坦白講

我哋都係筍盤

贊助商連結

黝黑皮膚,六腹肌,是不少男士的夢想。廿三歲的彭柏軒( Johnson)也流過不少汗水,不過不是在健身室,而是在地盤內。
讀大埔的英文中學,成績差,讀到十八歲,仍是中三學生。讀書不成,入行做紮鐵,第一日已經想放棄,到依家兩年,都叫吃得苦。二千蚊一日,一個月返十幾日工,月入最少兩萬蚊,不過自覺受到 90後港女歧視,至今未搵到女友。

我連紮鐵都唔知係乜嘢,就報讀建造業嘅紮鐵課程,咁就入咗行。紮鐵真係好辛苦,我入行時係夏天,成三十幾度,仲要搬條鋼筋,花咗成個月先適應到。最終成個夏天都捱得過,所以一年四季都無難度。
第一日落地盤做嘢,攰到連午飯都食唔落。嗰時好想唔做,但係諗起自己用咗四個月讀紮鐵課程,冇理由做一日就放棄唔做,嗰陣我嗰班有兩個同學一齊入行,佢哋做咗一日就頂唔順走咗。好彩我自細鍾意做運動,慢慢適應咗就唔覺好攰,有時放工仲約吓朋友食飯,放假又去行吓山咁。
記得最初同朋友講想做紮鐵,成大半班人話我捱唔到。又事實係多後生仔為錢入行,但係有一半都捱唔住。反而三、四十歲嗰啲人,有家庭負擔要養家,佢哋就會相對捱得。屋企人好錫我,佢哋想我後生試多啲嘢,冇反對過我入行,只係話如果覺得辛苦就唔好做。咁我自己讀書又唔叻,想學番一門手藝,趁後生搵多啲錢,做自己想做嘅事,搵錢結婚、買樓,所以一直堅持落去。
上一代好多地盤佬都係大陸偷渡落嚟,冇乜讀過書,俾人感覺就係文化水平低。我哋呢一代讀過吓書,仲有人係大學生,唔再係粗口爛舌冇文化。職業無分貴賤,香港嘅建築物都係靠建築工人起出嚟,唔應該再睇唔起地盤佬。有學歷就人工高啲?我覺得呢個未必係啱嘅概念,仲有人際關係或者自己努力。唔好再覺得做地盤無前途,我話你知其實做耐咗,有機會升做管理層。

我哋吃得苦,又有責任感。好多家庭都係靠一個做地盤嘅爸爸養起成頭家,好應該值得尊重。不過好多九十後女仔對做地盤仲有啲偏見,係呀,所以到依家我都未搵到女朋友。佢哋可能覺得做地盤係污糟邋遢㗎啦,但係我收咗工都好鍾意乾淨,又會買衫 gel頭扮吓靚,我相信有一日會搵到一個識欣賞我哋嘅人。

撰文:郭曉韻
攝影:葉漢華
mailto:news@nextdigital.com.hk

 

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()