溫碧霞老公密會中女

贊助商連結

溫碧霞(Irene)被爆同結婚十七年嘅何祖光分居四個月,上周五(十四日)佢現身機場,被問到係唔係同老公離婚?佢就話十七年感情唔係話分開就分開,件事發生之後,先明白大家仲好關心對方,似乎仲有轉彎嘅餘地。佢又澄清從未講過要離婚,「冇咁嚴重,要時間諗清楚,起碼知我哋問題喺邊,有問題唔可以唔講,但放心,我哋會珍惜對方!」之後冇耐,佢仲更新咗社交網,留言:「只要你懂得珍惜你身邊所有的人和事,你就能夠得到最大的快樂,且行且珍惜,共勉之⋯⋯」

有傳佢兩公婆嘅分歧,係因為何祖光不滿老婆成日返大陸做嘢,但係Irene又唔肯為家庭而放棄事業,大家愈嘈愈僵,搞到分居囉。其實,本刊早年就已經發現,Irene忙住返內地做嘢搏殺,佢老公不甘寂寞,兩度約會一名貌似郭藹明嘅中女,一齊行街、睇戲、「按腳」疏乎。事後,Irene仲幫老公拆彈,話個中女佢都認識,又話老公同異性出街,實屬正常社交好平常,完全冇介意喎!不過,好明顯,兩公婆一早積落咗問題,Irene冇時間陪老公,所以何祖光先會單獨約異性出街,睇嚟佢哋真係要畀多啲心機同時間維繫感情,唔係就真係神仙都冇得「掹」喇!

上周五(十四日)Irene着住吊帶白色裙現身機場,雙眼浮腫,睇落精神麻麻。

 

日前,Irene被傳媒發現冇帶婚戒,呢一日,佢嘅右手無名指上,就戴咗隻閃令令嘅鑽石戒指,疑似係求婚戒。

 

Irene同老公婚後無所出,一〇年機緣巧合下,喺內地收養一個被遺棄喺火車站嘅孤兒,取名何國倫。

 

早年,本刊影到何祖光趁老婆返咗大陸做嘢,周六、周日放假,就會約埋一個貌似郭藹明嘅中女去街。

全站熱搜

tvb4life 發表在 痞客邦 留言(0) 人氣()