黃又南升呢做「老竇」

贊助商連結

一〇年「中國小姐」香港賽區冠軍及全國季軍嘅趙哲妤(Uny),舊年意外懷有分手男友嘅骨肉,而對方竟然狠心到唔肯承擔責任,仲勸佢墮胎添。不過, Uny最後毅然將BB生落嚟,更加決定獨力養大佢。

Uny嘅囡囡舊年十二月提早出世,跟媽咪姓趙,個名叫真羽,乳名小魚。好彩,Uny身邊有好多朋友幫忙,令佢都倍感安慰。小魚除咗有契姨媽筱靖錫到燶之外;一四年,曾經同Uny合作拍微電影嘅黃又南,一樣對小魚關懷備至,仲做埋佢契爺。Uny同東姑講,又南份人好nice又有愛心,自從三年前合作過之後,就成為咗好朋友。「我生咗之後,佢都嚟探咗BB幾次,又買咗好多玩具畀BB,佢仲自動請纓話要做BB嘅契老竇添。」

早排,喺內地拍完嘢返咗嚟嘅又南,見自己有少少時間, 即刻又走去探契女。不過,呢日小魚似乎好眼瞓,又南等咗三個鐘,契女都唔肯起身;但又南冇放棄一直等,等到自己都瞓着埋。當又南起身,見到小魚醒咗,但佢又玩心情,唔肯理契爺,搞到又南欲哭無淚,呢個情景令Uny笑咗好幾日。

黃又南抱住B女小魚時,笑容甜到入心,契父女之情,盡在不言中。

 

小魚已經半歲,得意又可愛,搞到又南對住佢非常肉緊。

 

愛心爆棚嘅又南,趁B女瞓着咗,小心翼翼咁幫佢剪指甲。

 

早前,又南探望時,小魚竟然做咗大懶豬,仲一瞓就瞓咗半日。

    全站熱搜

    tvb4life 發表在 痞客邦 留言(0) 人氣()