坦白講

藍眼淚

贊助商連結

Winston的太太 Joey是眼科護士,見過很多不同的個案,她沒想過有一天要照顧的病人,是自己的孩子。
他們的兒子陳恩佑( Gabriel)患上先天性青光眼,是一個視弱 BB。不足一歲已進行十六次手術,希望減眼壓,保住僅有的視力。夫妻間漸生意見,關係亦一度因此面臨考驗。

兩年多之前,我陪太太入產房,當聽到 BB喊聲,以為一切安好。隔咗無幾耐,護士打開阿仔對眼俾我哋睇,兩隻眼睛係淺藍色,我同太太晴天霹靂,完全唔知點算。太太係眼科護士,更心知不妙,濛濛鬆鬆已開始流淚。
阿仔轉上兒科 ICU,被確診先天性青光眼,視力近乎零。先天性青光眼的人唔多,由媽媽肚中一出世就出事就更少,是二萬分之一。阿仔眼內的排水功能出了問題,令眼球內不停積水,當時他的眼壓有 50mmHg,比正常人高一倍。
剛出世十幾日,就做第一次手術。因為佢太細,每次手術都要先麻醉佢做檢查,再同醫生決定點做。試過喺眼球開洞,又試過放導管,不過成效都麻麻,眼壓好快升番。未夠一歲,已經做咗十六次手術,差不多每個月就要做一次。

醫生同我哋都係摸着石頭過河,唔知道咩方法先係最好。小朋友新陳代謝快,傷口好快自然癒合,排唔到水,眼壓自然會再升高,後來做激光,殺死制水細胞情況先穩定。阿仔要插針,其實好痛,但依家唔保護佢視力,將來可能會完全失明。
我和太太要去面對唔識處理的事,更加唔識去照顧一個失明嘅細路,佢將來點算?摸索教阿仔嘅路都經歷好多失敗兼氣餒。當時,我哋想阿仔接觸世界,會帶佢出去。試過帶佢行山,佢全程唔肯坐車仔,要抱住行。每次出街都喊,有次仲喊到全條街嘅人望住我哋。有家長話唔應該理佢,喊喊吓就會慣。後來回想,環境對他太陌生,又被綁住喺車仔度,令他好冇安全感。
為咗阿仔的問題,同太太曾經意見不合。她是一個好有計劃嘅人,而我就係需要時間諗解決方法嘅人,令太太以為我愛理不理、想逃避。我嘅壓力很大,試過夜晚一個人喊。家庭重擔落喺我身上,但無辦法抽身處理公事,亦直接影響生意收入,問題係解決不到。曾經想逃避,但我知道我唔可以。我哋知道阿仔個病係要長期作戰,如果我哋唔放低自己,一齊去面對挑戰,會行唔到落去。
有一日佢在草地上爬爬吓,竟然好勇敢自己行嚟我度。佢仲細,唔識講自己睇到咩,亦唔知道可以睇到幾耐,我們一家人就做佢嘅眼睛,帶色彩俾佢。

撰文:黎雅婷
攝影:葉漢華
mailto:news@nextdigital.com.hk

 

    文章標籤

    坦白講 藍眼淚

    全站熱搜

    tvb4life 發表在 痞客邦 留言(0) 人氣()