除了自家品牌的蛋糕外, Luna Cake亦與 Shinya、 Sweet Orchestra、 Chat Et Perle等日本甜品品牌合作,出售四十多款蛋糕及甜品,老闆 Elmas表示希望搜羅更多高質的日本甜品,征服港人的味蕾。

創業通

靠北海道雙層芝士蛋糕起家 打造日本甜品王國

贊助商連結

無煩惱時吃甜,工作壓力大時更加會吃甜,故無論任何時候,市場對甜品的需求都非常大。 Elmas引入一款北海道雙層芝士蛋糕,成功為店鋪打響名堂,創出半日售出 2百個蛋糕的記錄。創業難守業更難,他深明熱潮一過,店鋪往往難以經營,故他決定不停引入日本品牌的各式蛋糕、大福、朱古力及卷蛋等甜品,即使面對大量競爭及跟風者,都能令店鋪繼續發展。除香港有 6間分店外,澳門更再設立分店,希望打造一個衝出香港的多元化日本甜品品牌。

Luna Cake的創辦人 Elmas表示想打造一個主打日本品牌及多元化的甜品店,「𠵱家我哋有 5間零售店及 1間 cafe,除咗招牌北海道雙層芝士蛋糕外,店內仲有售賣其他日本品牌嘅芝士蛋糕、大福、朱古力及梳乎厘等甜品。」每個芝士蛋糕價由$188起,梳乎厘及大福等則由$88起。
讀完中五後, Elmas去了日本留學,在日本讀大學期間已與朋友創業, 97年畢業便回港發展,「當時我修讀 BBA,對創業好有興趣,於是大三時就同個日本朋友開咗間鋪賣手機飾物嘗試創業,生意都唔錯。返嚟香港後,我繼續喺日本入貨,開鋪賣手機飾物及電話外殼貼紙,中間都入過水晶、瑪瑙等半寶石嚟賣,乜嘢都試吓,不斷做唔同嘅零售生意。」
因港人對日貨有一定信心,而 Elmas對日本入貨渠道比較熟悉,於是他在 06年成立谷日網上購物平台,售賣日本百貨,「喺 08年時,有個熟客託我哋幫佢訂 10個北海道嘅一款雙層芝士蛋糕,佢唔介意冰凍空運而加千幾蚊運費,令我好奇呢個係乜嘢蛋糕,我就順便訂多個嚟食。一食入口覺得好震撼,同平時食開嘅芝士蛋糕好唔同,入口即融化,覺得呢個商品有得做,我決定入貨嚟賣。」




原味雙層芝士蛋糕$188/5吋每件$38Luna Cake的招牌北海道雙層芝士蛋糕,以忌廉芝士及馬士卡芝士製作,入口即融的口感,加上不太甜,十分受港人歡迎。


Shinya富良野飄雪芝士蛋糕(朱古力味)$228表層鮮忌廉混合內層朱古力忌廉芝士,外層是香脆的曲奇餅皮,外鬆內軟,食落有層次。


Berry Berry芝士蛋糕$208/5吋每件$42採用士多啤梨及紅桑莓製作而成,是 7月至 9月的期間限定品。


Luna Cake北海道牛乳卷$123與北海道工場合作的自家產品,鮮忌廉用上北海道產的牛乳製成,十分幼滑,而且奶味濃郁。 香港開工場

雙層芝士蛋糕的工序繁複,導致 Elmas在 10年開設了 Luna Cake,進軍飲食業,「我周圍打聽,最後用咗年幾時間搵到整呢款蛋糕嘅師傅,然後同佢傾合作,原本想搵本港嘅工場去生產,但蛋糕要分兩層芝士加一層餅底,工場都嫌麻煩唔接單,我只好租地方建立工場,花咗成 150萬,我仲叫日本師傅過嚟培訓人手。配方都有改良,想啱香港人食,要減少少甜,終於喺東廣場開咗第一間店。當時我哋算係首間賣呢款蛋糕,吸引到唔少人嚟食,亦有唔少傳媒嚟訪問我哋,每日生產 200個蛋糕,半日就售罄。」
雖然引起熱潮,但做生意多年的 Elmas明白單靠一款產品難以長久,需要找新元素才能令品牌繼續發展,「大半年後,我哋再開分店,當時市面上已經出現唔少同類競爭者,我覺得要有新嘅賣點先有繼續發展嘅可能性,我就構思集合日本唔同品牌嘅芝士蛋糕嚟賣。」




