要用 MR技術打機,除了要 VR眼鏡外,也要有攝錄器材及綠布幕才能成事。

創業通

VR體驗中心 解決機迷土地問題

贊助商連結

科技界看好 VR( Virtual Reality,虛擬實境)未來可取代電視機,遊戲廠商近年爭相推出 VR大作,但 PS VR及 HTC Vive等裝置索價數千元起,加上香港人的蝸居地方淺窄,玩 VR遊戲容易碰撞受傷,令不少機迷得個恨字。今年 25歲的遊戲 YouTuber阿念看準這股熱潮,與 6名拍擋去年在荃灣工廈開設 Dreality VR體驗中心,結合 party room及打機元素,不但吸引機迷,連不少從不打機的女性也專程來幫襯。

「第一次玩 VR賽車遊戲,建議揸慢少少,如果未適應畫面,炒車時可能會頭暈!」阿念和拍擋 Jason細心地指導記者戴上 HTC Vive頭戴式 VR裝置,並調校好駕駛座及軚盤,以試玩《 Project Cars》,話口未完記者已撞到車窗玻璃碎裂。記者見場內幾位客人均沉醉在虛擬實境世界,與喪屍、怪獸撕殺一番,兩位老闆不停穿梭在客人之間,介紹不同遊戲及解答技術問題,忙過不亦樂乎。
在店內另一邊牆壁上,掛着一塊搶眼的鮮綠色大布幕,旁邊擺放着相機及屏幕,看似影樓的佈局,原來是店內的殺手鐧,「呢個叫 MR( Mixed Reality,混合實境)技術,可以實時從第三身角度,觀看玩家置身喺遊戲畫面之內。全港淨係呢度可以畀一般消費者接觸到 MR,通常要喺大型遊戲展先會見到。」說罷,阿念已「進入」《 Fruit Ninja》遊戲世界中,拿着大刀起勁地把多個生果劈開。




除了招呼客人外,阿念還會在公司做網上宣傳工作。


《 Counter Fight》及《 HordeZ》都是最受歡迎的 VR遊戲。


因土地問題創業

阿念修讀 IVE的汽車工程,於上年 1月畢業,他自小熱愛打機,讀書時自設 YouTube頻道分享遊戲短片,「起初主要玩轉珠遊戲《神魔之塔》嘅影片,後來愈嚟愈多唔同嘅種類。」 4年間,他累積了 2.5萬名粉絲及逾 120萬次點擊。去年 HTC Vive及 facebook旗下的 Oculus Rift頭戴式 VR裝置相繼面世,令阿念看到商機,「 VR遊戲對硬件要求較高,加上香港嘅『土地問題』,令好多人嘅屋企都冇足夠地方玩 VR遊戲。」剛畢業的他於是靠積蓄及家人贊助,並找來數位拍擋合資創業。
阿念的拍擋分別從事汽車工程、建築及設計等行業,正好與擅長打機的他各施所長。去年 4月,他與拍擋從外國訂購 VR裝置,翌月租下荃灣一個面積約 1,300呎工廈單位,開始籌備創業, 8月時正式開業。「因為資金有限,裝修上好多嘢都係親力親為,好似室內設計、鋪上網線等,有一幅牆都係我哋自己起。」




利用 MR技術,阿念可用第三身角度置身於《 Fruit Ninja》遊戲畫面中。


牆上安裝了鏡頭,捕捉玩家的動作。


這套玩賽車遊戲專用的器材包括駕駛座、軚盤、電視及 VR裝置,每套花費約 3萬元。


HTC Vive現時零售價約要 7千多元。 VR、 AR、 MR有咩分別?

VR( Virtual Reality,虛擬實境)
利用電腦模擬出一個立體空間,讓使用者有親歷其境的體驗。

AR( Augmented Reality,擴增實境)
透過電腦程式及攝影機配合,把虛擬元素投射在現實中。

MR( Mixed Reality,混合實境)
結合現實世界與虛擬世界,產生一個新的環境,可從第三身角度看到使用者與虛擬場景互動。




VR( Virtual Reality,虛擬實境)


AR( Augmented Reality,擴增實境)


MR( Mixed Reality,混合實境) 玩過晒所有 game


阿念(右)和 Jason(左)示範合作玩射擊遊戲。

店鋪提供 HTC Vive及 PS4 Pro合共 2百多款遊戲,最受歡迎的有體驗拉麵店工作的《 Counter Fight》及合作打喪屍的《 HordeZ》等,阿念說:「呢度全部遊戲我都玩過晒,要識得玩先教到人。」
阿念認為 VR中心與近年大受歡迎的 party room有共通之處,「都係以平民化價錢,提供場地及設備畀成班朋友聚埋一齊玩。我哋嘅客人由小學生到六十幾歲都有,但以二十幾歲嘅年輕人為主,通常係一班人嚟玩,普遍對 VR認識唔深,男女比例六四左右。」場內也設有 party room常見的 board game及毋須配合 VR裝置的任天堂 Switch,以迎合客人喜好,「絕大部分客人都係玩 VR遊戲,但試過有學生玩咗兩個鐘大富翁。」

開業半年見起色


Dreality佔地約 1,300平方呎, 3間獨立房可打通。

雖然阿念在 YouTube薄有名氣,但他自言宣傳是他的弱項,最初生意並不順利,「有諗過搵埋其他 YouTuber一齊拍片宣傳,但大家夾唔到日子,最後冇做到。我試過落 facebook廣告,但效果一般,開業頭半年收入只夠交租,人工都蝕埋。」
不過,他鍥而不捨地繼續發佈打機影片,加上客人互相介紹,生意漸見起色,「現時星期一至五每日有約 3至 7組客人,星期六、日有約 15組。」收費每人每小時$50起,每組客人最低消費$300。「估計約有 3成客人會回頭幫襯」。

日做 13小時

阿念亦按客人的需求推出新服務,「有公司租場搞 team building活動,我哋就推出專為 12人以上而設嘅包場服務,遲吓仲會向團體客戶提供外借設備,我哋會派人到場教學。」
作為唯一全職打理店鋪的創辦人,阿念每日工作約 13小時,「多數日子都係自己一個睇鋪,繁忙時段或我放假時,會有拍擋嚟兼職幫忙。喺公司好少打機,有時客人唔夠腳會邀請我一齊玩,時間許可先會玩一陣。」他未來打算聘請一位全職員工分擔工作,讓他有更多時間做好宣傳。




指導客人打機是阿念的日常工作之一。


創辦人之一 Jason會兼職協助 VR中心的營運。 

客人鄭小姐(左):朋友介紹我哋嚟玩,我喺上網睇片見到人哋玩 VR遊戲玩得好癲,覺得好好笑,所以想親身體驗一下。

客人李小姐(中):呢度環境幾大,適合一班朋友嚟玩。

客人劉小姐(右):我平時好少打機,最有興趣玩冒險類 VR遊戲。



客人潘先生:我係第三次嚟,之前喺fb搵到呢度,覺得服務非常好,職員好幫得手。

開業成本:
租金(兩按一上):$30,000
裝修:$150,000
電子器材( VR裝置、電視、音響等):$300,000
傢俬:$50,000
board game:$10,000
備用流動現金:$260,000
總投資:$800,000

每月收支:
營業額:$80,000
租金:$10,000
人工( 1位全職及 1位兼職):$20,000
水電及雜費:$5,000
盈利:$45,000

Dreality
地址:荃灣沙咀道 40至 50號榮豐工業大廈 1512室
電話: 3708 8350
facebook@DrealityPlay

撰文:阿文
攝影:林文樂

    tvb4life 發表在 痞客邦 留言(0) 人氣()