專題 Log In

有心唔怕遲  Hyundai Santa Fe 2.2 CRDi

贊助商連結

當你睇到呢篇試車報告時,應該已屆七月中吧!即代表仲有兩個半月就到十月一日,柴油私家車廢氣排放就會收緊至 LEV III,好多賣緊嘅柴油私家車都要「忍著淚說一聲 goodbye!」正所謂「有人辭官歸故里,有人漏夜趕科場」,個個代理都急住清貨之時, Hyundai代理卻突然引入柴油版 Santa Fe!而且仲要設備史無前例咁齊料,車價都只係$379,000,擺明想引誘潛力買家出手、賺快錢!

五年來最高級

呢一代 Santa Fe已推出五年,新鮮感當然已經冇乜,但五年來都一直 keep到唔錯銷路,肯定好過同廠一眾房車。正因為 Santa Fa受歡迎,代理今次引入嘅柴油版 Santa Fe就配上更豐富設備,什麼大天窗、全電動真皮椅、四驅系統、落山車速控制、停車自動熄匙及定速系統等,全部留低!更甚者加入軚環+/-撥片、前座電暖功能及自動泊車系統,令柴油版成為有史以來最豪 Santa Fe,用德國小型 SUV價錢,買到德國中型 SUV嘅設備及享受,根本已完全 K.O.日本產品。仲有一點唔好忘記, Santa Fe係一部七座位 SUV,雖然唔可以話七個人都舒舒服服,但總叫做實用性兼備,幾屈機!




柴油引擎即將暫別私家車市場,柴油版 Santa Fe反而成為今代頂級版本。


駕駛艙同電油版完全一樣,唔好以為佢係 facelift版。 慳油得來大力

入得柴油版,就預咗新車嘅重點在於引擎表現,採用 2.2公升柴油 turbo引擎,馬力比以往電油版更勁,達到 200匹馬力。好戲在後頭,柴油引擎最堅就係低轉扭力,呢副引擎竟然有 45.0kgm扭力,比電油版多超過 20kgm!冇可能唔夠力啦!而且 6速波箱加入「 Sport」模式,令轉波稍遲一啲,榨取更多出力。據廠方公佈嘅耗油數值,柴油 Santa Fe只需 7.1L/100km,以冇折扣柴油價$11.5/L計算,即$0.82/km,如果計埋折扣,$0.67/km都可以!根本冇一款電油七人車或四驅 SUV可以做到咁慳油!




波棍左邊有新增嘅電暖前座、泊車鏡頭及自動泊車系統開關。


軚環右邊設有下坡車速控制系統、表板光暗設定、四驅鎖定、停車熄匙系統、駕駛模式設定及防打滑系統開關。


追加軚盤+/-模式撥片,唔使侷限用波棍操作。


後座空間唔算寬敞,但有冷氣出風口,好過唔少七人車嘞!


中排先係 Santa Fe嘅重點,既可以調校背部斜度及有窗簾外,仲有無敵天幕車頂。


前座採用全電動調校坐姿,而且有腰部承托力調節。

Hyundai Santa Fe 2.2 CRDi Spec.
引擎: 2,199c.c.直四柴油 turbo
馬力: 200ps/3,800rpm
扭力: 45.0kgm/1,750-2,750rpm
傳動: 6前速自動、附+/-模式
車身: 4,700× 1,880× 1,690( mm)
軸距: 2,700mm
耗油: 7.1L/100km
車價:$379,000
查詢: Hyundai HK( 3428 8288)

同鄉對手  Kia Sorento Diesel

Hyundai代理之所以引入柴油 Santa Fe,除因為食水尾外,更因為見同鄉 Kia Sorento Diesel大賣,既然 Santa Fe同 Sorento採用相同底盤、波箱及引擎,行車表現基本上完全一樣,但 Sorento嘅設備及品牌稍遜於 Santa Fe,所以車價更平!車價$299,980起,平到盡!

撰文:袁國基
攝影:葉偉豪

 

    文章標籤

    Hyundai Santa Fe 2.2 CRDi

    全站熱搜

    tvb4life 發表在 痞客邦 留言(0) 人氣()