坦白講

何必斤斤計較

贊助商連結

馮一芯( Samantha),二十歲,中文大學新傳系學生。中學時患上厭食症,一度需入醫院接受治療個多月;體重回復正常,但心靈未痊癒。大學時期,她再度節食,令體重下跌至八十多磅。一年前,她開始茹素,發掘蔬果背後的益處,終由不喜歡食物,到最後享受食物。

我自細係完美主義者,讀書好叻,寫得一手好字,如果筆記寫得唔靚,我會全頁唔要,由頭寫過。
十二、三歲時,我跳舞好勁,係班上最叻嗰幾個之一,但慢慢發現,我開始落後,我唔想咁。當時我覺得自己個屁股好大、小腿又粗。
細個唔識,以為食少啲就會瘦,每日就減食量。我會喺日記寫低早午晚食咗咩,仲專登寫喺最後嗰頁,因為媽媽唔會睇。我會專登揀夜晚上跳舞堂,可以避開同家人食飯,就無人知我食咁少。早餐只食一啖穀物、午餐一杯果汁或橙、晚餐幾條菜加一個包,人哋一餐係我三餐。分量愈來愈少,甚至飲杯果汁、食粒糖。我計數唔叻,但計卡路里就好勁,女仔要千六卡以上卡路里,但我就食三百卡。

十四歲,媽媽見我太瘦帶我去睇醫生。醫生話我心跳率低,再咁落去會暈。原來我有厭食症,要即時入院。住院五個星期,感覺好無力。醫院每日安排餐單俾我,又會開營養奶,質地好杰又有陣鐵味,真係好難飲。出院後,每星期都要返醫院,上磅輕咗,醫生會加量;如果重咗,自己個心又會唔舒服。直到磅數夠,醫生同屋企認為我好番。
大學住 Hall,會食消夜、飲咖啡,我肥咗。同學話我好得意、圓碌碌,會搣我,其實我好介意。我再次節食,我唔鍾意食肉,只食水分高、卡路里低的食物,番茄、火龍果、沙律菜,同埋不停做運動。幾個月後,我瘦到連坐低都會感覺到自己得棚骨,當時我好唔鍾意影相、照鏡,我覺得自己瘦得好可憐。情況比細個嗰次更差,我唔想咁,但我真係控制唔到。
後來,有朋友介紹我睇動物權益嘅資料,我反思食肉背後嘅殘忍真相,唔想再殺生,我開始轉食素。媽媽好反對,但我堅持,我開始接觸唔同蔬果,搵佢哋嘅益處。蔬果大多都係低卡,亦間接令我食多咗唔同嘅嘢,我開始享受食物,唔再在乎卡路里,反而學識睇營養。厭食那年開始,我停經,一直到我食素後一年,月經先正常番。那刻,我真係好開心,證明我已經痊癒。我知好多女仔同我一樣,會睇數字、磅數去標籤自己,其實身體健唔健康,先係最重要。

撰文:黎雅婷
攝影:葉漢華
mailto:news@nextdigital.com.hk

 

    文章標籤

    坦白講 何必斤斤計較

    全站熱搜

    tvb4life 發表在 痞客邦 留言(0) 人氣()