新車激試

創意爆棚  Nissan Serena Highway Star VIP

贊助商連結

話七人車係香港人至愛,相信冇人會反對,一部車載晒一家四口,加埋兩老同賓賓,你話成個畫面幾咁熱鬧, family味爆晒燈!溫情滿載!不過呢類 MPV嘅發展似乎已到樽頸位,外表總離唔開方盒造型,多變嘅車廂座位其實來來去去都係翻前摺後,悶!不過最新第五代 Nissan Serena就有所不同,唔單只外表係歷代最大轉變,連車內車外嘅設備都新穎過人,創意一定冠絕同級。買得 MPV嘅人,其實都代表你有 family man嘅因子,但點先可以 family man得嚟與眾不同?可以諗諗新 Serena。

Nissan Serena Highway Star VIP Spec.
引擎: 1,997c.c.直四
馬力: 150ps/6,000rpm
扭力: 20.4kgm/4,400rpm
傳動:無段變速自動
車身: 4,770× 1,740× 1,865( mm)
軸距: 2,860mm
車重: 1,710kg
耗油: 16.6km/L
車價:$339,800
查詢:合誠汽車( 2262 1088)






要喺七國咁亂嘅 MPV市場突圍而出實在唔易,每每要有新突破先可以爆紅。新一代 Serena今次喺性能及機械層面上嘅進化,遠遠唔及外表及車廂改動咁大,明顯 Nissan廠方已睇到 Serena呢個級別嘅用家對性能要求唔高,反而一啲方便人嘅設備最緊要,特意新增一系列獨創設備,對手跟都跟唔嚟。




全新家族式「 V-Motion」車頭設計及雙層頭燈組,令新 Serena車頭更富動感。


車尾嘅電鍍裝飾令外觀更具貴氣,而且同車頭有呼應效果。 車頭車尾更吸引

每部 MPV都想營造出最大車廂空間,但亦因此令車身來來去去都係一個 box咁,四四方方好悶。當然,我哋唔可能要求一部 MPV有 supercar咁嘅流線設計,所以各大車廠都喺一個 box外形上扭盡六壬,車頭就係發揮創意好地方,搞得好分分鐘成為部車嘅標記位。新 Serena車頭用咗名為「 V-Motion」嘅家族式設計,鬼面罩由三層電鍍格柵構成,而頭燈就用咗分層式,令車頭望落比較尖銳,擺脫 MVP一貫沉悶感。此外,頂級 Highway Star VIP版本更用上 two tone車身色,有更豐富層次感。
對比直接對手 Honda Stepwgn, Serena嘅車身尺碼有壓倒勝優勢,長 4,770mm、闊 1,740mm及高 1,865mm,不過出入停車場時最好留意一下高度。而雙遙控電動趟門已經成為 MPV不可少嘅設備, Serena當然有啦,而且獨創「 TIC TAC Door」功能,就好似腳掃車尾底開尾門功能咁,用家只需袋住車匙行埋側門,用腳凌空掃一掃側門底部就可以開關,方便到暈!此外,前年推出嘅 Stepwgn首創「 Waku Waku Gate」尾門,上揭、側開都得,結果好評結潮,亦令其他車廠意識到尾門都可以玩下花臣!新 Serena當然唔會照辦煮碗,自家再研發名為「 Dual Back Door」尾門,除可整隻門揭起外,尾窗又可以好似以前啲越野車咁獨立上揭,方便狹窄地方存放物件,唔使次次開晒成隻尾門。




