短篇小試

要幾狠佢都肯  VW Golf R

贊助商連結

最近測試過七代半嘅 VW Golf GTI Performance,馬力大咗 15匹、改用 7速 DSG波箱、 0-100km/h快咗 0.2秒,加上非常 balance嘅操控表現, hatchback之中可以話係冇得輸!之不過, Golf車系之中,仲有架更強嘅「 R」,七代半增加咗 10匹馬力、多咗一個波、 0-100km/h快咗 0.3秒,比七代半 Golf GTI Performance足足快 1.6秒,究竟咁快會唔會 over咗?只要你夠狠, Golf R絕對能夠配合到你,不過記得留意限速路牌。




車尾變化相對車頭比較細,重點轉用附有動態指揮燈嘅新尾燈。

話說筆者去年曾經長測七代 Golf R Racing Edition幾日,架車真係快到不得了,唔係講直路,而係喺任何馬路上!本人夠膽講,馬力更大嘅 M-AMG A45, Golf R都絕對有能力應付,只係睇車手夠唔夠狠!講返 facelift後嘅 Golf R,$529,980起車價比 facelift前貴咗$30,000,加價唔係單純因為通脹,因為新 Golf R都有唔少新 update。

加入導航系統

論外形,今代最惡辣 Golf車款已經由 GTI包辦, Golf R則繼續選擇低調行事, facelift後跟全車系一樣改用雙「 L」新頭燈組,以及尾燈加入動態指揮燈,貼上「 R」徽章嘅鬼面罩同樣以一線貫穿頭燈組,但顏色仍然保留電鍍銀,感覺高級味較重。新款 Golf R包圍唔同咗,頭泵把兩側入氣口加入一組複雜勾形設計,尾泵把四尾喉設計不變,但車側裙腳底部加入咗黑色裝飾呼應頭尾泵把設計,你話佢幾低調都好,已經比 facelift前辣咗!
新版 Golf R車廂亦跟隨其他 Golf型號,加入全新 12.3吋 Active Info Cockpit Display虛擬表板,以及為中央多媒體系統升級用 8吋玻璃面屏幕。而頂級嘅 Golf R更首次配備埋導航系統,導航可以喺 8吋玻璃面屏幕以及 12.3吋虛擬表板之間隨時切換,使用起嚟非常方便,能夠完全發揮數碼化表板嘅優點。




後座承托位加入粒粒防滑物料,快車乘客唔怕跣。


Facelift後駕駛席增加三組記憶,剪裁同 facelift前一樣。


中控台同一般 Golf分別唔大,與 TT同款嘅專用平底軚盤,同 facelift前一樣冇改過。


黑色 19吋合金輪圈改用十幅式,內藏 R專用迫力卡鉗。


改用 7速波箱,無論加速反應同耗油都有改善,唔係筆者試到,係有數據證實。


1,984c.c.直四 turbo引擎,馬力提升至 310匹,但聲線依舊 tune到好順滑, GTI肯定嘈過佢! 有四驅考膽量

今次 facelift,廠方為 Golf R帶來多 10匹馬力,合共 310匹。動力嚟自相同嘅 1,984c.c.直四 turbo引擎,扭力亦都增加咗 2kgm,即 40.8kgm,需要多 200rpm,即 2,000rpm先至釋放。實際加速數字,喺馬力增加、波箱由 6速升級為 7速後, 0-100km/h時間比 facelift前快 0.3秒即 4.6秒。但好老實,雖然筆者之前都長測過轉款前嘅 Golf R,但如果唔係兩架車放埋一齊咁試,真係分唔出。因為轉款前 300匹加 1.5噸都冇嘅車重,加速已經好推背,𠵱家只係推多你小小咁囉,但又未至於有離心力。
Golf R配備 4MOTION四驅系統,揸法上同前驅嘅 GTI有好大分別。採用前驅佈局嘅 GTI,彎路表配靈活,但入彎點都要縮一縮油拖波畀迫力,再就住就住畀油出彎先至暢順; Golf R則相反,配備四驅加上 EDS同 XDS電子限滑差速器,高速入彎時,內側車輪加以適量制動,減低推頭情況,所以揸 Golf R,縮油拖波照做,但就可以畀少啲迫力,之後狠啲畀油扭入彎就搞掂,因為四條胎真係好似用膠水貼住地面,就睇吓你幾夠薑!當然,車速要合法、環境要安全先至好試。




中控台屏幕右下角個「 Map」 icon,一撳就可以將地圖轉去表板 Active Info Cockpit Display。


導航會有大隻轉向提示,清晰過用 Google Map


虛擬表板底部加入「 R」標誌,新增「 Navigation」版面。


表板可顯示地圖,但就未至於好似 Audi咁可以縮細轉數同速度表嚟放大地圖。


都有路口提示,仲有距離顯示,不過行緊車影唔到。

VW Golf R Spec.
引擎: 1,984c.c.直四 turbo
馬力: 310ps/5,500-6,500rpm
扭力: 40.8kgm/2,000-5,400rpm
傳動: 7前速自動,附+/-模式
車身: 4,263× 1,799× 1,465( mm)
軸距: 2,626mm
重量: 1,483kg
0-100km/h: 4.6秒
耗油: 7.5L/100km
車價:$529,980起
查詢: VW HK( 3698 9888)

撰文:黃德禹
攝影:葉偉豪

 

    文章標籤

    VW Golf R

    全站熱搜

    tvb4life 發表在 痞客邦 留言(0) 人氣()