能夠有膽話自己係「全球最佳汽車」,平治當然唔會「齋吹攞嚟衰」,所以點都要攞啲實質證據出來。首代 S-Class自 1972年誕生以來,全球累計總銷量高達 400萬部;而今代(編號 W222)自 2013年推出,便錄得全球 30萬部銷售佳績,其中三分一市場來自中國,絕對有「牙力」控制大局,所以國內版 S 650將稱為 S 680,取其「 8=發」之意思。

壹號幹線

全效能 豪華配方  Mercedes-Benz S-Class

贊助商連結

於蘇黎世平治發布會上,發言人指出小改款 S-Class的重要任務就是「將全球最佳汽車,再進一步。」一個聽落幾寸,但實行難度極高的任務……
不諱言,未改款前的 S-Class已經正到爆,就算同級對手多番挑戰,至今都未有一部可以「真正埋到佢身」,就算唔改款,其江山都肯定穩陣過我依家份工……
但廠方表示,今次小改款的改動仍多達 6,500項,大部分涉及於動力及傳動配備。就以測試的 S 560為例,除咗舒服之外,揸車嗰個,更是歎上加歎。

動力大革新

售價:未定
引擎: 3982c.c., V8;前置,後輪驅動;雙渦輪增壓
馬力: 469匹/5250-5500rpm
扭力: 71.4kgm/2000-4000rpm
波箱: 9前速自動(附+/-模式)
長/闊/高: 5255mm/1899mm/1494mm
重量: 2070kg
耗油量: 8.2-7.9L/100km(公路及市區綜合計算模式)
0-100km/h: 4.7秒
極速: 250km/h
查詢:仁孚行
網址: http://www.zungfu.com 
*S 560 long wheel base

讚一讚:依然是業界最強豪房標桿之作,無敵的靜,無敵地定,無敵舒適;全新引擎配搭甚有驚喜,主被動安全設備再度提升,實在正到暈。

彈一彈:諗到頭都大,真係毫無破綻,零弱點。



型號 S 560曾是 W126系的旗艦車款( 560 SEL),如今重出江湖,改用 4公升 V8雙 turbo引擎,其實即係 AMG GT所用的引擎,但馬力調低至 469匹,但從 2000rpm開始已可將峰值 71.4kgm扭力全面釋放,低轉行車順滑寧靜度尤其誇張,踏深油門亦有用之不盡的爆發反應,個人認為是動靜皆宜的最佳配搭。



另一台矚目新引擎便是應用於 S 450及 S 500,編號 M256的三公升直 6 turbo機器,特點包括 turbo、水泵、壓縮泵採用 48V電動設計,供電裝置由於引擎與波箱間的發電機負責,這個類似混能的裝置,除能徹底解決 turbo-lag問題外,亦有利於可以較細容量去產生更大馬力並減省油耗,輸出分別為 367及 435匹。



當一間車廠認真到連車頂天花都唔放過,例如鋪設的物料有類似 Alcantara觸感;雙天窗除咗正常開關之外仲可以玩變色;後座專用頂置喇叭,及供整理儀容專用的化妝鏡……等,何謂 attention to details,恐怕已盡在不言中。



總輸出 1520 watt Burmester high-end音響當然要額外消費,小改款增多三組喇叭,空間立體感大大提升,高低頻延伸自然,音樂味濃郁,貴貴都值得俾。



前座齋睇已讓人有衝動跳上去坐,實際坐落仲大件事,座墊、背墊軟硬比剛好還要再好,頭枕為可內摺蝴蝶式設計,更有多段電、氣動幫你調校最心水坐姿,覺凍,識發熱;到夏天,識滲風;想劈彎時坐得更 firm? dynamic seat左右氣囊總會支持你,長途車揸到攰攰哋?最後再送你多款按摩療程套餐,問你服未?



到後座,你當我擦鞋都要講:「真係天下無敵!」試駕為長軸距( 3165mm)四座版連 Chauffeur package,電動調校、發熱滲風、按摩、獨立屏幕、側尾簾……統統包含,而且前乘客座可移前 77mm,以增長老細位(右軚版為左後座)腳位及展開 foot rest,亦保留了前後孖頭枕設計。坐落,就係舒服到不能置信,唯一未能匹敵的對手,就恐怕只有同門 Maybach版。



新版 MULTIBEAM頭燈算好易認,日行燈組改為三行設計;加入了由 84枚可動式 LED組成的 ULTRA RANGE技術,光度強、照明距離極長之餘,亦能根據不同路況自動調節亮度及照明角度。簡單講:車主只要長期扭去 AUTO模式便成。



6500項改動大部分涉及機械組件,除一系列新引擎之外,波箱亦轉用轉檔效率超順滑的 9G-TRONIC,氣壓避震亦加入了 curve模式。新 S-Class無論以行車及乘坐論,其舒適性確實是大超班,懸掛濾震能力亦然,能無聲無息地淡化一切路面起伏及雜碎跳動,門窗膠邊亦經過精心計算,能有效隔絕來自風聲及路噪的高頻,加上 A柱及側鏡設計可將風及雨水導走避免打向車身,難得車廂寧靜如會議室一樣,是最理想的聽歌、思考、傾生意好地方。



S 560駕駛感簡直強到「離晒大嫂」, 50%鋁製車架令走高速或跑山路都有超凡穩定性,車體雖大然而身手毫不笨拙,踏板、扭軚操作都表現出高度線性兼細緻質感,成功將「揸得好舒服」的定義,再次推向另一高峰。



車廂最顯眼改動,是軚盤從兩幅式改為握持手感更佳的三幅式;招牌巨型 12.3吋孖 mon錶板固然要「保育」,廠方亦強調應用物料更上一層樓,例如新增了紋理獨特的 open-pore真木飾,試駕車所用的碳纖當然並非仿製品。再望望,繡線工整有序,金屬件質感觀感並存,冇得輸!

要寫新 S-Class安全設備,恐怕俾多十頁紙也未夠,親身體驗了認到人及車的障礙物緊急煞車系統,保障自己,亦保障別人。









杯架可製冷,亦可發熱,開支 KRUG或泡參茶皆宜;新增無線充電器,可惜暫未對應「生果」手機。



軚盤兩邊都加入了 touch pad,揸住車都可以「捽吓捽吓」控制各項操作;想再懶啲歎啲,原來仲可以用 LINGUATRONIC聲控指令輸入,服未?



為求將豪華層面推向巔峰,平治想出了 ENERGIZING comfort control這招數,系統連結着溫度、香薰、冷暖座、按摩、燈光及音樂控制,透過預設六種程式,能因應駕駛者需要提供綜合性「提升活力」服務,每節時間十分鐘,若然未夠喉,亦歡迎「 mark鐘再起」。



多得 LED技術,車廂氣氛燈已不是什麼新奇設備,但假如可以有 64種顏色選擇時,成件事,當堂唔同晒。



作為高級車,後座不設翻摺功能實屬合理(你叫老細坐去邊?),但為了照顧事頭載物需要,特大 510公升容量尾箱總樂意效勞。

撰文、攝影:廖宏俊(瑞士蘇黎世)
mailto:features@nextdigital.com.hk

 

    文章標籤

    Mercedes-Benz S-Class

    全站熱搜

    tvb4life 發表在 痞客邦 留言(0) 人氣()