專題 Log In

斯文身.狂野心  M-AMG E63 S 4MATIC+

贊助商連結

如果聽到一架街車有 612匹馬力,你會諗起邊架車?
筆者第一時間諗起 2004年推出嘅 Ferrari 612 Scaglietti,因為個名易記嘛。
到咗 2017年,估唔到再有另一架 612匹嘅街車推出而令筆者有深刻印象,不過今次並唔係單靠個名而記得,而係驚訝一架四門中型房車竟然已達 612匹!
無錯!就係車迷期待已久嘅 M-AMG E63 S, 612匹馬力、 0-100km/h只需 3.4秒,屬 M-AMG現時加速最快嘅型號。
係呀!快過 M-AMG GT R!

事先講明,筆者喺 W211年代,已經鍾情當時嘅 E55 AMG(因為 W210實在太醜),事關極之低調嘅優雅外表加上當時極為瘋狂嘅馬力輸出,就好似一位外表斯文嘅公子,內裏其實好鬼打得,性格設定就好似全宇宙最打得嘅甄子丹,但坐喺度彈得一手好鋼琴一樣,幾咁具戲劇性!於 2002年推出嘅 W211 E55 AMG,當時突破 100萬嘅車價($1,110,000)已經非常轟動,經兩代進化嘅最新後繼型號 E63 S,$1,798,000車價亦都誇張,最近同級對手有價位差唔多、馬力同樣 over 600匹( 604匹)嘅 Audi RS6 Avant Performance 4.0 TFSI quattro,但都係以 E63 S馬力最強,可以話係現時市場之中,喺同一車價下能夠獲得最大馬力嘅車款!




小尾翼向上揚起,但顏色與車身相同,保持低調。


側沙板貼上「 V8 BITURBO 4MATIC+」徽章,而且被鋼琴黑色勾形裝飾包圍。


尾喉上隱藏 AMG標誌,呢個位比較細緻。


尾喉間裝上並不誇張嘅車尾導風槽,但已是成架車之中最惡!

M-AMG E63 S 4MATIC+ Spec.
引擎: 3,982c.c. V8 biturbo
馬力: 612hp/5,750-6,500rpm
扭力: 86.6kgm/2,500-4,500rpm
傳動: 9前速自動,附+/-模式
車身: 4,993× 1,907× 1,460( mm)
軸距: 2,939mm
重量: 1,880kg
耗油: 9.1-8.8L/100 km
0-100km/h: 3.4秒
車價:$1,798,000起
查詢:仁孚行( 2895 7339)

外形依舊極低調


車身長咗 70mm,主要因為包圍向外擴張;而矮咗係因為改用 AMG Sports氣壓運動懸掛。

M-AMG近年推出嘅頂級四門車,外表都偏向愈來愈辣,最佳代表有 A45同 C63 S,尤其初推出時嘅 Edition 1版本,辣得已經同 M-Benz一向優雅作風背道而馳。可幸廠方明白 E-Class路線始終屬於高級行政房車,為保持低調型格, E63 S除咗鬼面罩已改用大三角星,其餘都散發幾分當年 E55 AMG嘅低調美,解除晒筆者對 E63 S會否惡得過火嘅疑慮。
經適量外表改動嘅 E63 S,專用 AMG頭泵把加入中間向上揚起嘅飛翼設計,左右入風口增大面積並內藏黑色勾形裝飾,設計靈感來自 M-AMG旗下 GT跑車。頭冚亦都增加兩條微微嘅骨線、前輪側沙板鑲上「 V8 BITURBO 4MATIC+」徽章,其實單單留意車頭 details都可以輕易分辨出其特殊身份。 E63 S車尾算係變得最誇張,改用四出長方形 AMG尾喉,每組尾喉套都刻上 AMG標誌,玩得極之細緻,而且尾喉間更收藏極為淺薄嘅車底導風槽,配合埋尾冚上向上兜起嘅小尾翼,只對車尾線條作出輕微影響,瀟灑!喺整體外表升級,再配備更闊車胎底下, E63 S車身比普通 E-Class分別長咗 70mm、闊咗 55mm同矮咗 8mm,軸距則維持不變。

三代隱藏戰鬥格

由 AMG官方主理嘅 E-Class,原來已經歷三代進化,每代都係非常低調,位位都係穿起西裝嘅拳王!

