上年 11月, Doris及 Edwin於旺角中心開設 Healahoma,以 hea為主題,希望用一杯飲品的時間放鬆自己,但 Edwin笑言開鋪後,反而自己冇得 hea。

創業通

相機先飲  90後賣漸層特飲

贊助商連結

夏日熱辣辣,除了飲杯凍檸檬茶之外,還可以試試 Healahoma的漸層特飲,外觀呃 like兼可消暑解渴。 90後情侶 Doris和 Edwin不甘做一世打工仔,本着人一世物一世甚麼都要試的精神,成立 Healahoma特飲店,從市集做起,再到旺角開實體店。為了吸客,他們不停諗橋,包括推出季節限定飲品,及與本地手作人合作,讓一眾年輕人相機飲先。




採訪當日,見店前有一班客人聚集,等待一杯色彩鮮艷的漸層特飲。

採訪當日,記者來到位於旺角中心的 Healahoma,店前有一班客人拿着一杯杯色彩鮮艷的漸層特飲,有些甚至即場自拍打咭呃 like,店主 Doris不忘提醒客人要攪拌後才飲。「漸層特飲即漸變顏色嘅水果飲品。我哋最受歡迎係 Blue Monday,唔好以為藍色就一定好難飲,其實係好清新嘅柑橘青檸口味,唔會太甜。」 Healahoma共售 14款漸層飲品,售價由$20至$28不等,可加$10轉多用途玻璃樽,客人以行商場的年輕人為主。

用一杯飲品 hea時間

情侶 Doris和 Edwin分別畢業於城市大學的市場學系及 VTC的紀律部隊毅進文憑,他們創立 Healahoma原意希望用一杯飲品的時間放鬆自己,拋開生活壓力。 Doris說:「香港人嘅壓力大到連 hea下嘅時間都冇,所以我哋想用飲一杯嘢飲嘅時間,畀大家 hea得幾多得幾多時間,不過我哋開咗呢間鋪後,反而冇得 hea。」
15年, Healahoma從擺市集及 event開始做起,最初只售賣 3款飲品,並以特別造型的器皿盛載來吸引客人。 Doris說:「我做咗市集搞手兩年,初時發現市集冇小食檔,亦留意到客人行行下會話口渴,我就忽發奇想不如開一檔飲品店,畀佢哋一路行一路飲。要吸引客人,一定唔可以賣普通果汁或珍珠奶茶,要喺顏色及視覺上取勝,咁啱當時興漸層顏色,我哋諗到整漸層飲品,再加燈泡造型嘅樽身,畀客人相機飲先及打咭呃 like。推出後反應好好,日賣五十幾杯,仲好多人打咭 tag番我哋。」




Blue Monday$25( cup)/$35( bottle)記者一飲入口,便散發清爽的檸檬味,加上有氣梳打水,非常適合炎炎夏日的天氣。


Rose Garden$25( cup)/$35( bottle)荔枝口味配上玫瑰花瓣,最啱用來打咭。


Sunset$28( cup)/$38( bottle)以橙味為主調的雜果賓治,口感豐富。


Grasshopper$20( cup)/$30( bottle)蜜瓜加檸檬口味的梳打,口味清甜。 揀旺中攻年輕人

因為市集的成功,令他們乘着相機食先及打咭呃 like的熱潮,嘗試開實體店。 16年 5月, Edwin及 Doris決心辭工並與兩位友人合資 30萬開鋪,他們四出找合適的鋪位。 Edwin表示:「初時我哋想喺葵涌廣場 3樓搵鋪位,貪嗰度人流多又多小食店,但無奈鋪租太貴,一個百幾呎嘅鋪要 5萬租,惟有考慮其他地方。之後見旺角中心想搞小食區,發展成類似葵涌廣場,引入唔同嘅小食店,我哋見旺中嘅租金平少少,加上多年輕人喺附近買衫,可以邊 shopping邊飲嘢。」
Doris及 Edwin看輕了開鋪的難度,發現與到市集擺檔是兩碼子的事,無論裝修、牌照、入貨等都一腳踢,遇上不少的困難。 Edwin說:「初時唔識度尺,畀錯尺寸裝修師傅,成日俾師傅鬧,但都學識咗點同佢哋溝通。另外,因為資金有限,好多嘢我哋都要親力親為,希望用最平嘅價錢做到最好嘅效果,例如收銀機枱係自己買材料砌,出面買要成 8千一張。」




