新車激試

九年一大變  Mitsubishi L200 Sportero

贊助商連結

柴油私家車今年十月就暫別香港,一眾「柴油粉絲」當然喊咁口,但喊都冇用,獨行獨斷嘅政府又點會理?不如轉投柴油貨車陣營吧!雖然因為政府嘅低能政策只可以玩十五年就要劏車,但總好過冇得玩,而且今時今日嘅「貨車」分分鐘齊料過私家車!就好似剛剛抵港嘅新一代 Mitsubishi L200 Sportero咁,車上設備完全超出貨車範疇,同九年前嘅上一代比較,根本一天一地!最誇係車價只係貴咗幾千蚊!

Mitsubishi L200 Sportero Spec.

引擎: 2,442c.c.直四柴油 turbo
馬力: 181ps/3,500rpm
扭力: 43.9kgm/2,500rpm
傳動: 5前速自動、附+/-模式
車身: 5,205× 1,815× 1,780( mm)
軸距: 3,000mm
售價:$288,800
查詢:環宇汽車( 3913 8080)










尾斗面積巨大,差不多同車廂一樣大,載物比貨 van仲要多。

全新第五代 L200賣$288,800,呢個價錢莫講買唔到歐洲 SUV,只係剛剛夠買部日本中型 SUV咋,咁 L200以貨車身份又做唔做到 SUV嘅嘢?當然可以!而且有過之而無不及,筆者懷疑,如果 L200唔係掛上 Mitsubishi牌頭,分分鐘賣$350,000以上,今次係賣大包!

日系前衞賣相

其實當 Pickup(農夫車)愈來愈豪華、愈來愈齊料時,就自然有人諗到用 Pickup代替私家車,情況就好似有人出部 Hiace貨 van當私家車用一樣。你可能會話:「貨 van有咁大個尾廂,可以載好多嘢, Pickup得個尾斗,載唔到嘢!」少年你真係太年輕嘞, Pickup尾斗都可以加裝頂蓋,使用上同貨 van冇分別,而且靈活性更大!更重要一點係絕大部分 Pickup係高車身四驅,可以堅爬山、堅涉水,貨 van遇到上星期嘅巨雨天氣,肯定可以收工, Pickup嘛?定過抬油咁過水氹囉!
Pickup被當成私家車用嘅風氣可以話大約十年前開始,當年嘅泰國版 Toyota Hilux紅極一時, Mitsubishi代理都乘勢喺 2008年引入上代 L200,當年嘅賣相同設備都頗接近 SUV,所以銷量都唔差。事隔九年嘅新一代外表有明顯升級,車頭用上大幅電鍍飾板及流線形頭燈,連尾燈形狀都同頭燈呼應,有用過心思,似日式 SUV。新一代車長達到 5,205mm,比上代長咗 205mm,但車高就保持 1,780mm,放心晒,仲可以泊到 1.8m限高有蓋停車場,貨 van就要泊露天日曬雨淋。




原裝門邊腳踏令到成個外表都高級咗,完全冇 Pickup工程車感覺。


尾泵把同車尾腳踏連成一體,而且賣相科幻。 任勞任怨近 40年

L200可以話係 Mitsubishi嘅貨車系列穩膽,由 1978年生產至今已經 39年及經歷五代,初推出時已有電油引擎及柴油引擎選擇,前期只得 4速棍波,後期先升級至 5速棍波。而第二代係香港最常見,當年唔少公司都選佢為工程車,不過亦因為粗用,現時好多都已被劏。第三代就最少見,尾期直頭冇引入香港,不過尾期已 facelift到個樣型仔咗,有第四代初型。第四代可以話係一個大改革,全車變得 SUV化,當年代理仲特別搞新車發佈會,商用車中少有。




初代 1978-1986


二代 1986-1996


三代 1996-2006


四代 2006-2016 根本就係 SUV

翻睇九年前上代 L200嘅試車報告,筆者當年已盛讚佢設備齊到好似 SUV咁,有天窗及電暖前座,新一代雖然冇咗呢兩樣設備,但其他設備有大幅度升級,唔係「好似 SUV咁」,而係「根本就係 SUV」!前、後座都設有手枕,而且後座背部冇因為尾窗而變得過份筆直,有少少斜度令乘客坐得更舒適。真皮軚盤賣相豪華之餘,仲首次加入音響控制、聲控電話功能、定速巡航系統及+/-模式撥片,比好多 SUV都要高級。此外,對稱嘅中控台上有原廠 6.1吋 mon.車機,對應原廠泊車鏡頭,又有恆溫冷氣系統同 USB插槽,完全追上現今私家車嘅步伐。不過要數最令筆者驚訝係 L200竟然有 keyless著車、斜坡起步輔助及行車越線警告系統,唔係 SUV咁簡單! L200嘅貨斗長 1,520mm、闊 1,470mm及高 475mm,同貨 van嘅長度差唔多,而且冇頂就代表有更大擴充可能性,加電動頂蓋、固定屋仔,又或由得佢 open咁放物件都得,好適合玩戶外活動, Mountain bike都可以放六架以上,勁過貨 van!







駕駛艙全面升級,完全冇商用車味,直頭好似豪華 SUV咁。


真皮軚新增多項功能,音響、電話、定巡及轉波,觸手可及。


表板唔算複雜,轉數表同速度表都係傳統指針式,最上方係四驅系統顯示。


連 Pickup都有 keyless engine start/stop功能同 LDW越線警告系統,實在豪得過份。


後座背內藏迷你千斤頂,而且仲有少少空間收藏物件。


後座空間充裕,而且有三個頭枕及活動式手枕,舒適性唔差。


前座有高度調節及手枕儲物櫃,最難得係用返原廠布料。 全地形無障礙

玩得 Pickup嘅人都預咗粗用部車,用佢爬泥坡、過水氹都少不免,更有可能用佢喺工地開工! L200根本就係為 heavy duty而設,四驅系統設有 2H、 4H、 4HLc及 4LLc,一個扭掣就可以切換,乾地、濕地、沙石地,甚至泥漿都可以輕鬆征服,連以往嘅「加力波」波棍都慳返!既然預咗玩越野, L200嘅高車身令佢有 45度側傾角、 31度進入角、 26度跨越角及 28度離去角,根本視路壆及爛路如無物。
引擎方面,採用 2,442c.c.直四柴油 turbo引擎,容積比上代細咗少許,不過得到車廠獨門嘅 MIVEC系統及共軌直噴燃油系統幫助,馬力由上代嘅 136匹跳升至 181匹,而扭力都由 32.0kgm提升至 43.9kgm,力水當然勁得多。而波箱都有升級,由 4速進化成 5速,仲要加埋+/-模式, on road都有返啲駕駛樂趣。 L200由內到外都比 SUV好,唯獨因為貨車底子,尾懸掛需要顧及負重物要求,所以用上動態生硬嘅葉片式彈弓片,尾斗冇負重時行車會比較跳動,駕駛者同乘客都感受到。




升級至 5速波箱,而且仲可以喺波棍操作+/-模式。


首次喺軚盤背增設轉波撥片,賣相同手感都相當不俗。


四驅系統轉為用扭掣式操作,比以往嘅「加力波」波棍更易用。


新引擎比上代有更大馬力及扭力輸出,完全切合 Pickup嘅嚴苛要求。

撰文:袁國基
攝影:葉偉豪

 

    文章標籤

    Mitsubishi L200 Sportero

    全站熱搜

    tvb4life 發表在 痞客邦 留言(0) 人氣()