新車激試

為未來鋪路  Audi Q5 45 TFSI quattro

贊助商連結

眾所周知 SUV已進身主流車款,就算呢個唔係全球性現象,起碼香港市場係囉!行出街數一數,一個路口見到幾多部 SUV,就知有幾 hit! Audi嘅 SUV可以話非常普及, Q2、 Q3、 Q5及 Q7涵蓋小至大 size嘅 SUV,講得誇啲,真係梗有一款啱心水。當中最受歡迎首推中型 size嘅 Q5,自 2008年面世,至去年年尾轉款,竟玩足 8年,而且整個生產週期共生產超過 160萬部!根本就係 Audi嘅重要「食糧」!車廠未來數年嘅生意好壞, Q5都有好大影響力,所以 Q5要轉款絕對係大事。雖然新款都係一副典型 SUV賣相,但改變見著知微,上車細心觀摩,總發現吸引之處。

究竟 SUV車種仲可以紅幾耐?其實與其問 SUV紅幾耐,不如接受 SUV已成為與房車一樣入屋嘅車款,唔會有突然唔紅嘅一日,只會繼續順應潮流而進化。新一代 Q5經多年蘊釀,內外都有明顯進化,變得更似一部 Q7外,連著名嘅四驅系統都升級埋。




立體式車頭加上大量電鍍裝飾,令外表有房車一樣嘅貴氣。


尾門上增加一條非常銳利嘅骨線,與 Q7同出一轍。


「 quattro ultra」四驅系統新增兩組傳動離合器,令傳動系統更有效率。

Audi Q5 45 TFSI quattro spec.
引擎: 1,984c.c.直四 turbo
馬力: 252hp/5,000-6,000rpm
扭力: 37.7kgm/1,600-4,500rpm
傳動: 7前速自動、附+/-模式
車身: 4,663× 1,893× 1,659( mm)
軸距: 2,819mm
0-100km/h: 6.3秒
耗油: 6.8L/100km
售價:未定
查詢: Audi HK( 2380 2233)

首配新四驅

以玩四驅系統而聞名嘅車廠唔算多, Audi可算係當中最出位,著名 quattro四驅系統幾乎人人都識,由拉力賽玩到去豪華房車,真係冇幾多間車廠可以咁專注喺四驅系統上。 quattro四驅系統有口皆碑,性能表現上毋容置疑,但隨科技進步, quattro系統都係時候嚟一次變革! Audi喺云云新車中,選中第二代 Q5作為新 quattro系統嘅登場車款,可見有幾咁重視 Q5。新 quattro名為「 quattro ultra」,主要變革在於系統設有兩組傳動離合器,第一組設於前軸及波箱之後、傳動軸之前,主要作用係切換前驅及四驅,據廠方表示,巡航及平路行車,絕大部分時間都係用前驅,電腦自動收集四輪負載資訊及引擊輸出,從而鎖合第一組離合器,即時切換至四驅模式,咁樣就可以大大減少浪費動力,慳油至上。第二組離合器則設於尾差速上,主要控制左右後輪動力分佈,令傳動更有效率。
Q5唔單只用新四驅系統,連底盤都用上 MLB evo模組式底盤,車身尺碼比上大少少,現時長 4,663mm、闊 1,893mm及高 1,659mm,如將新車泊喺舊款旁,會發覺兩代都幾似樣。新款主要係車身線條比上代硬朗、車身腰線明顯,由車頭冚伸延至尾廂門,有濃厚 Q7影子。今代車架及底盤多個主要地方用上更多高剛性物料,令整體有更好抗扭表現及輕量化,車重平均只有 1,720kg,比上代足足輕 90kg。




