古偉牧話,近年多咗極左或「勁共」人士喺網上謾罵,可能誠品怕麻煩而唔賣,但認為唔應該怪罪誠品。

八卦陣

書展開幕 「被禁」梁天琦人訪新書有售

贊助商連結

回歸二十周年,習總訪港,唔少地方變到大陸一樣,四處掛起國旗,到底有幾多人真心慶回歸?環保團體項目統籌古偉牧,最近就出咗本新書《有冇人熱烈慶祝香港回歸祖國二十年》,但最後竟然都疑似因政治敏感,搞到大書店唔肯賣。

 

 

大書店唔賣唔緊要,《有冇人熱烈慶祝香港回歸祖國二十年》今日開始喺書展有售。

本書訪問咗回歸廿年來每年嘅關鍵人物,有本民前梁天琦、反國教嘅黃之鋒、亦都有金管局前總裁任志剛呢類唔「黃」嘅人物。但唔知係咪題材敏感,嚟自台灣嘅誠品書店話賣又唔賣,聯合出版集團旗下嘅「三中商」更加唔使講,唔賣!
古偉牧就話,曾經出過訪問雨傘運動參與者嘅《被時代選中的我們》,誠品都有賣,估計今次因「唔想有麻煩嘢」而唔賣。佢認為今時今日嘅香港,政治因素係一個最大嘅商業因素,「政治唔鍾意一樣嘢,會帶來好多商業壓力。」
書中特登搵啲跨顏色、跨界別、跨政治立場嘅人物做訪問,其實係不分立場咁幫讀者睇番回歸後發生、可能仲影響緊香港人嘅大事,好似「領匯事件」咁。本書只得樓上書店有售。不過,今日書展開幕有售,有興趣可以去買嚟睇吓。
DQ潮殺到埋身?朱凱廸話冇得驚

上星期再有另外四位非建制派議員被 DQ,其他宣誓時帶道具或者為誓詞「加料」嘅議員,會唔會難逃同一命運?

繼舊年青年新政梁頌恆、游蕙禎被 DQ後,上星期高等法院裁定劉小麗、羅冠聰、姚松炎同長毛梁國雄宣誓無效,喪失議員資格。針對非建制派嘅 DQ潮來勢洶洶,下一波主角,可能就係舊年因橫洲風波自稱受死亡威脅嘅朱凱廸,同埋熱血公民鄭松泰。
事關今年三月,有市民就朱凱廸同鄭松泰嘅宣誓入稟高院,指佢哋嘅宣誓唔符合人大釋法要求,希望法庭裁定二人宣誓係咪有效,仲要求法庭頒禁制令,兩人一旦被褫奪議員資格,就禁止佢哋喺立法會內以議員身份行事。入稟狀指,朱凱廸喺宣誓後高叫「民主自決,暴政必亡」;鄭松泰就表示支持抗爭運動,又高呼「全民制憲,重新立約」,案件排期喺今個月廿六日進行三分鐘聆訊。
第三輪 DQ隨時發生,朱凱廸同《壹》仔講,案件一路發展落去,自己同鄭松泰有可能會敗訴。另一方面,佢原本因為橫洲風波受到警方人身保護,不過今年初已經解除咗,如果遲啲連議員身份都冇埋,會唔會隨即惹嚟對家算賬?佢就話冇可能成世人做議員,遲早都要面對。
網民叫郭文貴爆相爆片
流亡富豪郭文貴同中共日日喺網上開火,佢咬住中紀委常委王岐山唔放,一時又話有某君性愛短片,一時又話會爆高官私人財產,早兩日仲拖埋台灣國民黨落水,話國民黨高層九八年訪問北京,中共安排女星陪瞓,名副其實係「國共合作」喎。
不過,佢淨係唧牙膏式爆料,原本話六月四日召開嘅全球發布會仲未見影。佢係生意佬,深明談判要有籌碼,好似佢老婆同個女咁,早排可以由大陸飛去美國同佢團聚,就係一個 good deal。
中共都唔係省油的燈,近日新華社就炮轟郭文貴,話佢用錢收買線人攞料,然後自己加鹽加醋老作。
嘩,雙方開火,睇得最過癮梗係網民。不過有網民嫌郭文貴得個講字,郭文貴有真憑實據的話,例如有任何短片,就唔好咁自私,應該拎出嚟分享。
本刊多番詢問郭文貴,佢唔想多作回應,佢話:「從來都沒有過對我有利的消息,都是假消息,但那些最終都是對我有利的消息,挺好的,沒有什麼回應了。」

郭文貴經常在網上爆中共醜聞。

有網民叫郭文貴分享短片。
可能住得太遠 劉業強好少開會
剛獲邀加入行政會議的鄉議局主席劉業強,有指七十萬名原居民拍手齊聲讚好,認為將來傾僭建、丁屋及新界發展可有商有量,政策能直接溝通到位,唔使處於被動,亦唔需要再靠民建聯發聲。咦,即係話以後唔使靠張學明啦。
不過,近日劉公子卻被指是包攬立法會大會、內會及財會出席率最低的議員。而財會至今開咗六十六次會,佢都係出席咗其中十八次,出席率得嗰兩成七。估唔到劉公子不單止繼承老豆發叔所有公職,連開會出席率都學晒老豆,因為發叔以前做立法會議員時,都係出晒名好少出席會議,劉業強果然「虎父無犬子」。《壹》仔收到風,劉業強為咗方便照顧患病發叔,搬咗去屯門天佑居附近居住。可能因為住得太遠關係,又或者新界圍村事務太繁忙,所以好少去開會啦!

劉業強與新一屆行政會議成員大合照。(《蘋果日報》圖片)

發叔以前也經常缺席立法會會議。
撰文:巫不言
news@nextdigital.com.hk

tvb4life 發表在 痞客邦 留言(0) 人氣()