又一獨創功能「 TIC TAC Door」腳掃自動開關側門,血拼到冇手開門就知好用。


獨創「 Dual Back Door」尾門,尾玻璃可以獨立開啟,方便狹窄停車場使用。 座椅多變用途廣

Serena之所以一直喺市場站穩,好大原因係佢車廂座椅極之多變,靈活性係同級中最強,人哋買車要分七座位或八座位版本,上代及今代 Serena唔需要咁分,因為獨家擁有可前後移動及化身為手枕嘅中央座位,八人模式下只需打開手枕及移至中排中間,即可將座位分佈定性為 2+3+3;而七人模式就先將中央座位摺成手枕,令座位分佈變成 2+2+3,手枕有路軌可以前移,變成前座手枕後,中排就得出兩張獨立座椅,唔單只可以前、後移動,仲可以向內橫移,令座墊後移幅度更大,獲得最大腿部空間,可以同高一級嘅 Elgrand媲美。後排方面,空間一啲都唔細,兩個成年人坐都唔迫,三個就要屈就下嘞。
買 MPV嘅用家當然好多時都載人,要招呼親戚朋友妥妥貼貼 Serena都有計,全車共有十個安全氣袋、十個杯架、六個 USB充電插槽及四張摺合式餐枱,唔理你係飲食男女還是 IT人都冇投訴啦!駕駛者都唔好失望, Nissan都有為你著想,全新設計表板肯定係日系 MPV中最有型,用咗名為「橫向流動」設計,整組表板又扁又闊,令前方視野更開揚,而速度表係跳字款,左方則增設彩 mon.負責顯示虛擬轉數表、各式行車數據、 AVM環視顯像系統及 MOD動態探測系統,睇住個 mon.都可以輕鬆泊車。




全新 design中控台外觀前衞,似歐洲豪華房車。


後座可以向左右兩邊翻摺,得出更大平坦尾廂外,仲唔需要潛入尾廂底。


有需要時,後座可以載三名成年人,當然載兩名會有較好空間。


中排可以攤平與後座連成臥床,瞓一覺都得!


推前中央座位、中排推入車廂中間及後移,得出最大腿部空間!


正常情況下中排坐三人,值得留意側窗已備有手動太陽簾。


座位由三種物料混合製成,日本原裝進口,質量極好,請唔好亂去包土炮皮座。


離譜!平底跑車軚竟然出現喺 Serena車上, GT-R都未用呀! 動力有進步空間

以往好似 Serena呢類 MPV,大多採用 2.0公升引擎,馬力大概 130匹至 140匹,但自從 Stepwgn率先採用 1.5公升 turbo引擎,獲得更好嘅 150匹馬力後,令唔少人都察覺到中型 MPV用細容積 turbo引擎嘅可能性。 Nissan玩 turbo一定比 Honda更精,但新一代 Serena並未採用 turbo引擎,更甚係引擎沿自上代,只係馬力上調至 150匹、扭力增至 20.4kgm。 Serena喺引擎輸出數值上同 Stepwgn非常接近,但由於 Serena引擎係自然吸氣型式,低轉扭力唔及 Stepwgn嘅 turbo引擎,所以起步稍欠勁度,當引擎上到高轉數時,運作聲都唔細。波箱方面,沿用 CVT無段變速款式,並未附設+/-模式,少咗啲玩味。不過新車軚盤加設可變動力系統,可因應車速改變扭軚力度,慢車輕手啲、快車重手啲。




引擎表現中規中矩,但皮帶用咗新設計嘅 Dual Arm Tensioner,可以減少引擎負荷,令耗油量下調至 16.6km/L。


無段變速波箱表現滑溜,但冇+/-模式選擇。


停車自動熄匙系統、 ECO駕駛模式及電動趟門都可以設定開關。


前座椅背新增 USB充電插槽供中排乘客使用,以後一上車就可以同尿袋 bye bye。


後排嘅窗底設有 USB充電插槽外,仲有電動趟門開關。


獨有 AVM環視顯像系統及 MOD動態探測系統,同級最強。


中排乘客可以喺車頂位置設定冷氣系統,保證全車都夠晒涼快。


定速巡航系統可以簡單喺軚盤上設定。


「橫向流動」設計表板,其實即係將表板盡量撳扁,令前方視野更開揚。




撰文:袁國基
攝影:葉偉豪

 

    文章標籤

    Nissan Serena Highway Star VIP

    全站熱搜

    tvb4life 發表在 痞客邦 留言(0) 人氣()