由四眼仔開始

初代 AMG版 E-Class由「四眼仔」( W210)演變而成,起初曾少量推出過 E36 AMG、 E50 AMG同 E60 AMG,但官方正式量產屬 1999年推出,配 5.4公升 V8引擎,最大馬力 354匹嘅 E55 AMG。

第二代最架勢

曾吒咤一時嘅第二代 E55 AMG( W211), 2002年推出,採用 5.4公升 V8機械增壓引擎,馬力暴升至 476匹, 0-100km/h只需 4.7秒,成為當時世上最快房車。

三代半似今代

2011年嘅第三代 AMG版 E-Class( W212)升格為 E63,全因改配 557匹嘅 6.2公升 V8 BITURBO引擎,同時廠方喺 facelift時更推出「 S」版本,馬力提高至 585匹,而且外表更似今代。

內籠豪華又跑味

其實 E63 S嘅低調味不只外表,貴為高級行政房車,車廂依舊豪華典雅。廠方只為 E63 S車廂中控台改用碳纖維面板、小時鐘升級做 IWC款式、軚盤改以猄皮包裹、前座加入 AMG徽章並於頭枕上壓上 AMG圓形標誌。其實設計都同 E43相似,但 E43反而用晒紅色縫線點綴,比 E63 S更加浮誇。
設備方面,頂級嘅 E63 S設備當然已齊料示人,中控台上最具標記嘅兩組相連式巨 mon.連表板當然不變,但表板圖像就有些少修改。另外、 Burmester音響、大天窗都仍然保留,加上配備大量主動式安全系統、 360度泊車鏡頭以及自動跟隨前車嘅駕駛輔助系統,咁齊料就令 E63 S車重達 1,880kg,一啲都唔輕!




中控台用咗碳纖物料,不過效果唔太 racing,反而令架車更潮。軚盤除咗包上猄皮,軚盤頂仲有白色置中記號。


編號 M178嘅 4公升 V8 biturbo引擎,廠方耗油為$9.1L/100km,現實參考,當日入滿油約$1,200,全日行咗 130km左右,大部分時間用「 RACE」模式,而且拍攝長開冷氣,最後就快用咗半缸油,自己計。


今代 E-Class唯一一架真正得到呢塊「 one man one engine」嘅引擎簽名牌,車價盛惠$1,798,000起。


軚盤後轉波撥片好就手,但軚盤上嘅輕觸式十字按鈕,使用起上嚟唔太方便。


後座背部同大腿位都加入猄皮物料,但因為剪裁唔貼身,快車都會坐到移位。 四驅穩定行路軌

E63 S外表好低調,但 612匹馬力絕對唔講得笑,所搭載編號 M178嘅 3,982c.c. V8 biturbo引擎,與 C63 S同 GT共用,最大扭力達 86.6kgm,而且出力範圍由 2,500-4,500rpm,配 9前速 DCT雙離合器波箱,講多一次, 0-100km/h只需 3.4秒,屬現時 M-AMG catalog入面最快嘅型號!要應付咁大馬力, E63 S只有配備 4MATIC+四驅系統嘅版本,但四驅系統可以喺有需要時將 100%動力傳向後軸。試車當日早上落過大雨,下午反而陽光普照,結果無論喺乾濕地嘅表現,四條胎都好似行路軌咁咬實地面,加上車身比較重,所以會比純後驅嘅 C63 S欠缺少少靈活性。







雙重性格易操控

E63 S總共提供咗「 Comfort」、「 Sport」、「 Sport+」、「 Race」及「 Individual」五種駕駛模式,筆者用得最多就係「 Race」,軚盤轉向力同懸掛都調至最硬、波箱反應最敏感、引擎排氣喉聲全開。未開車先呼幾吓空油,引擎轉數下降時尾喉已傳來「霹靂啪嘞」巨響,聲線同 GT R八成相似。推入 D波盡油起步,四條胎冇響到,但 3.4秒 0-100km/h配合低沉引擎咆哮,令人即時血脈沸騰,呢種感覺,就算幾快嘅電動車都唔會畀到你!而筆者最欣賞佢喺「 Comfort」同「 Race」之間尾喉聲有好大分別,「 Comfort」做到完全零 back fire聲響,就好似完全變咗另一架車。
E63 S畢竟都係一架高級行政房車,有幾點都係擺脫唔到,例如軚盤轉向比例雖快,但喺「 Race」模式無論扭動力度同傳來路面訊息都係好輕,與 BMW嘅 M系比較根本屬兩個世界;另外懸掛喺「 Comfort」模式會比一般 E-Class為跳,但「 Race」時亦唔會硬得好多,所以轉向都會有一定程度傾側。




中控台與手枕之間嘅 COMAND觸控平台,左右佈滿各式設定按鈕。


中控台面版上嘅 IWC時鐘,只有頂級嘅 M-AMG型號先至配備。


大天窗雖然為車廂增加空間感,但亦都將車身重心提高咗。


「運動」表板款式改為單圈設計,右方負責顯示更多資料,圖為 E63 S追加嘅「 Warm-up」數據,專門負責顯示車胎溫度。


表板提供三個選擇,雙圈式為「經典」,轉數表內改為可顯示更多資料,圖為顯示 G-Force圖。

撰文:黃德禹
攝影:葉偉豪

 

    文章標籤

    M-AMG E63 S 4MATIC+

    全站熱搜

    tvb4life 發表在 痞客邦 留言(0) 人氣()