現時 Luna Cake有 5間零售店及 1間 cafe,位於尖沙咀 K-11的 Luna Cafe在 4月時開幕,客人可以坐低慢慢品嘗店內的甜品。


創辦人 Elmas會不時巡察各個店面,例如到 cafe食蛋糕及飲咖啡試味,監控食物質素,以保持水準。 飛日本傾代理

要達成這個構思, Elmas首先要試食不同日本品牌的蛋糕,「覺得 ok就再傾合作,第一間係同北海道品牌 Sweet Orchestra傾成合作。我要寫計劃書,又要飛去日本同佢哋傾,用咗半年時間先拎到個代理,引入咗芝士三重奏蛋糕。推出市面後營業額上升咗近 3成,證明呢個方法有效,我就沿住呢個方向去做。」
現時 Luna Cake與茶游堂、 Frantz、 Shinya等 8個日本品牌合作,賣四十多款甜品, Elmas還不斷推出新的自家品牌產品,「我哋同北海道工場合作,製作自家品牌嘅牛乳卷。除咗芝士蛋糕外,我哋仲引入咗和菓子、朱古力等甜品,希望令產品更多元化。𠵱家我哋嘅雙重芝士蛋糕有 6款口味,仲會定期推出唔同嘅季節限定蛋糕, keep住畀到客人新鮮感。」




Elmas(中)會訂購不同的日本甜食,然後與公司同事試食,從中挑選合適的甜品品牌合作。


Elmas在上年邀請 Kenny及 Hilman(由左至右)加入公司作合作伙伴,希望各展所長,令公司有更好的發展,「我會負責採購, Kenny就負責行政管理及業務推廣, Hilman就會係品牌及店鋪管理。」


Ben及 Kaman 客人呢度嘅蛋糕大部分都唔太甜,好啱我哋嘅口味,最鍾意佢哋嘅芝士蛋糕,唔會太膩,入口即融好正,尤其係原味及 Berry Berry,我哋不時都會嚟幫襯。 重建品牌形象

為了有更好的發展, Elmas在 16年找來 Kenny及 Hilman加入成為合作伙伴,「 1個人嘅精力有限,如果想繼續擴充,有拍檔一齊奮鬥會好啲。我搵咗 Kenny及 Hilman做拍檔,佢哋之前做店鋪管理及商務推廣嘅工作,對零售及業務推廣較擅長,佢哋幫手 rebuild個品牌形象。之前我哋嘅店面裝潢會較女性化,有公仔擺設,𠵱家新店重新設計,走簡約路線,希望更易畀男女客人接受。」
Hilman表示 Luna Cake會有擴充計劃,期望把品牌在亞洲打響名堂,「嚟緊九龍灣分店就會開幕,同時我哋打算發展亞洲市場, 7月底時,澳門就會有我哋嘅分店,呢個係第一步,之後會進軍內地市場,希望將品牌衝出香港。另外,我哋會同更多嘅日本甜品品牌合作,打造一個高質及多種類嘅日本甜品王國。」
網址︰ http://www.lunacake.com 




茶游堂宇治抹茶士多啤梨朱古力$117/盒


Luna Crunbar$25條Luna Cafe的限定甜品,表層酥脆而內裏有芝士忌廉及抹茶兩種口味,一口咬下有內冷外熱的口感。 開業成本

租金( 2上 1按)︰$90,000
裝修︰$200,000
設備︰$100,000
入貨︰$100,000
總投資︰$490,000

每月收支

租金︰$350,000( 6間店)
人工︰$270,000( 3名老闆+ 45名全職及兼職員工)
入貨︰$520,000
雜費︰$150,000
營業額︰$1,500,000
盈利︰$210,000

撰文:曾志恒
攝影:林文樂

 

    tvb4life 發表在 痞客邦 留言(0) 人氣()