林子健喺記者會上,展示大髀上嘅「十字架」同個肚被打嘅傷勢。(傅俊偉攝)

八卦陣

林子健被擄 評論員:習總鞏固權力手段

贊助商連結

民主黨成員林子健上星期四懷疑被強力部門擄走,大髀仲被人用釘書機釘咗十個十字架。雖然佢星期日喺 Facebook live表示「以後會收聲」,但疑似強力部門落重手背後嘅動機,仍然留低唔少疑團。

雖然何俊仁喺記者會話,覺得施襲者嘅手段不成比例。但中國問題評論員林和立相信,落重手係要製造寒蟬效應,殺雞儆猴。佢認為,今次事件有可能係習近平喺十九大前鞏固權力、顯示權威嘅手段,皆因習總係廿一世紀嘅毛澤東,為咗喺黨內樹立強硬形象同至高無上嘅地位,幾狠辣嘅手段都會考慮。
資深傳媒人程翔就認為,林子健事件同習近平上月底喺北京「省部級領導幹部研討班」度口傳嘅「四個不惜代價」有關,內容包括「不惜代價應對十九大前後的外部壓力」,反映大陸嘅政治鬥爭已經相當尖銳,習總會不惜一切代價,喺十九大前夕將所有佢認為會妨礙政權穩定嘅因素消滅。
程翔又認為,習近平擔心劉曉波雖然離世,但影響力仲存在,甚至會向外傳遞,或者外界會藉劉曉波嘅事影響大陸,先會對林子健落重手。




林和立認為林子健被擄,有可能係因為習近平要喺十九大前夕鞏固權力同展示權威。


程翔指政府同保皇黨議員都話林子健事件係苦肉計,唔肯去正視問題。「呢樣嘢唔係第一次發生,李波發生過,肖建華發生過,今次唔止嚟香港執法,仲係嚟香港行刑!」 廉署執行處首長位 丘樹春或明年才坐正


廉署執行處高層與專員合照,左起處長朱敏健、專員白韞六、署任首長丘樹春、處長余振昌。

廉署執行處一向由「七小福」管理,即係一位首長同六位處長。去年七月執行處大地震,廉政專員白韞六臨危授命丘樹春做執行處署任首長,接替「劈炮唔撈」嘅李寶蘭。《壹》仔收到風,丘上任後大力改革升遷制度陋習,積極栽培新人上位,改善執行處青黃不接嘅問題,近期先至將七個署任首席調查主任同一個署任助理處長,全部正式升正,大有新官上場,一展抱負之勢!
正當執行處內部都以為丘會好快坐正首長個位時,啱啱過渡林鄭班子嘅白韞六,又再通過刊憲,延續丘嘅署任期多三個月,由上月十八日至十月十七日為止。外界都感到奇怪,廉署內部有人甚至炒作話林鄭上場後,可能丘最終唔可以坐正,或者會喺其他政府部門搵人過嚟接位。回歸前,政府曾一度徵求當時擔任高級助理警務處長嘅曾蔭培,問佢有冇興趣接替郭文緯嘅執行處首長一職,但曾就一口拒絕咗。
熟悉內情人士同《壹》仔講,白韞六咁做,可能唔想俾人話佢偏袒丘樹春同埋行事倉促,所以就延遲丘嘅署任期,最有可能延遲八個月先至俾佢坐正。即係話,丘可能最快要到明年三月,先至坐正首長。

林鄭性格懦弱 不會為港人發聲


林鄭上任前曾經接受外媒訪問,話港人不宜挑戰喺大陸發生嘅事。林和立相信佢已經將劉霞定義為大陸事務,絕對唔會掂。

大陸政局出名撲朔迷離,除咗習總想展示權威,又有冇可能係反習勢力反撲,嫁禍俾佢?林和立覺得呢個可能性低,因為能夠挑戰習近平嘅勢力應該唔多,而且就算挑戰佢都應該喺黨內搞。程翔就話唔知係咪咁,但習總草木皆兵睇到反習勢力應該存在,而且習總認為會威脅到自己。
仁哥喺記者會又講過,今次事件唔太似北京正式做法,擔心大陸混亂同複雜嘅政治情況,令權鬥伸展到香港,導致香港成為磨心。林和立就認為呢個機會唔大,因為香港政局已經穩定落嚟,林鄭亦已經得到北京授權推行強硬路線。
程翔就指出,香港由回歸第一日開始,已經好不幸地成為中共黨內權鬥嘅延伸點,因為香港被納入中國嘅政治版圖之後,一定受中共內部權鬥影響,例如每一屆特首人選由邊個決定,本身就係權力鬥爭嘅焦點。
不過有一件事兩人都幾肯定,就係林鄭唔會回應事件。林和立話林鄭講過香港人唔好搞大陸事,相信佢已經將劉曉波或者劉霞定義為大陸事務,所以絕對唔會掂。程翔就認為,林鄭唔敢對佢嘅權力來源表示強硬態度,加埋佢性格懦弱,唔會向北京講句強硬啲嘅說話。

鄧竟成再入 中資公司做高層


鄧竟成轉投私營市場做高層,佢做董事嘅公司,不約而同咁同中共高層扯上關係。(《蘋果日報》圖片)

前一哥鄧竟成 2011年離開警隊,過完冷河轉投私營市場做高層,原來佢做董事嘅公司,最近不約而同地跟中共高層扯上關係。
上個月,佢被上市公司香港國際建投( 687)委任做非執行董事,呢間上市公司去年四月得到海航集團青睞,由海航附屬公司 HNA Finance收購香港國際建投(前稱泰昇集團)約 66%股權,成為最大股東。
鄧竟成做緊香港航空副主席兼董事,香港航空又係海航嘅子公司。查實海航架構神秘,流亡富豪郭文貴就大爆,海航實情係由中紀委書紀王岐山家族持有。
嗱,鄧竟成今年二月做埋太和控股( 718)獨立非執行董事,太和控股前主席蔡華波上月在一片風波下辭任,蔡華波係邊個?話說佢上月密密增持大酒店( 45)股份,更被揭發疑似與習近平心腹、中共中央辦公廳主任栗戰書個女栗潛心關係匪淺,事關以蔡華波同栗潛心兩人姓名查冊,搵到佢哋共同成立一間叫 Chua& Li Membership Company Ltd嘅公司,同樣報住赤柱灘道獨立屋。
鄧竟成擔任董事嘅公司被指擁有深紅背景,佢花名叫做「 Sorry Sir」,唔知鄧 sir喺董事局企唔企得硬呢?

撰文:巫不言
mailto:news@nextdigital.com.hk

 

    tvb4life 發表在 痞客邦 留言(0) 人氣()