短篇小試

無上裝最吸引  Audi A5 Cabriolet 40 TFSI

贊助商連結

雖然 Audi用咗好多時間同金錢去開發 SUV,但只要睇睇街上面有咁多 Audi SUV,就知此舉絕對明智! SUV大賣,但都冇影響到其他車系開發,早前到港嘅 A5車系唔單只有五門 Sportback版,更有硬頂 Coupe及開篷 Cabriolet版本,可算係外表最多變嘅 Audi車系。今次測試嘅開篷版用上火紅色車身及經典電動軟篷,外觀上肯定係 A5車系中之最!想展現 A5 Cabriolet最靚一面,畀 15秒時間佢打開軟篷,包你唔會失望。

車系中最靚

五月引入香港嘅 Audi A5車系,以 Sportback型號打頭陣,接住再推出 S5 Sportback,車廠一直未安排測試 Coupe及 Cabriolet版,似乎想以 Sportback為主力。然而筆者認為,市場主導情況下以 Sportback為重點都無可厚非,但 A5嘅誕生意義係一款「跑車化 A4」,雙門嘅 Coupe及 Cabriolet先最叫人期待。 A5 Cabriolet車身設計毋疑係重點,由頭燈開始、伸延至尾燈嘅腰線,比 Sportback版更簡潔。而由於 Cabriolet版堅持採用電動軟篷,因此開合機關都比同級嘅 BMW 4系電動硬頂更緊湊及輕量,車速 50km/h以下即可運作,開篷只需 15秒,而閂篷就耐少少, 18秒搞掂。 A5 Cabriolet嘅最靚狀態當然係開篷,甚至連車窗都唔好升起,全因車身上半部、由 A柱至車門及軟篷框,都由磨沙銀色金屬邊圍繞,只有開篷先可以完全展現。




開篷形態永遠最靚,就算 Coupe同 Sportback都比唔上。


堅持採用電動軟篷,比硬頂更輕量化,全開只需 15秒,全閂都只係 18秒。 唔快都好揸

眾所周知最強版本嘅 A5將會係 RS5,馬力達到 450匹,但對一心只想揸部開篷車享受下日光與清風嘅人, 450匹係多餘,或許 200匹都嫌多,遊車河要咁大馬力做乜?今次測試嘅 A5 Cabriolet屬 40 TFSI版本,身懷 190匹馬力、 2.0公升 turbo引擎,根據廠方數據, 0-100km/h加速需時 7.9秒,唔算好跑得,但正好感受到 A5 Cabriolet嘅車架結實程度。測試時大部分時間都開篷,採用「動力」駕駛模式,引擎出力唔算粗暴,同波箱一樣只可算 sporty,未及 S5咁聲威力猛。
最令筆者感受深刻係懸掛表現相當好,喺運動化同舒適性間有極好平衡,唔會一味得個硬字去抵抗車身傾側,駛過凹凸不平路面可以迅速淡化震動,似 A6咁舒適。正因為 40 TFSI版本有咁嘅表現,筆者覺得好啱只求有開篷車嘅瀟灑外表及唔開快嘅用家,想快又想更威? S5 Cabriolet先係你杯茶。




中控台熟口熟面,同 Sportback版完全一樣,簡潔耐看, Audi近年佳作。


後座為雙座位設定,空間唔算狹窄,成年人坐都唔辛苦。


電動前座只屬基本版,未有預你激烈行車,所以以舒適取向為主。


7速 S-tronic波箱表現稱職,轉用「動力」模式後,轉波速度更快。


共有五種駕駛模式,其中「個性化」可以設定多個項目。


2.0公升 turbo引擎留有餘力,唔將馬力催谷可令輸出更平順細緻。

Audi A5 Cabriolet 40 TFSI spec.
引擎: 1,984c.c.直四 turbo
馬力: 190hp/4,200-6,000rpm
扭力: 32.6kgm/1,450-4,200rpm
傳動: 7前速自動、附+/-模式
車身: 4,673× 1,846× 1,383( mm)
軸距: 2,765mm
0-100km/h: 7.9秒
耗油: 5.8L/100km
售價:$499,900起
查詢: Audi HK( 2528 1861)

撰文:袁國基
攝影:葉偉豪

 

    文章標籤

    Audi A5 Cabriolet 40 TFSI

    全站熱搜

    tvb4life 發表在 痞客邦 留言(0) 人氣()