Elly創辦廣告公司 Topick,專門提供攤位及商品陳列架的設計及製作服務,她表示設計重點是能把客戶需要帶出的訊息及品牌形象傳遞給市民,「由零到有,每個設計至少要用 1個月時間去設計。」

青雲路 Premium Position

廣告公司 每年製作過千個攤位陳列架

贊助商連結

走在街上,不難看到不同的商品陳列架及展銷攤位,而一個出色的設計能吸引客人購買該樣產品。其實在每個陳列架及展銷攤位的背後,藏着不少人的努力及心血。 Elly在 14年創立廣告公司 Topick,專門提供攤位及商品陳列架的設計及製作服務,憑着以客為本的精神,每次設計都會改到客人滿意為止,才動工製作實物,令 Elly得到雀巢、金莎朱古力、 Johnson and Johnson、 Etude House等品牌青睞,相繼找她合作,每年製作的攤位及商品陳列架過千個。

訪問當日, Elly正與同事齊集在馬可孛羅香港酒店大堂,為 Movenpick的 pop-up攤位進行架設工作,「攤位以 Movenpick個 logo嘅黑色及白色為主色,佢嘅雪糕走高品質及高價路線,外形設計會走 premium風格。今次活動佢哋會喺現場售賣雪糕,我哋會整架位去放置雪糕筒及其他工具。部件之前已經整好咗,運到嚟現場由工人進行組裝,我哋就睇住個工作進度,及對照最後同設計圖有冇出入,如果有問題,就要即時去諗點補救。」
Elly是廣告公司 Topick的創辦人,公司業務是專門提供攤位及商品陳列架的設計及製作服務,「品牌要做推廣活動時,需要一個吸睛及突出品牌形象嘅攤位或陳列架,用嚟吸引客人嘅注意,以達到推廣目的。我哋會幫品牌由設計到製作組裝,提供一條龍服務。」
修讀 marketing的 Elly, 04年畢業後做過與市場推廣相關的不同崗位,「我做過 PR、活動策劃、廣告 agency等,其中做過客戶助理,主力負責跟 display設計,要同客人、設計師及廠方溝通,然後睇住工人 set場。我覺得將一樣嘢由零到有,好靚咁呈現出嚟,好有滿足感,之後自己都主力向呢方面發展。」




Elly表示工作需要有良好的溝通及表達能力,將客戶想要的效果清晰傳達到設計師,從而設計出合乎客人口味的 display。


Elly說組件在製作完成後會進行驗收才會運送,到組裝當日,她會到現場作最後檢查,減少出錯機會。 辭工陪伴女兒

工作多年, Elly慢慢由客戶助理升到高級客戶經理, 13年時,她因女兒出生,便辭去工作,「當時同時要跟好幾個 project,成日需要 OT,自己想多啲時間陪個女,就辭咗份工休息吓。期間有舊客想我幫手跟 project,初時都係以 freelance形式去做,慢慢個女大咗,自己想出返嚟工作,諗過不如自己成立間公司去接 job。」
14年, Elly成立 Topick,雖然是小公司,但仍有不少大品牌找她合作, Elly認為是有賴於與客戶建立信任及默契的關係,「我哋工作可以話係將客戶嘅想像,用實物呈現出嚟,符合到客人口味最重要。要做到呢點,我覺得要識企喺客戶角度及抵得諗,同每個客戶合作,我都要先了解品牌嘅資訊,例如市場定位、競爭對手、品牌形象等,然後先去諗設計。最初未清楚客戶口味時,我哋會同時畀 3至 4個設計方案佢揀,通常要改 2、 3次,但細節改動來回可能有成二、三十次,不過我哋都會改畀佢,定案先拎去整。」




每逢聖誕及新年都是各大品牌做大型推廣的日子, 16年聖誕, Elly為金莎設計了一個以現代及尊貴為主題的攤位,攤位外形以圓拱形設計,配合金莎的外形。


這個展示架是上年與 Etude House合作,設計概念要突出新推出 4款 cushion的顏色。 同時擺過千地點

Elly表示工作雖然對客為主,但對物料也要有一定認識,「 Display物料主要係紙、亞加力膠及木,用乜嘢物料取決於要擺幾耐、承重及擺放地點等。一個 project由設計到完成約要 1個月時間,收費由 5千至 1百萬都有,睇番佢會擺幾多個地方。每年 9月至 1月最忙,聖誕節及農曆新年有最多推廣活動,試過同時間要擺放千幾個地點,雖然唔使個個地點都跟晒,但幾個月前就要開始準備。」
3年間,憑着細心的服務, Topick得到與雀巢、金莎朱古力、 Johnson and Johnson及 Etude House等品牌的合作機會。 Elly表示:「公司由最初得我一個,到𠵱家有 7位同事,發展已經超過我預期。目前比較多與日用品及食品品牌合作,嚟緊希望可以同時裝、運動及珠寶等品牌合作,設計出更有創意嘅作品。」




攤位組件在內地工廠製作完成後,會運送到活動的場地,由工人進行最後組裝。


這次 Topick為 Movenpick製作的 pop-up攤位,以黑白兩色為主,攤位設計上配合品牌走高檔路線的形象,外形簡潔而優雅。 點入行?

要入行做 advertising agency, Elly表示性格外向的人較為適合,「客戶助理主要係跟客人溝通,同時要作為與設計師及廠方嘅橋樑,需要有良好嘅溝通技巧。另外,喺廠方製作 display時,我哋只可以靠相片去觀察同原設計圖上嘅尺寸、顏色、印刷嘅字體及字句有冇出入,以即時作出更改。如果運到去現場先發現有錯就會好麻煩,所以細心十分重要。」初入行的人士多由客戶助理做起,月薪$10,000至$15,000,現時 Elly年薪約有 60萬。

撰文:曾志恒
攝影:林文樂
部分圖片由被訪者提供

    tvb4life 發表在 痞客邦 留言(0) 人氣()