Leo的父親是經營燒臘店,作為二代的他嘗試把工場發展得更多元化,於是開設榮康燒味餐廳,將燒味元素融入其中,務求把燒味行業承傳下去。

創業通

屋邨茶餐廳 自設工場賣即燒燒味

贊助商連結

傳統行業往往要面對承傳的問題,當中飲食業亦難有新血加入。燒味二代 Leo希望把父業發展得更多元化,在 11年創立榮康燒味餐廳,主打燒味飯,茶餐廳內設有燒味工場,可自成生產鏈,將即燒燒味變為餐廳主打美食,做到品質控制上有保證,希望將燒味生意發展得更加好。

採訪當日,榮康燒味餐廳的老闆 Leo,正在燒味工場內與燒味師傅一同忙裹忙外。「我哋餐廳主打燒味,燒豬、叉燒及燒鴨等都係現場自家燒製,出品夠新鮮,喺質素上會較易控制。市面上燒乳豬多數用 15kg至 19kg嘅豬,而我哋係採用 23kg,除咗皮外,仲會多啲肉食,食落肥瘦適中。我哋平時每日賣到 5、 6隻乳豬,到清明節時,試過一日有 70、 80隻乳豬嘅訂單,真係要開通宵趕貨畀客人。」每隻乳豬售$680,燒味飯則由$37起。
因爸爸開燒臘店,在讀書時, 80後的 Leo已幫手針豬、斬豬及企檔等,每個工序都接觸過,「 00年中七畢業後,我想出去闖闖,做過時裝批發及零售業。直到 09年,爸爸有個朋友喺深水埗開茶餐廳,想搵人頂手間鋪,我覺得工字不出頭,不如試吓自己搞生意,就頂手嚟做。」




雖然現時 Leo不會在工場燒製燒味,但他仍會不時與工場的燒味師傅交流,確保燒味的質素。


榮康燒味餐廳有自家的燒味工場,燒味是每日新鮮燒製,水準有一定保證。


乳豬叉燒飯$57


燒腩仔飯$37


叉鴨飯$42 老闆初體驗

80後的 Leo對經營餐廳沒有經驗,很多地方也是慢慢摸索出來,「最初向爸爸嘅朋友取經,請教佢訂貨、定價、經營時間等,自己亦去唔同崗位幫手,樓面、送外賣、清潔及收銀等都做過,了解一間茶餐廳係點運作,會知道咩時段多人、人手點樣安排,喺經營上都應付得嚟。」
慢慢累積到飲食業經驗, Leo想把家中生意加入其中, 11年決定開設榮康燒味餐廳,「想發展番燒味呢行,始終屋企做開,會有相關經驗及入貨都易啲。當時住緊青衣長康邨,見附近個冬菇亭冇人租,我同屋企人商量後,覺得個地點近自己住嘅地方,鋪頭面積約 6千呎,夠大開到燒味工場,可以即燒即賣燒味,最後決定將深水埗間鋪頂畀人,另外喺邨內開茶餐廳,提供自家燒味。」




身為老闆的 Leo常常親力親為,清潔飯桌更是不在話下。


Leo做過餐廳不同的崗位,他表示經營餐飲業辛苦之處是時間長及困身,「餐廳有乜嘢事就算放假都要返嚟處理,好似跳電掣、塞廁所等。」 Sell人情味

榮康燒味餐廳主做街坊生意, Leo表示維持生意要靠人情味及食物質素,「多數都係屋邨內嘅住戶幫襯,見多幾次面有時會傾幾句偈,下次嚟會打招呼,我仲記住佢哋經常會點乜嘢餐,班客同你熟絡咗,自然會多啲嚟幫襯。食物上自己會睇住,至少燒味一定有保證。」
另外,要經營好飲食業,員工十分重要, Leo說管理上要建立良好關係,懂得互相體諒,「我哋係服務業,盡量以客人為先,客人話碟飯及杯飲品有問題,員工都會換畀佢。但員工係提供服務,唔係服侍客人,試過有客人提出好多無理嘅要求,呢樣嗰樣,阻到員工工作,呢個時候我絕對會企喺員工嗰邊,會客氣請客人離開。你對班員工好,佢哋會感受到,會易啲留到人。」




Leo表示在屋邨開餐龐與街坊打好關係十分重要,他不時會與食客聊天,有時更會與他們的小朋友玩耍。


榮康燒味餐廳頗受附近的街坊歡迎,每到飯市時間,餐廳都會坐滿來光顧的食客。


旺角鋪難維皮


16年, Leo與友人在旺角新世紀廣場開設分店,最後因成本太高而結業,但從中得到啟發,明白成本控制的重要,從而產生開網上店的念頭。

16年, Leo希望生意有所突破,與友人合資開設榮康乳豬專門店,進駐旺角新世紀廣場,「廣場個 food court想搵新餐廳,我哋要寫 proposal,仲要面試 present自家特點,最後成功咗。我哋賣點係現場即燒乳豬,客人反應都唔錯,不過間鋪每月租金加燈油火蠟雜費要成 20萬,加上我哋用嘅食材都係酒店水準,成本好高,但定價又唔可以太高,唔係個個月都維到皮。」
堅持到今年 3月,旺角店收支還是難以收支平衡, Leo決定結束旺角店,再另謀出路發展,「香港嘅租金貴,對擴充業務有好大嘅制肘,嚟緊想嘗試發展網上店,推出網上訂乳豬及燒味套餐,方便公司用嚟做新鋪開張,慶祝周年紀念等活動,想將燒味呢個傅統行業做得更好。」

地址︰青衣長康邨康泰樓地下 1至 4號熟食檔



客人 Ca:我住喺附近,平時都會嚟幫襯,覺得佢哋服務唔錯,燒味都幾好食,最常叫嘅係乳豬叉燒飯,啲豬皮脆肉嫩。

開業成本
租金︰$400,000( 3按 1上)
裝修及器材︰$1,200,000
入貨︰$90,000
總投資︰$1,690,000

每月收支
-租金︰$100,000
-人工︰$190,000( 12名全職+4名兼職+1名老闆)
-入貨︰$85,000
+營業額︰$420,000
=盈利︰$45,000

撰文:曾志恒
攝影:林文樂
部分圖片由被訪者提供

 

    tvb4life 發表在 痞客邦 留言(0) 人氣()