最近 Healahoma與 D2 place合作擺設 pop-up store,以懷舊香港特色小食為題,為期兩個月。限定店只售 4款漸層特飲,包括 Blue Monday、 Sunset、 Grasshopper及 Rose Garden。


Doris邀請本地插畫家 johnee( Galaman)當一日店長,客人出題, johnee便會即場畫畫。


Healahoma曾與《大力冰室》 crossover,推出一系列以水果為題的卡通人物,更印成 postcard及襟章,深受客人歡迎。 Doris表示:「客人會幫公仔改名,話我想要『檸檬仔』或『蜜瓜妹』嘅 postcard。」 少數服從多數


Doris及 Edwin一有時間便會研發新口味,「早排好興芫茜食物,有諗過將芫茜加落去飲品,但真係太難飲,所以放棄咗。」

牌照方面,他們以為跟足網上的條例便申請到,原來他們沒留意當中的細節,「好似要有照鏡位,即牆身及地面嘅連接位唔可以成 90度,之後要重新將連接位整成內彎,最後要搵牌照顧問幫手先申請到。另外,人多就自然意見多,試過會為吧枱毛巾嘅擺位嘈一餐,為免拍檔之間有衝突,最後以少數服從多數嚟解決問題,都明白大家係為鋪頭好。」
16年 11月, Healahoma正式開業,剛巧旁邊的小食店亦陸續開幕,加上旺角中心的宣傳吸引不少傳媒的報導,引起熱潮,但 Doris及 Edwin明白單靠飲品難以長久,面對競爭,需要不斷構思 gimmick才能令 Healahoma繼續發展。
Doris表示:「我哋同喺市集認識嘅插畫師 johnee( Galaman)及《大力冰室》合作, johnee經常喺 facebook開 live直播畫畫,吸引唔少年輕妹妹,所以喺 3月邀請咗佢擔任一日店長,凡有幫襯嘅客人都可以出題畀佢畫。之後聯同《大力冰室》推出一系列 Healahoma水果卡通人物,可以畀人影相呃 like,之後仲印埋 postcard、襟章及電話殼,客人可以單買或買嘢飲加錢換領。」

推出期間限定

除了跟手作人合作外,他們亦推出更多新口味的飲品,現有 Blue Monday、 Sunset、 The Chilli Sauce、 Green Head Son及 Forest等共 14款漸層特飲供應。 Doris說:「靠 3隻味道一定唔夠,我哋不停研發新口味,試下唔同水果嘅配搭,好似青蘋果嘅酸味及青瓜嘅腥味,口感清新,加上梳打水非常適合夏天。另外,我哋會因應節日推出期間限定特飲,前排情人節推出咗荔枝乘葡萄柚嘅口味,藍色配粉紅色。雖然冬天生意會比夏天少 2至 3成,但冬天會推出更多嘅期間限定,可增加番 1成生意。」
現時除了旺角概念店外,最近更與 D2 Place合作擺設 pop-up store,他們更有接 event及擺市集,月賺約 2萬。問及未來目標, Edwin表示:「暫時希望做好 Healahoma呢個名,始終我哋經驗淺想觀察及請教其他食店嘅經營之道。」




沖調 Blue Monday先落柑橘的濃縮果汁做底,再加少量青檸汁及加冰至一半樽身。


最後加上梳打水及汽水,用長匙輕輕攪拌,加強漸變色的效果。


為了增加銷情, Healahoma不時會推出新品。圖為情人節期間推出的荔枝乘葡萄柚,屬節日限定口味。 

Yannie 客人
同朋友一齊行街買衫,知道一樓開咗小食區就順便試下,見到呢度嘅飲品顏色好繽紛,就買咗 Rose Garden試下,味道好清甜,荔枝味唔會好假,下次經過會試其他味。



Isaac 客人
喺 facebook見到有傳媒報導過,就同女朋友嚟試下,買咗杯 Blue Monday,初初以為藍色會中伏,但飲落有青檸味,好解渴。

開業成本
租金:$152,000( 3按+1上)
裝修:$100,000
器材:$25,000
入貨:$40,000
牌照費:$20,000
總投資:$337,000

每月開支
營業額:$110,000
租金:$38,000
差餉、管理費、電費:$4,500
人工:$25,000(老闆 2人+兼職 4人)
入貨:$22,000
盈利:$20,500

HeaLaHoMa
旺角中心一期一樓 F86A

撰文:邵苑雯
攝影:林文樂、葉偉豪、部分圖片由被訪者提供

    tvb4life 發表在 痞客邦 留言(0) 人氣()