胡渭康半百歲倒吊養生

贊助商連結

喺八十年代紅極一時嘅「小虎隊」成員胡渭康,隨住八五年拆夥後,佢一直四出登台,直至一三年回流香港,重現幕前。而備受無綫重用嘅佢,之前拍咗幾套劇,好似《愛•回家之八時入席》、《火線下的江湖大佬》等,令佢人氣回升。

雖然年屆五十,但胡渭康保養得好好,身形更fit到漏,原來同佢鍾意做運動有關;而基本上噏得出嘅運動,佢都識玩。最近,佢仲學埋空中瑜伽,日前,東姑就直擊佢到健身中心上堂。雖然學咗短短兩個月,但手腳靈活嘅佢,一上條瑜伽布繩,即揮灑自如,輕易做出多個倒掛動作,玩得相當過癮。

事後,胡渭康同東姑大方分享︰「空中瑜伽係好好嘅伸展運動,可以舒緩腰、背、頸痛嘅問題。其實,我呢個高度,好易寒背,但我成日拉筋,當然無啦。我健康狀況都唔錯,每年嘅身體檢查都OK,醫生仲叫我唔使返去添。」

胡渭康係運動能手,玩空中瑜伽時,佢輕易做到倒吊並雙手、雙腳合十嘅動作,由於整個人倒轉時,會腦部充血,佢就大讚反地心吸力好好玩。

 

《娛樂新聞台》主持秦啟維(左)越級挑戰胡渭康玩空中瑜伽,二人玩之前,在導師指導下進行熱身。

 

旁人睇落玩得舒服,但胡渭康就話每次上完堂,都會出晒汗,而佢最愛係呢個坐喺度嘅甫士,因為乜都唔使做。

 

胡渭康同另一「小虎隊」成員林利,早前上《流行經典50年》唱出昔日嘅金曲《不得不講》,依然聽出耳油。

 

重返無綫嘅佢,跟《愛•回家之八時入席》嘅拍檔相處融洽,間中也有食飯聯誼。

tvb4life 發表在 痞客邦 留言(0) 人氣()