長期測試

四門 911  Porsche Panamera 4S

贊助商連結

長測 Porsche Panamera 4S係一個難得嘅體驗,難得在可以載住四個成年人舒舒服服一嘗近似 911 Carrera嘅感受。 911 Carrera只有雙門及聊勝於無嘅後座, Panamera 4S就唔同,四門、四座、四驅,兼具有 440匹馬力,根本就係一部家庭用嘅 911 Carrera。筆者就係用咁嘅心態用咗 Panamera 4S四日三夜,揸咗超過 350km,得出結論係: 911 Carrera都未有佢咁全面!

Porsche Panamera 4S SPEC.

引擎: 2,894c.c.V6 twin turbo
馬力: 440hp/5,650-6,600rpm
扭力: 56.1kgm/1,750-5,500rpm
傳動: 8前速自動、附+/-模式
0-100km/h: 4.2秒
耗油: 8.2-8.1L/100km
車身: 5,049× 1,937× 1,423( mm)
軸距: 2,950mm
車價:$1,893,000起
查詢: Porsche HK( 2926 2911)

車廂舒適性高

唔打算用多筆墨形容 Panamera 4S嘅外表,簡單啲講,就係放大咗嘅 911。比 911多咗兩隻後座門,車身亦長得多,再加上前置引擎佈局,令後座空間幾近 911嘅兩倍!而且 Panamera 4S為令後座舒適性達到最高水平,只設兩張獨立 sport seat,承托力極其出色,仲要有埋電動調節坐姿、冷/暖坐墊、電動太陽簾及天窗,論舒適性同前座不相伯仲,多日來載過多位朋友及老人家,都讚不絕口,要知一部 Porsche得到老人家讚,實在唔簡單,就算 Cayenne都被我老媽子話車身高,上落車有困難。
後座得人心,駕駛艙都有好好表現,大幅減少波棍旁嘅實體按鈕係最正嘅改動,唔會再睇到眼花,黑色嘅 touch pad其實內藏多個系統按鈕,只要輕輕力撳,就有震動回饋,不失為一個實用又簡潔嘅設計。此外,表板都同 911似到十足,只留低中間實體轉數表,兩側都係 7吋 mon.,有利多功能顯示。中控台有兩點值得留意,一讚一彈; 12吋 touch mon.顯示極多功能,尤其插入 USB播歌可以同時顯示多個大碟封面選歌,筆者從未見過有介面可以咁堅!讚!巨 mon.下嘅中央出風口只可以用 touch mon.操作,實在極度多餘嘅反智設計!彈!




全新設計嘅駕駛艙非常簡潔,比上代吸引得多!


雙獨立後座有好高舒適性,肯定係目前最舒服嘅 Porsche。


前座都有製冷/暖功能,而且誇到可以設定冷/暖位置分佈!


播放音樂介面可以讀取 USB內所有大碟封面及一次過 showoff,方便!


伸手去 touch mon.操控下面嘅冷氣出風口?會唔會多餘咗啲? 必加後輪轉向

近年 Porsche好興將後輪轉向列為額外選配設備,好似 911咁短車身,加唔加嘅分別唔及 Panamera 4S咁明顯,測試車已加咗呢套稅前值$17,100嘅後輪轉向系統,令到車長超過 5米都可以有靈活矯捷嘅低速彎及穩定高速彎,買得車冇理由唔加。雖然 Panamera 4S唔係最頂級版,但都配 440匹、 2.9公升 turbo引擎,喺 overboost功能幫助下,可以 4.2秒完成 0-100km/h,以咁大部四門車嚟講絕對唔簡單!而筆者多日來有過半數時間用 Sport Plus或 Sport模式,懸掛及引擎輸出雖未至 911咁剛烈,但都充滿跑味,有好幾位後座乘客話尾喉聲有啲滋擾、懸掛稍硬,但作為駕駛者, Sport Plus或 Sport模式最好揸!最有 feel!不過唔緊要, Panamera 4S仲有較 soft嘅 Normal模式,一轉用即時冇投訴,好適合既要自己 enjoy駕駛,又要載人嘅用家,一部搞掂。
測試四日三夜共行 352.5km,電腦計出平均耗油為 14.1L/100km,即大約$2.1/km,好合理嘅數值啦,買接近 200百萬嘅車,唔係同我計呢啲嘛?




引擎比上代輕巧,但馬力上調至 440匹,加埋 overboost功能, 4.2秒搞掂 0-100km/h。


8速 PDK波箱可能係目前最好波箱之一,快、狠、準兼備。


行車模式扭掣設於軚盤四點鐘位置,方便咗好多。


其實 352.5km當中有頗多時間用 Sport Plus及 Sport模式行車, 14.1L/100km耗油相當合理。


尾翼雖然冇 Turbo版咁誇張,但以隱藏式尾翼嚟講,都算幾大隻。

撰文:袁國基
攝影:葉偉豪

    文章標籤

    Porsche Panamera 4S

    全站熱搜

    tvb4life 發表在 痞客邦 留言(0) 人氣()