究竟 E 63 S有幾快? 612匹、 86.7kgm扭力及 3.4秒加速只能概括地講出它的超然數據,未足以形容其真正實力及過癮之處。嘗試抽象點去形容,大概就係明知部車犀牛咁重(近兩噸),但又可以跑到獵豹咁快,最恐怖是力度結實反應又快,就像一個火力特強的煤氣爐,一撻火,數幾秒,水就滾。 AMG功力,唔到你唔服。

壹號幹線

尖士癲! Mercedes-AMG E 63 S 4MATIC+

贊助商連結

唔使多講, E 63 S 4MATIC+就係現時平治 AMG陣營內,最大馬力及 0-100km/h加速最快的四門房車,輸出是講出嚟都嚇到腳震的 612匹。話好快、好勁、好癲都不足以表達其性能,敬請自行加插大量粗口助語詞,方可以形容得較為貼切。

逐匹秤都抵

售價:$1,798,000
引擎: 3982c.c., V8;前置,四輪驅動;雙渦輪增壓
馬力: 612匹/5750-6500rpm
扭力: 86.7kgm/2500-4500rpm
波箱: 9前速 MCT自動(附+/-模式)
長/闊/高: 4923mm/1852mm/1468mm
重量: 1950kg
耗油量: 9.1-8.8L/100km(公路及市區綜合計算模式)
0-100km/h: 3.4秒
極速: 250km/h
查詢:仁孚行
網址: http://www.zungfu.com 

讚一讚:將「新姨仔」車架潛藏功架谷到極限,力度之大及瞬變加速遠超預期,新四驅系統全程庇護每個彎角,接近兩噸車重,卻靈活到得人驚。

彈一彈:隔音及過濾路訊能力太厲害,感受到的速度與實際有大出入;前座剪裁偏重舒適,快車支撐性稍遜;力量及加速力太恐怖,於香港得物未必有所用。



同一台 4.0公升 V8雙 turbo引擎,已先後出現於 C 63、 C 63 S、 GT S、 GTC及 GT R身上,調校各有不同( 510匹至 585匹),但 AMG偏偏卻將 612匹「最大馬力使用權」交予 E 63 S手上,成為陣營內最大馬力及 0-100km/h加速最快四門房車。
朋友吹水飯局中講出嚟,威過威廉王子啦!



為了裝得落前 265/35/ZR20、後 295/30/ZR20輪胎及特大制動卡鉗,特闊輪圈亦是 E 63 S專用配方,剛剛好不會超越沙板位,胡亂換軨隨時會有反效果,請三思。



可轉換三種儀錶顯示,遺憾沒有 AMG專用介面,但個人意見是:車速太快,冇可能有時間望,還是加錢裝 HUD最實際。



講到尾, E 63 S「真身」都係一部豪華行政房車,所以車廂好靜,冇乜路噪、路感係相當合理,用 Comfort慢慢揸真係好歎,而正正因為它有這個好舒適的特性,便間接過濾了速度感。就「例如」於石澳道行 100km/h,感覺到的速度感只是 70km/h左右,要有 100km/h的刺激性,便要差不多踩到 140km/h才成,所以開這車必定要盯緊速度錶,避免 overspeed入彎的同時,亦避免淪為「拍攝」對象。



前後天窗雖重,但沒有影響車架剛性;抬頭望着似是急速移動的浮雲或繁星,又是另一番樂趣。



中控台與任何 E-Class都大致相同,遺憾沒有如 Coupé版換上噴射器出風口,但作為頂級 model,用料(真碳纖、真金屬)自然有條件特別重手,平底軚盤包有 Alcantara兼頂端有回中 mark位,熱血設定是也。



同屬家鄉出品的 Burmester高級音響無疑好靚聲,但只限於 Comfort模式時才聽得真,而且論澎湃勁度,點都比唔上雄厚的引擎運轉及喉聲。



波箱槽上按鈕各有功能,關乎性能的包括行車模式選擇、波箱模式選擇、避震軟硬調校、 ESP模式選擇、尾喉聲效選擇。而為「頂得住」龐大 86.7kgm扭力,波箱採用耐用、效率兼備的 9速 MCT多碟式離合器設計,轉檔順滑度或許不及「雕咳廚」,但勝在肯捱肯砌,即管放心踩。



IWC行針時鐘乃 AMG車系指定動作,款式類似腕錶 ingenieur系列,有興趣大可買番隻襯車,相比車價,幾萬元濕濕碎啦!

副屏幕可監察即時行車數據,當乘客見到兩支針都頂到盡頭時,唯一可以做的,就係坐穩。






前座設計(腰部承托、頭枕壓花)、用料(真皮加 Alcantara)及功能(全電動及氣壓、透氣及發熱)基本上零投訴,唯一可改善是座墊太舒服,快劈時未能完全穩定下肢,但考慮到買得起 200萬車的富豪,身材通常都……明白的。









後座剪裁及用料都稍有不同,舒適度可取滿分,只爭在快車未必坐得好穩,接載乘客時,司機唔該忍忍腳。



維持 540公升尾箱容量,有電動尾冚及翻摺後座功能,同匹數超跑冇一部係對手。

Mercedes-AMG E 63 S 4MATIC+

要承受 612匹馬力,驅動布局固然非一般貨色,新研製的 4MATIC+四驅系統可根據路況自由調配前後動力輸出;後軸設有電子差速鎖;氣壓避震硬度及離地距亦為可調式;設有 Comfort、 Sport、 Sport+、 Race及隱藏的 Drift(全後驅)行車模式及 Race Start彈射起步功能。 E 63 S的攻彎能力遠超於正常房車表現,既有四驅車的穩定性,亦不失後驅車的快捷指向, ESP介入唔算好敏感,容許車尾有適量擺幅,安心、信心兼備,不過香港路面太爛,硬避震於山路會跳動得太密,手動將避震調至 Comfort,效果反而最平衡。

醒多句

廠方亦同時發表 E 63 4MATIC+,相同 V8雙 turbo引擎,但馬力下調至 571匹及 76.5kgm扭力, 0-100km/h亦慢了 0.1秒,後軸差速鎖改為全機械式,車價會平 10-15%左右,不過定位比較尷尬,代理索性唔會返貨。
AMG出得 E 63 S,下一 round自然到寶馬出招。第六代 M5已密鑼緊鼓籌備中,沿用上代 4.4公升 V8雙 turbo引擎但會轉用 8速 M Steptronic,估計馬力 600匹以上,更為革命性是將加入四驅系統,預計 2018年頭推出。

撰文:廖宏俊
攝影:方保山
mailto:features@nextdigital.com.hk

 

    文章標籤

    Mercedes-AMG E 63 S 4MATIC+

    全站熱搜

    tvb4life 發表在 痞客邦 留言(0) 人氣()