壹號幹線

當 SUV也有層次高低之別……  Range Rover Velar

贊助商連結

某程度上, SUV同食壽司好相似。如果要食得平,連鎖外賣店幾蚊件有交易;要果腹之餘又要好味,坊間壽司鋪幾十蚊件總不致虐待肚皮。至於想食得正宗,又要食材最新鮮,中環、尖咀一帶大把頂級壽司店,一餐 omakase閒閒哋收你二、三千,俾到你的就是頂級食材質素及貼心款待,係貴,但俾得甘心。
作為 Range Rover第四位成員, Velar定位就是要將 SUV豪華層次推向頂峰,在為求靚、為求豪華、為求舒適的大前提下,成就出專為對質素有要求客戶而設的高層次 SUV。

先講身世, Velar是 Range Rover旗下第四部作品,定位及車體是介乎 Range Rover Sport及 Evoque之間的 mid size SUV,強調流麗外形及極致豪華車廂設計,車架結構及傳動配備源於同集團 Jaguar F-Pace。集團表明兩車接近同時開發, F-Pace注重動感及操控, Velar則着眼於高舒適水平及強悍越野能力,理論上兩者不存競爭喎……

從外靚到內

售價:未定
引擎: 2995c.c., V6;前置,四輪驅動;機械增壓
馬力: 380匹/6500rpm
扭力: 45.9kgm/3500-5000rpm
波箱: 8前速自動(附+/-模式)
加速: 0-100km/h 5.7秒
極速: 250km/h
長/闊/高: 4803/2032/1665mm
重量: 1884kg
耗油量: 9.4L/100km(公路及市區綜合計算模式)
查詢: Land Rover HK
網址: http://www.landroverhk.com 
*Velar P380

讚一讚
SUV選美會頂頭大熱,線條愈嗒愈有味道;車廂氣氛盡展身價;同級有佢咁舒服,亦肯定冇佢咁爬得!

彈一彈
雙層輕觸屏幕介面略欠 user-friendly;後側窗不設窗簾。



P380是現時 Velar最 top型號,採用三公升 V6 Twin-Vortex機械增壓引擎,馬力輸出 380匹,並透過 ZF 8HP70 8速波箱傳送動力。其特性是扭力帶廣闊,雖不會有突發性動力遞增,卻勝在輸出平穩兼線性,快慢揸都易於適應,正好合乎高貴身份。

Range Rover Velar

嚴格來說, Velar並非全新車系,早於 1969年便出現,但當時只是一部沒有投產的雙門試驗品(小圖),幾可惜。在外形上,新 Velar仍維持現行設計詞彙,睇落好似 Evoque及 Discovery Sport,但 2874mm軸距明顯較長,實際上亦大部好多,而且運用線條簡潔利落,其實唔易搞錯。







1969 Velar prototype 

示範車附設自動泊車系統, S及 L位都泊得掂,但只限於「極闊落」車位。



中控台布局盡展身價,採用更為簡潔的全新設計, 12.3吋儀錶屬全數碼設計,一樣可以變大變細;皮革使用量固然毫不吝嗇,用料靚之餘更用上頂級的雙繡線,更為欣賞是金屬修飾都有認真處理,例如門抽、冷氣位外框、轉波撥片……等,都是由一整件金屬製成,觀感觸感皆屬頂級之作。

為了靚靚, Velar可謂無所不用其極,例如因 Matrix-Laser LED頭燈要特別扁平(望落要眼神凌厲),整個燈組結構便要重新規劃;又例如要側線望落乾淨利落,門抽亦首次採用隱藏設計( 8km/h後會自動收藏),因此成本特高,自然會反映在車價之上……






車廂焦點必然是首創的 Touch Pro Duo操作中心,由兩組 10吋扁平輕觸屏幕組成,上層全要負責車輛設定、導航、通訊,下層則負責行駛模式、冷氣、座椅操作,兩個實體旋鈕亦可因應需要而切換調控功能。個人亦認同意念好創新,不過因功能分布頗零碎,往往需要長時間熟習才一步到位,不過它的設計實在太靚,雖有少少難度,但一樣照單全受。









頂級 1600W音響由英國同鄉 Meridian監製, 23隻喇叭遍布每個角落,音樂味濃厚,包圍感及定位亦屬 hi-end級數。



軚盤左右設有實際操作鍵,附設輕觸及捽上捽落(如音量)功能外,更可隨時切換及對應不同系統操作,勁 hi-tech。



新車以倫敦 Design Museum作為全球首發地方,可想而知 Velar賣點固然與設計有關。因此為了讓 SUV外形昇華至更高層次, Velar採用特高腰線、扁車窗、 two-tone及特大輪圈設計。講到尾,即係要變得更跑車化,而睇嚟,亦都非常成功。



Velar所提供到的駕駛感,就是全面舒適及豪華,無論是隔音、濾震、穩定性多方面都以舒適為最大前設,着重於表現優雅細緻的駕駛氣氛,調校上與以操控動態為重的 F-Pace截然不同,性格及定位上也是南轅北轍,基本上不存在所謂的「同門內訌」。



前座似乎冇乜特別,其實暗藏許多玄機,原來 two-tone色中隱藏了英國旗圖案;蝴蝶式頭枕可向內拗;電動氣壓調校多達 20種方向;識發熱、懂滲風,仲曉得揼骨推背。 SUV嚟講,你都算招積!



始終是中型 SUV,為擦鞋保住份工話後座好闊始終唔係小弟風格,不過實情多方面空間都順利過關,坐姿舒適自然,窩心位是兩邊都呈微桶狀,快車或撈泥,都坐得特別穩陣。



車架 81%鋁合金製,抗扭能力肯定「硬淨」過我份工,亦加入 Terrain Response 2越野裝置,可自由調校車高幅度 251mm,亦預載針對不同路況的越野模式及輔助設施,無論幾嚴峻地勢,統統變成 easy job。

尾箱基本容量 673公升,透過可作 40:20:40後座翻摺,可擴充至 1731公升;至於電動尾門?點會冇啊!









涉水深度達 650mm,冇幾多部同級對手能及,就當你唔怕死火兼入水,但冇專業級數四驅系統幫忙,你個人敢衝落去,部車亦都未必行得郁。

撰文:廖宏俊
攝影:(挪威)
mailto:features@nextdigital.com.hk

 

    文章標籤

    Range Rover Velar

    全站熱搜

    tvb4life 發表在 痞客邦 留言(0) 人氣()