其實新 Q5外表同 Q7真係有八成相似。


走馬燈式指揮燈已成為新世代 Audi嘅基本設計。


採用 MLB evo底盤,車身長度及軸距都比上代有所增長。 車廂熟口面

筆者試完車後有朋友問:「新 Q5有咩新嘢?」老實講,筆者一下子真係答唔出口,全因 Q5由外到內都有熟口熟面感覺,總覺得喺邊度見過。外表上, Q5有 Q7影子都無可厚非,大家都係 Q系列,家族面貌少不免都有啲,但一進入 Q5車廂,仍然有熟悉感覺,唔係嚟自 Q7,反而係上兩個月抵港嘅 A5車系。中控台非常簡潔,以鋁金合飾條分割,上半部只有 7吋 MMI多媒體顯示器(可額外選配 8.3吋款)及冷氣出風口,下半係整合式冷氣系統及系統設置掣。 MMI系統操作全歸納到波棍台上,令駕駛者觸手可及,方便!另一大特色係波棍非常短小,而且 P波都用埋按鈕式,舊 Q5用家要適應一下,其實幾順手好用。
測試車一如以往冇裝上最強裝備示人,軚盤係正常款式,冇用平底款,不過握持手感都好好,個人認為冇必要升級。不過最重要係表板並未裝上 12.3吋 Virtual Cockpit數碼表板,只用舊款指針款式配小型 mon.,我覺得買新世代 Audi車一定要裝 Virtual Cockpit表板先充分發揮導航功能,就算唔用導航,表板都美觀得多,買得新車唔差在裝埋。
雖然測試車已裝上 S line套件,但座位仍用普通款式,承托表現唔錯,前座有齊電動調節位置及局部承托,後座因為軸距增長至 2,819mm,所以腿部空間更寬敞,配合巨大天幕車頂,空間感同 Q7差唔多。此外,今代尾廂空間增至 610L,摺平後座背更可以增至 1,550L,好適合存放大件戶外活動用品,襯晒 SUV性格。







駕駛艙同 A5有九成相似,以簡約為主,賣相討好。


表板可以升級成 12.3吋 Virtual Cockpit數碼表板,但測試車冇囉!


冷氣系統按鈕為輕觸式設計,手指輕輕掂住就顯示選項。


尾廂空間原本有 610L,翻摺後座背可以增至 1,550L。


後座腿部空間比上代好,不過傳動軸凸槽依然巨大,中間乘客舒適性一般。


前座為全電動款式,而且有獨立承托力調校。 駕乘更舒適

新一代 Q5嘅動力配置都唔算有大驚喜,仍用 2.0公升 turbo引擎為主打,但新款點都要有新嘢先可以向廣大車迷交待,因此引擎馬力被上調至 252匹,比上代初期嘅 211匹及後期嘅 225匹都有明顯增長。扭力方面,只比上代增加 2kgm,達到 37.7kgm,喺馬力、扭力俱增嘅情況下,車重又比上代下調,令新 Q5嘅 0-100km/h加速快咗 0.6秒, 6.3秒就可以完成,唔錯!此外,耗油量都有進步, 6.8L/100km比上代少咗 0.1L,完全達到「馬力大咗、又慳油咗」嘅目標。
2.0公升 turbo引擎實在係「百搭百中」嘅引擎,上一代已分別配用過 S tronic及 Tiptronic波箱,兩者表現各具特色。今代又再次採用 S tronic雙離合器波箱,但已升級至 7速款式,實際表現令人讚賞,既留有 S tronic波箱嘅快狠準,又有 Tiptronic波箱嘅順滑感,令駕駛起嚟容易拿捏加速度,乘客亦感受到豐厚而柔順加速,表現似大房車。此外, Q5嘅駕駛模式都同一般 Audi車有少少唔同,如選配埋氣壓升降懸掛,會新增 Offroad及 Allroad模式,設定後可以鎖定四驅行車及升高車身,而今次測試車因為冇裝氣壓升降懸掛,所以只有 Offroad模式。其實選用 Offroad模式再加上落山車速控制系統,已可令 Q5應付輕量越野路面,香港地夠用有餘。










新增 Offroad駕駛模式,可以簡單撳個掣就鎖定四驅驅動。





7速 S tronic波箱表現比上代好得多,可以於波棍或軚環操作+/-模式。


2.0公升 turbo引擎馬力輸出被上調至 252匹,比上代高出超過 10%。

撰文:袁國基
攝影:葉偉豪

 

    文章標籤

    Audi Q5 45 TFSI quattro

    全站熱搜

    tvb4life 發表在 痞客邦 留言(0) 人氣()