Dream Car

特殊部隊  Jaguar F-Type SVR Convertible

贊助商連結

自從 Jaguar Land Rover於 2014年成立 SVO( Special Vehicle Operations)部門後,車廠投入大量人力物力加快開發步伐,務求令呢個專責「特殊任務」嘅部門打響名堂!
Jaguar首個由 SVO操刀嘅項目 F-Type SVR Convertible終於到港,定位完全凌駕所有 F-Type,係車系中最強、最頂級!
有幾強?有幾頂級? 575匹馬力、 0-100km/h只需 3.7秒、車價高達$2,688,000起,已去到 M-AMG GT R嘅級數!
更重要係 F-Type SVR Convertible外表擺脫典雅貴氣,辣味前所未有咁強!
等咗咁多年, Jaguar終於再次踏足 supercar領域。

一直以來,車迷都忘記咗 Jaguar係一間有能力製作 supercar嘅車廠,或許係豪華房車形象太深入,又或太耐冇造出驚人嘅跑車,被遺忘都唔怪得人。其實 Jaguar一直存在於 GT跑車市場,但以往嘅 XKR太偏向舒適,外表亦過份斯文,未夠熱血!人哋德國車廠求其搵部四門房車個樣都激過你,點發圍?所以 SVO接手 F-Type第一件要做嘅事係車身大裝修!

突兀碳纖尾翼

F-Type本身已經係一部相當靚嘅跑車,但礙於形象,就算 R版嘅外表都未算誇。 SVR定位更高,得到 SVO部門「黃袍加身」,可以話攞正牌「玩大」個外觀!先係車頭用上全新設計泵把,兩側入風口更大,而頭唇下亦增加多一小片導風板,一來可以加強氣流導入引擎艙散熱,二來外觀惡咗!細心啲睇仲發覺頭冚散熱孔更大及改咗位置,前輪沙板後又加埋導風槽。
不過要數全車最激位置,一定係車尾!不論硬頂還是開篷版,都加上電動升降碳纖尾翼,雖然未至於好飛仔,但加喺完成度極高嘅車尾上,總係覺得好突兀,始終唔慣大尾翼出現喺 Jaguar上。裝得尾翼當然有原因,據廠方表示 100km/h時或啟動 Dynamic模式時,尾翼會自動升起,可提供比 F-Type R低 2.5%風阻及增加 15%下壓力。車重方面, SVR版本比 R版下調 25kg,當中有 16kg由全新嘅排氣系統貢獻。尾喉外表上同 R版嘅不鏽鋼款相似,但其實改用鈦合金加鉻鎳合金製成,更耐熱、更輕量!甚至尾鼓內嘅氣閥都係鈦合金製,徹底輕量化!




F-Type SVR嘅車尾係最大亮點,前所未有地加上升降碳纖尾翼。


整套排氣系統都作出升級,連尾喉都刻有 SVR字樣,罕有!


頭冚仍然有散熱孔,但面積更大,位置亦移至更接近頭冚中央。


20吋灰色鍛造鋁合金軨及紅色迫力鉗都係 SVR專用設備。 獨有豪華車廂

SVO部門唔單只追求性能,豪華舒適都係重要一環,所以 F-Type SVR唔會出現好似賽車咁嘅簡約車廂,相反係比正常版更豪!打開車門即時見到門板及座位都用藍線配黑色真皮製成 Lozenge Quilt菱形格仔,賣相非常典雅,而且門板用咗 MERIDIAN嘅喇叭,高級!不過有一點比較奇怪,就係猄皮物料只會出現喺駕駛席一邊,表板台、冷氣出風口,甚至軚盤都用上猄皮,但乘客位前方一大片位置就用返黑色真皮,如果統一用猄皮會更靚。
全電動調校嘅座位有極好包承效果,冇投訴,但軚盤直徑偏大及未有用上 R版嘅平底款式,握持感仍有進步空間。此外,車廂內其實都暗藏唔少「 SVR」專用標記,首先係金屬門檻及座椅頭枕,大大隻字實睇到,軚盤六點鐘位置都有小標記,而最靚一定係中控台 touch mon.上嘅暗黑標記,要反光先睇得清楚,夠晒低調!




