億港紙。如果長揸冇放,呢三成六股權相等於約兩千九百億港紙——比長實市值多凸四百億!可惜吖,超人李喺○六年一股不留,沽清手上嘅貨。
超人李父子嘅投資經驗有乜啟發?股神畢菲特係啱嘅:吼中靚股就應該俾些少耐性,長揸不沽;割禾青係搵唔到真銀嘅,明冇?

土豪式掃貨

融創中國( 1918)今年真正做到土豪式掃貨,先後用百五億入股樂視三間公司、用四百四十億買入萬達十三個項目,股價立時颷升,由年頭唔到七蚊,到今個月最高見廿一元七角,升咗足足兩倍。
不過交易完成後,融創負債比率爆升到 350%,媲美恒大;仲要全數抵押樂視股份,另外配股、發優先定息票據,個頭洗得愈來愈濕。有沽空機構話,主席孫宏斌揸住嘅 48%融創股份,大部分都已經抵押咗出去。睇番 CCASS,持倉最重嘅係興業證券。興證背後有福建省財政廳揸旗,實力雄厚,借錢出去話咁易。但借咗錢嘅公司就唔多掂咯!過往輝山乳業、恒發洋參,都一樣由興業持重倉,最後爆埋煲。下一隻係咪融創?戴番眼鏡放長雙眼睇囉!




輝山乳業爆煲前,一樣由興業證券揸重貨。


「地產狂人」孫宏斌,數十年來兩番起落,今鋪狂到借盡! 中環寸嘴 工廈 2.0,小雨點之嘛!


楊國佳去到曼谷最新五星級酒店 Park Hyatt梗要觀摩一下,我哋都一邊歎,一邊吸收新嘢,睇到香港就冇進步!

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。




當年土發收樓,我都要拋個身出嚟接受明珠台訪問。

葵涌工廈燒死人單新聞,睇到啲友仔出嚟講嘢,以為改裝工廈做住宅好易,好多經年嘅化學品滲咗入牆身度,好易着火!其實,我讀中學時,程翔係教我地理科阿 Sir,我話晒係佢門生,雖然冇上海哥啲門生咁威猛。程翔真係懶到出汁,攞啲 HKU嘅 notes嚟教 Urban Planning,好在 point form都好易記,直頭令到我中學畢業已經有大學一年級 Urban Planning嘅基礎,後來自己去美洲東岸讀書、遊歷,睇到 migration factor對 Urban Planning重要性,不過喺東岸邊度夠猶太佬, Anglo-Saxons去競爭,東岸啲人做乜都 well-prepared啲,西岸就他條、自由奔放啲。
昔日我仲喺工業總會任商貿組別委員之時,林鄭做緊發展局局長,嗰陣叫做活化工廈 1.0,有會員提出將各工業區劃做指定行業;例如長沙灣搞製衣 outlet、觀塘搞電子,又可以促進旅遊業,林鄭嗰陣又話需要跨部門處理,仲話係以參觀英國、荷蘭等歐洲地區工廈活化做藍本,但就冇去世界級城市 New York City睇吓,嗱,我建議荃灣及觀塘區議員搵啲公費,去 New York考察吓人哋工廈活化,需要我指點可以隨時出聲,否則我依舊歎我嘅世界,做 Hey Big Spender,話晒地產建設商會位秘書長 Louis Loong(龍漢標)以前喺滙豐專做香港同北美洲地產放款,都知我啲功架嘅!

保險箱的走資秘密

香港有咁多國安跟蹤人,查走資點解唔得?有老友爆料話收到風,近排好多大陸人,將喺香港嘅儲蓄戶口、股票戶口都取消咗,費事俾「強力部門」查到自己運咗幾多錢落香港。有公司專喺機場接呢啲大陸客,幫佢哋買金條、買鑽石,即時放喺機場保險箱,貪方便唔使再出市區銀行。講到機場保險箱塞滿值幾十萬嘅金條、一盒盒廿幾萬美金嘅鑽石,簡直係現代張保仔洞!
老友俾咗個公司電話我,小宗八卦打去一問,對方話只係賣鑽石,唔會幫人走錢落嚟喎。不過叫佢 send資料來睇吓就無晒下文。老友仲預言,大陸人抽走喺股市樓市嘅資金改揸現金,隨時引發樓股大冧,造成第二次金融海嘯!計落就到十月,股災都係時候喇!




內地人走資香港,小宗無諗過機場客運大樓也是一個「渠道」。


保險箱藏走資資金,最安全。

    tvb4life 發表在 痞客邦 留言(0) 人氣()