駕駛艙其實集跑車與豪華房車元素於一身,可供車主日常舒適使用。


座位用上 Lozenge Quilt菱形格仔花紋,根本就係豪華房車級數。


專用軚盤當然唔少得獨有嘅 SVR標記,但如用上平底款式會更吸引。


座椅頭枕都有壓字,配合黑色皮及藍色縫線,夠晒獨特。


金屬門檻嘅 SVR字若隱若現,低調得來有貴氣。


中控台上暗藏 SVR刻字,低調得來夠晒特別,唔使次次都咁張揚嘅。 喉聲嘈到拆天

唔好以為 SVR會用新引擎,其實都係用 F-Type Project 7嘅 5.0公升 V8 supercharged引擎,一樣係四驅,有 575匹馬力及 71.4kgm扭力,一舉將 0-100km/h加速時間由 R版嘅 4秒縮短至 3.7秒,正式打入 supercar嘅「 3秒俱樂部」!加速快只係簡單嘅改進, SVO部門更為 SVR嘅 8速波箱及四驅系統改良反應,轉向系統部分轉用鋁合金部件,配合埋專用 20吋鍛造鋁合金輪圈,令轉向反應更敏銳。
實測開篷 F-Type SVR,最令人深刻並唔係加速力及操控功夫,因為比佢好嘅車實在唔少,而且筆者發覺懸掛縱使用上 Dynamic模式都係同 Normal分別唔大,偏向舒適性,可以當日常腳車用。不過排氣聲實在係驚人,可以肯定車廠有心「玩嘢」,因為 Dynamic模式谷至 3,000rpm就有巨大及尖削嘅爆響,足以令全個停車場嘅車誤鳴防盜,如果再踩至 5,500rpm打後,音頻更高、更響,同落場賽車非常接近!慢車就冇聲?錯嘞,只要油門定住 2,500-3,000rpm範圍,縮少少油門都會有 backfire聲,死未?對比車廂陳設,係咪有啲精神分裂?當然都有舒緩辦法,就係全程轉用 Normal模式行車,喉聲會降低 50%以上,無咁重口味。




5.0公升 V8 supercharged引擎嘅最大馬力進一步催谷至 575匹, 3.7秒就可以完成 0-100km/h加速。


8速 Quickshift波箱都有升級,比 R版有更快轉波反應。


Dynamic模式內可供用家自行設定引擎出力、波箱反應、轉向反應及懸掛硬度。





SVO特別炮製

SVO( Special Vehicle Operations)部門個名咁有型,而背後成件事都一樣咁型!係車廠專責製作特別車輛嘅部門,主力向三大核心研發:跑車性能、豪華設備及越野性能。 SVO技術中心佔地達 200,000平方呎,擁有 VIP專屬陳列室,只限獲邀貴賓先可以入內,透過掃描及電腦化技術模擬一系列顏色及個人化設備,供買家「預視」新車係點嘅樣。此外, SVO嘅車身噴油部佔基地超過一半面積,可以為客人配製獨特車身色,據知基本色都超過 15,000種!
每部 SVO出產嘅車都會通過最嚴格品質測試,工作間有最尖端照明技術,確保微少嘅色澤瑕疵都唔會出現。除咗 Jaguar F-Type SVR外, Land Rover都有兩款 SVO出品,分別係 Range Rover Sport SVR及 Range Rover SVAutobiography。




SVO基地內有獨特照明系統,全個廠房整潔得如高級商店。


唔單只製作 SVR系列,更為客人度身訂製特殊車輛或經典車修復。 

Jaguar F-Type SVR Convertible spec.
引擎: 5,000c.c. V8 supercharged
馬力: 575ps/6,500rpm
扭力: 71.4kgm/3,500rpm
傳動: 8前速自動、附+/-模式
車身: 4,475× 1,885× 1,308( mm)
軸距: 2,622mm
0-100km/h: 3.7秒
耗油: 12.0L/100km
售價:$2,688,000起
查詢: Jaguar HK( 2821 7147)

撰文:袁國基
攝影:葉偉豪

    文章標籤

    Jaguar F-Type SVR Convertible

    全站熱搜

    tvb4life 發表在 痞客邦 留言(0) 人氣()